Read KapsikiDC Nɛhɛmi 1 Bible Online

Nɛhɛmi 1 - KapsikiDC bible

Nɛhɛmi 1

¹Ghena ta Nɛhɛmi, wəzege ta Hakaliya. Ma mbe va kwa bakemsə ta meghe Artasɛrsɛs te tere Kisləw, kwa nza 'ya mbe Səze, meleme kwa berete,

²pa yɛ Hanani, kwete wəndə hwa ka menəhɛ ɗa le kweci mbeli se te hɛɗia Zhəwda. Pa 'ya 'yɛwakɛ nza ta ka Zhəwif nyi ketene te ghweme kwa sebe ta fə nya fəhwe ŋkwa mbeli ba'a nza ta Zhɛrəzalɛm va hɛ.

³Ma ke hɛ zhɛnete ɗa: «Ma mbeli nyi kembele va fə nya fəhwe ŋkwa mbeli ne, mbe sla ta hɛɗia Zhəwda nzanji hɛ, ama mbe yaka nya wəba ba'a mbe hawe hɛ. Ma Zhɛrəzalɛm le ŋa ŋkɛ ne, keŋzla ŋzla kweci bela ta zlia ŋkɛ ba'a nahe gelembe nyi mɛ keteremte geva.»

⁴Ma kwa fate ghena nyighɛ 'ya ne, ntishɛ 'ya kanehwene. Kala wəndə nya mte wəndə ve 'ya kahɛ kwele kwele, kamene səwəmayɛ. Ntake 'ya kasəkwə Shala nya pelɛ ghweme,

⁵ma 'ya shɛ: «Mahwətə yawe, Shala nya pelɛ ghweme, Shala nya wəba ba'a nya ghazlənə mbeli ve, nya keya jikə geva ta ŋa ba'a ganyɛa ŋa laka mbeli nyi keɗe ŋa ba'a nyi keyɛ fete yitea ghena nyi gezete na.

⁶Zhɛrete kema ta ŋa laka 'ya, fate ndeɗekə, fa səkwə nya səkwə ŋa 'ya tsetsenya, 'ya nya kande mene ŋa slene. Veci le viɗi səkwə ŋa 'ya yitea ghen'yɛ ka Israyɛl, ka mene ŋa slene. Kasəkwə 'ya va gha kezha kelemte fete nyi menete ŋa ghen'yɛ na te wənə. E'e, 'ya le ghəa ɗa le ka shihɛ ɗa, nahe ghen'yɛ kemenete jaɗafa.

⁷Nahe ghen'yɛ kebezemte ŋa ghena le yɛma fete yitea ghena nyi gezete na, yitea wəshi mahalegə ba'a wəshi keshi nyi ndeke n'yɛ na laka nde mene slene ta ŋa Moyize.

⁸Zəzəte ghena nyi kese va gha nyi gezave n'yɛ Moyize: Ma keɗema yɛ fa ɗa ghena ne, katetaze ŋayɛ 'ya dzeyi hwa kweci hwelefefi.

⁹Ama kwa sebe ta ŋkɛ, kezhɛreke geva yɛ kase sha 'ya, kayate ghena nyi gezete 'ya yɛ ba'a kemenete slene le hɛ ne, katelə 'ya kazele ŋayɛ ba'a katezhɛne ŋayɛ 'ya kase kadzete ŋkwa nya ntave 'ya kezha ncɛ nza ta ɗa, ya tsemanyɛ fəghe ŋayɛ mbeli pa te ŋkwa nya zhigə hɛɗi.

¹⁰Mahwətə, ka mene slene ta ŋa ghen'yɛ, mbelia ŋa n'yɛ! Ghen'yɛ yambeleke na laka berete ta ŋa nya wəba ba'a laka berete ta dzeve ta ŋa.

¹¹Kampi ŋa dzeve 'ya, Mahwətə, fate səkwə nya səkwə ŋa 'ya ndeɗekə ba'a ŋa kweci ka mene slene ta ŋa nyi kezlama yitea ve zləvə te gha. Yipəyi wəshi nyi 'yɛwete nyi 'ya va gha kwa ɓeshi ba'a ndeke nda hweŋkwa ke meghe kazhɛne ɗa ŋkɛ le ganyɛa mehele.» Kande kele nda wəshi kesa 'ya ke meghe vəa ŋkwa shɛ.