Read KapsikiDC 2 Wəshi nyi Mene Ka Meghe 9 Bible Online

2 Wəshi nyi Mene Ka Meghe 9 - KapsikiDC bible

2 Wəshi nyi Mene Ka Meghe 9

¹Nahe male nya kameghe te hɛɗia Saba kefate ghena nya geze mbeli te Salomon. Pa nde se kadzembe Zhɛrəzalɛm kezha dzeghe ntsehwelea ŋkɛ laka ghena nyi dzawe dzawe nyi 'yɛwe nde ve. Nahe nde kese le mbeli wəshi kwele kwele, tsagha zlegweməa lɛmə nyi kefə 'wərdə, mze kwa tere tere kwele kwele ba'a pelɛ nyi nza zləvə te hɛ. Pa nde se kadzete kema ta Salomon ba'a gezemte nda pɛtɛa ghena nyi kese ve.

²Pɛtɛ Salomon zhɛnete nda 'yɛwe ta nta. Kwete shɛ ya kwetɛŋe kaɗema ŋkɛ kezhɛnete nda we.

³Ma kwa nakɛ ntsehwelea Salomon meghea ka Saba nya kamale, ghɛ nya ŋate ŋkɛ,

⁴wəshi kezeme nyi te tabele ŋkɛ, tsema tsema ntishɛ ta mbelia ŋkɛ, lekwesa ta ka mene ta wəshi kezeme le wəshi kesa ba'a wəshi nyi dzeghekɛ melɛ kwa tere tere meghe le mbe ghɛa Mahwətə: heɓake nde va mawe ta wəshia shɛhɛ, bətə ghena zave nda za.

⁵Ma ke sha meghe: «Ma te hɛɗia ɗa ne, nahe 'ya kefate kageze ghena mbeli te gha ba'a te ntsehwelea ŋa. Nahe ghena shɛ kenza kakaganda.

⁶Kese 'ya kave ghə te ghena shɛhɛ tewə 'ya kenaka kase ba'a kanakɛ ŋkɛ le ntsə ta ɗa we. Nda kegezete ɗa bela ta ntsehwelea ŋa mbeli ya ci'a we! Nda nahe na kezlakemte zləvə nyi geze mbeli te gha.

⁷Zlama ya va mbelia ŋa, zlama ya va ka mene slene ta ŋa, hɛ nyi kwa kema keveci keveci kafa ghena ntsehwelea ŋa.

⁸Hana pa sha Shala Mahwətə ta ŋa, nya kentave ŋa kameghe te sləa ŋkɛ mbe ka Israyɛl! Kwa nza ŋkɛ kaɗe mbelia shɛhɛ ŋkɛ, kaɗe ŋkɛ kanza hɛ ndimə ndimə. Vatse nda veyi ŋa ŋkɛ kameghe kezha nza na kənəa mbelia ŋkɛ le kaganda ba'a dzeghwa tiɗiɗi.»

⁹Pa meghea ka Saba nya kamale ndeke nda mze kwa tere tere ke Salomon kakiləwə 3.500, 'wərdə kwele kwele, tsagha pelɛ nyi nza zləvə te hɛ. Kegha mbeli kanakɛ 'wərdə kala nyi fəke nda meghea ka Saba ke Salomon we.

¹⁰Pa ka mene slene ta meghe Hiram ba'a yɛ ŋa Salomon nyi lə kadzembe Ofir fəke mze kwa tere tere, tsagha sheghwəa ndakwela ba'a pelɛ nyi nza zləvə te hɛ.

¹¹Pa meghe Salomon sleɓete ŋkwa nya mbe ghɛa Mahwətə ba'a ki ghɛa meghe le sheghwəa shɛhɛ, tsagha yɛ gagera le ŋgwəleŋə kezha ka gha cimə. Kegha mbeli kanakɛ wəsə kala nyagha te hɛɗia Zhəwda.

¹²Ma laka ŋa ŋkɛ bela ne, pɛtɛ Salomon ɗave nda wəshi nyi ɗehwe nde le nyi 'yɛwete nde, kwele ma ke nyi kese ve. Kwa sebe ta ŋkɛ, tewətelɛwe meghe nya kamale le mbeli nta zhɛnete geva kalə sha hɛɗia nci.

¹³Mbe va kwetɛŋe ne, pa meghe Salomon kemave mze kwa tere tere kase kadzembe Zhɛrəzalɛm kakiləwə 20.000,

¹⁴kaɗema mbeli keɓelate jaɓeregwale nyi tsehete mbeli nyi kelə kadzehwa mte ba'a nyi kese va ka zhɛre dzeve, tsagha mze kwa tere tere le mze kwa ghwə ghwə nyi fəke nda ka mazea kɛfia ka Arabi ba'a mbelia jama nyi te ghəa sla ta hɛɗi ke Salomon.

¹⁵Pa meghe Salomon vɛsəte gelə nyi jama jama gwəmsə bake le mze kwa tere tere nya menete kala dəɓərə. Ma kezha vɛsə gelə kwetɛŋe ne, kiləwə ŋkwaŋe nta mze kwa tere tere mbeli

¹⁶ba'a gelə nyi ɓɛhwɛ ɓɛhwɛ gwəmsə mahekene le mze kwa tere tere nya menete mbeli kala dəɓərəa shɛ. Ma kezha vɛsə gelə kwetɛŋe ne, kiləwə mahekene nta mze kwa tere tere mbeli, pa beteyi hɛ ki ghɛ nya heka mbeli kaghɛa wəfe ta Liban.

¹⁷Pa meghe menete pasla nya wəba nya kepesa pesa le slene ta cewe ba'a vɛsəaghe mze kwa tere tere nya wɛŋe kənə.

¹⁸Ma pasla shɛ ne, ŋkwaŋe zlake taŋa mbeli kadzeme, pa ŋkwa kedɛke seɗa nya menete mbeli le mze kwa tere tere ndeɓe vare pasla ba'a ŋkwa kedɛke fegwele laka bela ta pasla bake. Ma laka bela ta pasla bake ɓiyitsa ne, bake nivɛrə nyi feɗete mbeli sleslete yitea ŋkwa kedɛŋe fegwele nyi vare pasla,

¹⁹ba'a meŋe bakeghəmbe kweci nivɛrə dzate mɛa taŋa kedzeme, ŋkwaŋe te kwa gwela, ŋkwaŋe te kwa zeme. Kegha mbeli kamenete kala nyagha te hɛɗia kwete hwa meghe we.

²⁰Pɛtɛa yɛ zlerekwe ta Salomon le mze kwa tere tere ganyɛ, pɛtɛa tasa nyi ki ghɛ nya mbe ghɛa wəfe ta Liban ne, le mze kwa tere tere nya slɛfeslɛ menete mbeli. Kese mbeli kamene wəshi le mze kwa ghwə ghwə we, kwa nza ŋkɛ kawəsə nya ɗema zləvə te newe mze kwa ghwə ghwə mbeli te vəa Salomon.

²¹Kwambelə ya va meghe, nyi ghwene ŋkɛ kadzembe Tarsis, mbelia Hiram zleɗe hɛ. Kala nya menete geva va mahekene ne, kazhɛne geva kwambeləa shɛhɛ kase viɗi viɗi va mze kwa tere tere, mze kwa ghwə ghwə, slene ta cewe, peshia keti ba'a mama ta 'yɛ ganji.

²²Meghe Salomon ne, za ma ŋkɛ ke kweci ka meghe pɛtɛ nyi te hɛɗi laka mcɛləa ŋkɛ ba'a laka ntsehwelea ŋkɛ.

²³Kwa nza ŋkɛ, nahe Shala kendeke nda ntsehwele dzawe, ya tema tema ne, mbe se ka meghe ka'yɛwe ntsehwele ve.

²⁴Keva keva fə nda wəshi gəmə mbelia shɛhɛ, wəshi nyi menete mbeli le mze kwa ghwə ghwə ba'a mze kwa tere tere, yɛ lekwesa, wəshi kempa, yɛ 'wərdə, yɛ gədəwə kwara lɛmə ba'a yɛ gədəwə kwara.

²⁵Ŋkwa ya va Salomon 4.000 kezha yɛ gədəwə ba'a yɛ wəmata gədəwə. Gədəwəa lɛmə ya ve 12.000, pa nteyi kweci tagha yite mbe Zhɛrəzalɛm, pa neheyi kweci dzeyi mbe meleme nyi hite nda ŋkwa mbeli ke hɛ.

²⁶Gheŋkɛ nde mene meghe te ka meghe, se mɛa Efrate, le hələ nya wəba hwa'a te hɛɗia ka Filisti ba'a hwa'a kwa ghala le Ɛzhipte.

²⁷Te zlaɓa ta meghe nda se cɛdɛ kala pelɛ nyi te hɛɗi mbe Zhɛrəzalɛm, nahe yɛ lekeleke kenza kwele kwele kala mekweɗa nyi kepese te hɛɗi nya kwake kwake.

²⁸Ma gədəwə nyi va Salomon ne, se mbe Ɛzhipte fə nda hɛ mbeli ba'a se te yayata hɛɗi pɛtɛ.

²⁹Ma nyi ketene ghena ta Salomon, se te kwa ghate pa te kwa keɗaŋe ne, mbe palepa ta slene ta nde mɛ ŋkwa Natan, ŋa nde mɛ ŋkwa Ahiya, nde Silo ba'a mbe ŋa wəsə nya nakɛ nde mɛ ŋkwa Yɛdo rafete geva hɛ. Ma kwa keɗaŋe ta palepa nya ne, ghena ta Zhɛrobowam wəzege ta Nebat yageze nde.

³⁰Nahe Salomon kemenehwe meghe kava wəfaɗemsə mbe Zhɛrəzalɛm te ghəa pɛtɛa ka Israyɛl.

³¹Ma kwa mte ŋkɛ ne, pa mbeli lamte vare yitenyɛ mbe meleme ta David. Wəzege ta ŋkɛ Robowam nde kelete meghe te ŋkwa ŋkɛ.