Read KapsikiDC Ɛsdras 9 Bible Online

Ɛsdras 9 - KapsikiDC bible

Ɛsdras 9

¹Ma kwa sebe ta wəshi nyighɛ ne, cape mbelia jama kase kageze ɗa: «Ma ka Israyɛl, ka dzeghe Shala le ka Lɛvi ne, kenehemte geva hɛ le mbeli nyi te hɛɗia shɛ we. Nahe hɛ ketekeve wəshi nyi ndiremi ndiremi kashasha nyi mene ka Kanan, ka Hɛt, ka Pɛrɛs, ka Zhɛbəs, ka Amon, ka Mowab, ka Ɛzhipte le ka Amor.

²Nahe hɛ kewəmeve mi hwa mbelia shɛhɛ kaŋa nci ba'a kaŋa ŋwalea nci. Ma tsagha, nahe mbelia Shala kegazete geva le mbeli nyi te hɛɗia shɛ. Mpelɛa ma yɛ mbelia jama le ka meha ghwə ka ghate kamene beze ghena nya kala nyagha.»

³Ma kwa fate ghena nyagha 'ya ne, pa 'ya ŋkwahemte lekwesa ta ɗa ba'a karalamea ɗa, ntake 'ya kaŋkwətsə yɛ shintia ghəa ɗa le ghwɛmɛa ɗa, kwelebəhə 'ya ntishɛ ɗa hwa hɛɗi.

⁴Pɛtɛ mbeli nyi keghazlənə va ghena ta Shala ta ka Israyɛl tsenete geva yitea 'ya va beze ghena nya menete nya ka Zhəwif nyi kezhɛneke geva, ma 'ya le ŋa ɗa ne, mba 'ya kwelebəhə hwa hɛɗi pa te vəa melɛ nya dzeghe mbeli hetɛhwɛɗi.

⁵Ma te və nya dzeghe melɛ kwa tɛhwɛɗi mbeli ne, nahe wənəa ɗa kegweɗakwete geva, mba lekwesa ba'a karalamea ɗa nyi keŋkwahe ŋkwahe kənəa 'ya. Gwəɗəŋə 'ya sha ghəa shene mbe hɛɗi, kafe 'ya sha dzeve laka Shala Mahwətə ta ɗa,

⁶ma 'ya shɛ: «Shala yawe, kwele kwele zhɛ ɗa hawe ba'a ketaze taze mehele ta ɗa kezha kafe kema laka gha Shala ta ɗa, va nya nza nde nahe fete ta n'yɛ kembakeyi geva kənəa ghəa n'yɛ ba'a nahe beze ghena ta n'yɛ kedzeme pa pelɛ ghweme.

⁷Se te vəa ka shihɛ n'yɛ pa ɓeshi ne, kwele kwele beze ghena nyi menete ghen'yɛ. Tewəmbəreke jaɗafa ta n'yɛ se ghen'yɛ, ka meghea n'yɛ ba'a ka dzeghe Shala ta n'yɛ mbe dzeve ta ka meghe nyi te kweci hɛɗi. Nahe hɛ kempəmte n'yɛ, kefəhwe n'yɛ, kefəhwe wəshia n'yɛ ba'a kevate hawe te ghen'yɛ kala nya ɓeshi nya.

⁸Ama nahe ŋkɛ ketemə ɓɛhwɛ tsetsenya ghala kwa ncɛte n'yɛ zlaɓa ta ŋa na Shala Mahwətə ta n'yɛ, kwa yɛhwe na kazhɛneke geva mbelia n'yɛ nyi ketene teghweme kanza te hɛɗi nya keveyi geva nya tekeleke. Ma tsagha, nahe Shala ta n'yɛ keghwenemte ntsə ta n'yɛ ba'a nahe ŋkɛ kezhɛnave n'yɛ mpi ɓɛhwɛ mbe nza ta n'yɛ mbe mava.

⁹Kaka mavashi se gheɓəmə, ama kesərəakɛ ɓəmə Shala ta ɓəmə mbe slene mava ta ɓəmə we. Nahe ŋkɛ kendeke nda hweŋkwa ke ka meghea ka Pɛrse kezha nza ganyɛke le gheɓəmə. Pa hɛ pelave ɓəmə hweŋkwa kezha nza te ghweme, kezha zhɛne kaŋa ghɛa ŋa, kahi kwəfia ŋkɛ ba'a kakemave ŋkwa kewəfərə mbe Zhəwda ba'a mbe Zhɛrəzalɛm.

¹⁰Ma tsetsenya gɛ Shala ta n'yɛ, wa ghena nya geze n'yɛ kwa sebe ta wəshi nyi kemenete geva nyi wa? Nahe ghen'yɛ kewəfəyite ghena nyi gezeke n'yɛ na

¹¹laka ka mene slene ta ŋa nyi kaka mɛ ŋkwa. Ma pa na gezete n'yɛ: ‹Ma hɛɗi nya tedzete nya yɛ kakele kaŋa ŋayɛ ne, hɛɗi nya wale wale ŋkɛ, va nya nza mbeli nyi te wale wale, nahe hɛ keviɗikɛ le wəshi nyi ndiremi ndiremi kashasha ta nci se te kwete bela pa te kwete.

¹²Mba yɛ keve nda ŋwalea kwɛa ŋayɛ kami ke ŋwalea nci, mba yɛ kewəme nda ŋwalea kwɛa nci ke ŋa ŋayɛ ŋwale. Mba yɛ kemawe kwelɛŋea nci ba'a zeɗe nza ta nci. Tsagha nza yɛ kazhɛre ŋayɛ kaka berete, katezeme wəshi ganji nyi te hɛɗia shɛ yɛ ba'a katesərə nda hɛ yɛ ke ŋwalea ŋayɛ kaghala ghala.›

¹³Nahe wəshi nyi kemenete n'yɛ geva tewəmbəreke wəshi nyi ndiremi ndiremia n'yɛ ba'a va wəba ta fete ta n'yɛ. Ndagwara kese na, gha Shala, kaɗa n'yɛ kala nya kehi te fete ta n'yɛ we, nahe na kendeke n'yɛ hweŋkwa kezha nza te ghweme, ghen'yɛ nyi teke nyi.

¹⁴Tsema nza ghen'yɛ zhɛne kaɗema yɛ fete yitea ghena nyi gezete na ba'a kawəme geva le mbeli nyi kemene wəshi nyi wale wale wa? Kaɗema na katehwepe wənə na va ghen'yɛ ba'a kazamte sebe te ghen'yɛ kaɗema kwete wəndə shɛ katetene na?

¹⁵Shala Mahwətə ta ka Israyɛl, tiɗiɗi na: ɓeshi nya ne, mbeli nyi ketene yitea mte ghen'yɛ. Wa nyi ghen'yɛ nyi kwa kema ta ŋa le fete ta n'yɛ, ndagwara mbe nza nya kala nya ne, wəndə shɛ kanzate nza kwa kema ta ŋa we.»