Read KapsikiDC Nɛhɛmi 6 Bible Online

Nɛhɛmi 6 - KapsikiDC bible

Nɛhɛmi 6

¹Pa yɛ Sanebalat, Tobiya, Gɛshɛm, nde Arab le kweci ka ghema ta n'yɛ fate nahe 'ya keŋamte zli nya yitea meleme, kaɗema ŋzla ketene te. Ma vəa ŋkwa shɛ ne, kenaka 'ya kaləyi yɛ gelembe mɛ we.

²Pa yɛ Sanebalat le Gɛshɛm ghwenakɛ wəndə kaheka ɗa kadzawa Kefirim nya kwa zlərəa Ono kezha begeme le hɛ. Zəzə kemene ɗa wəsə kwa ndiremi ya va hɛ.

³Ama pa 'ya ghweneghe mbeli kageze nda ke hɛ: «Mba slene va 'ya kwele kwele kamene, dzawe nda nza 'ya kadzawa sha gheyɛ. Ma keslə ɗa 'ya teke kezha begeme le gheyɛ ne, kateghereŋe slene.»

⁴Pa hɛ ghwenakɛ ɗa wəndəa shɛnyɛ wəfaɗe zhigə, ghena nya kwetɛŋe yazhɛnete nda 'ya ke hɛ.

⁵Ma te kwa mcɛfe zhigə, pa Sanebalat ghwenakɛ kwete nde mene slene ta ŋkɛ le palepa kaɗema keŋzle.

⁶Ma ke te: «Kwete ghena kageze mbeli nyi keɗema kaka Zhəwif, tsagha gezete ɗa Gɛshɛm ne, gheyɛ le ka menəhɛ ŋa ne, gheyɛ ɗe kaɗema ghena ta mbeli. Vatse ŋa zli na. Gha ɗe kanza kameghea nci na, ke mbeli.

⁷Ma ke mbeli bandanyɛ ne, nahe na kentave ka mɛ ŋkwa kezha zlape mbe Zhɛrəzalɛm gha ya kameghea ka Zhəwda. Kadera nda tefate meghea ka Pɛrse we. Ma tsagha, nde himte ghena shɛ mə.»

⁸Pa 'ya ghweneghe wəndə kageze nda: «Ghena nya kaganda hwa ghena nyi geze nyi na we! Gha nde tarete hɛ.»

⁹Kwa nza ŋkɛ, mbeli pɛtɛ shɛhɛ kaɗe kadake n'yɛ. Ma zəzə hɛ kwa benake n'yɛ ghen'yɛ, katesərə slene ghen'yɛ. «Shala yawe, mtsehete ɗa berete mbe slene ta ɗa!»

¹⁰Ma te kwete hɛ ne, pa 'ya lə sha Shemaya, wəzege ta Delaya ba'a shia Mɛtabɛyɛl, kwa slavema ŋkɛ kase sha 'ya. Ma ke sha 'ya: «Begeme mə mbe ghɛa Shala, mbe ŋkwa nya keveyi geva tekeleke tsape, ŋzlete ɓəmə yɛ gelembe megela, kwa nza ŋkɛ katese ka ghema ta ŋa heviɗi kapesle ŋa.»

¹¹Ma 'ya zhɛnete nda: «Wəndə kehwɛ va wəndə 'ya we! Bandanyɛ ne, wərə wəndə nya kala 'ya kadzembe mbe ghɛa Shala ba'a kanzanyɛ te ghweme na? Ewə, kadzembe 'ya we!»

¹²Nahe 'ya keɗepete ghena nya kese va Shala yageze ɗa ŋkɛ we, ama yɛ Tobiya le Sanebalat nde pahwe kezha geze ɗa ŋkɛ kala nya.

¹³Wa raberə wa? Yitea ghazlənə ɗa 'ya na, nda yɛ ghena ta ŋkɛ 'ya kezha mene jaɗafa. Tsagha ne, gheŋkɛ ɗe kazhɛrete ɗa kawəndə nya ɗema zləvə te ba'a kapəli ɗa hawe.

¹⁴«Shala yawe, zəzəte wəshi nyi menete ɗa nyi yɛ Tobiya le Sanebalat, kala ŋa Nowadiya, nde mɛ ŋkwa ta Shala nya kamale ba'a kweci ka mɛ ŋkwa ta Shala nyi keɗe kadake ɗa.»

¹⁵Le hɛ bakemsə mcɛfeghəmbe mbe terea Ɛləwl nahemte geva sekawe ta zli, kwa sebe ta hɛ mcɛfemsə bakeghəmbe kamene slene.

¹⁶Ma kwa fate ghena shɛ ka ghema ta n'yɛ, benake kweci hwelefefi nyi dzeyi yitea ghen'yɛ va ghazlənə, kwerɗake ɗake hɛ va hawe. Pa hɛ ɗepete le kemane ta Shala menete geva slenea shɛ.

¹⁷Ma mbe pɛtɛa vəa shɛ ne, kwele kwele se yɛ Tobiya le mbelia jama ta ka Zhəwda karerafe yɛ palepa kwelɛ ghəa nci.

¹⁸Kwa nza ŋkɛ ne, kwele kwele ka Zhəwif nyi kejikəte geva le laka zeme fela, va nya nza ŋkɛ kamekwea Shekaniya nya kawəzege ta Ara, pa wəzege ta ŋkɛ le ghəa ŋkɛ, Yohanan wəmeve wəzha ta Meshəwlam, wəzege ta Bɛrɛkiya.

¹⁹Kageze zləvəa ŋkɛ hɛ kwa kema ta ɗa, kakele nda ghena nyi gezete 'ya hɛ. Pa Tobiya le ghəa ŋkɛ ghwenakɛ yɛ palepa kadake ɗa.