Read KapsikiDC Nɛhɛmi 9 Bible Online

Nɛhɛmi 9 - KapsikiDC bible

Nɛhɛmi 9

¹Ma mbe hɛ kwa bakemsə wəfaɗeghəmbe te terea shɛnyɛ ne, pa ka Israyɛl tsenete geva kezha mene səwəmayɛ. Pa hɛ hwepahwe wəsə hwa hwə, kərəaghe keləwə kənəa ghəa nci.

²Pa hɛ nehemte geva le mbeli nyi keɗema kaka Zhəwif, ntake hɛ kampi dzeve te jaɗafa ta nci ba'a ŋa ka shihɛ nci.

³Ma kwa sebe ta ŋkɛ, pa hɛ sate meslete kalerə mahekene kafa ghena nya jaŋga mbeli mbe palepa ta wəsə mahalegəa Shala Mahwətə ta nci. Katemə gare lerə mahekene ɓiyitsa, pa hɛ ŋame ghə mbe hɛɗi kwa kema ta Shala Mahwətə ta nci kezha mpi nda dzeve.

⁴Ma te ŋkwa nya keveyi geva kaŋa ka Lɛvi, pelɛhetɛme yɛ Yɛshəwa, Bani, Kadmiyɛl, Shebaniya, Bəwni, Shɛrɛbiya, Bani ba'a Kenani sate te ŋkwa ka'yɛwe kemane va Shala Mahwətə ta nci zlape zlape.

⁵Kwa sebe ta ŋkɛ, ma ke yɛ Yɛshəwa, Kadmiyɛl, Bani, Hashabnɛya, Shɛrɛbiya, Hodiya, Shebaniya le Petahiya gezete: «Sate mə katsa nda hana ke Shala Mahwətə ta ŋayɛ, tsa nda mə hana keveci keveci!» Mahwətə, pa yayata wəndə katsahe sləa ŋa nya nza zləvə te, nya nza kwelea ŋkɛ za ma ke nya nza mbeli kageze!

⁶Gha ya kaMahwətə kwetɛŋe ŋa! Nahe na kepate ghweme ba'a wəshi nyi pelɛ, tsagha yɛ saseregwa pɛtɛ, hɛɗi ba'a wəshi nyi te pɛtɛ, yɛ ndərə ba'a wəshi nyi kwa hɛ pɛtɛ. Kave nda mpi na ke yayata wəsə nya kepate geva. Kagwəɗəŋə berete nyi pelɛ ghweme kwa kema ta ŋa.

⁷Gha Shala Mahwətə nde ntave Abram. Gha nde kelakave ŋkɛ mbe Əwr nya te hɛɗia Kaldɛ, gha nde ndeke nda slə kaAbraham.

⁸Nahe na keneweve nza ta ŋkɛ dɛŋe dɛŋe te gha. Nahe na kemenete jikə geva le gheŋkɛ: nahe na kemeɗeyi kave nda hɛɗia ka Kanan, ŋa ka Hava, ŋa ka Amor, ŋa ka Pɛrɛs, ŋa ka Zhɛbəs ba'a ŋa ka Girgash ke ka shihɛnyɛ. Nahe na keyipəyi meɗe mɛa ŋa kwa, kwa nza na kawəndə nya tiɗiɗi.

⁹Nahe na kenakɛ yaka ta ka shihɛ n'yɛ mbe Ɛzhipte. Nahe na kefate lewela ta nci mɛa ndərəa ghwəvərə.

¹⁰Pa na menete wəshi meŋele nyi dzawe dzawe te Farawon, te ka mene slene ta ŋkɛ pɛtɛ ba'a te mbeli nyi te hɛɗia ŋkɛ pɛtɛ, kwa nza ŋkɛ nahe na keɗepete kele ghəa ka Ɛzhipte te ka shihɛ n'yɛ. Kwele kwele se zləvə te sləa ŋa, mba tsagha shɛ pa ɓeshi.

¹¹Pa na perawemte ndərə te kema ta ka Israyɛl kezha jivenji hɛ kwelɛ le seɗa keghwele ghwele. Pa na beteyi mbeli nyi kekeka hɛ kwa ŋkwəɗəa ndərə, kala pelɛ nya keteɗe kadzawa ŋkwəɗə nya lɛame.

¹²Ma heveci ne, kancɛ nda hweŋkwa na ke mbelia ŋa laka geɗeɗe ta meləkwə ləkwə, ma heviɗi, laka geɗeɗe ta ghwə nya kewaŋe nda hweŋkwa ke hɛ.

¹³Sawa pelɛ ghweme sawa na kageze ghena nda ke hɛ pelɛ ghweme ta Sinay: pa na ndeke nda ghena nyi gezete na kamene tiɗiɗi, wəshi mahalegə nyi kaganda, wəshi nyi tseɓate na ba'a wəshi nyi 'yɛwete na kamene ke hɛ.

¹⁴Laka Moyize, nde mene slene ta ŋa ne, nahe na kencɛte nda Saba, veci nya keveyi geva tekeleke kaŋa ŋa, nahe na ndeke nda ghena nyi gezete na kamene, wəshi nyi hi mbeli kahawe ve ba'a wəsə mahalegə ke hɛ.

¹⁵Pa na ndeke nda ɗafa nya kesawa pelɛ ghweme ke hɛ va ma, pa na ntsake yɛmə shave mbe keleɓa kezha sa hɛ va ndere. Pa na ghwenakɛ hɛ kazehwe hɛɗi nya meɗeyi na kave nda ke hɛ.

¹⁶Ama nahe ka shihɛ n'yɛ kenza kaka kele ghə, nahe hɛ kezhɛrete mehele ntɛaŋe ntɛaŋe, kese hɛ kafa ghena nyi gezave nda na ke hɛ we.

¹⁷Nahe hɛ keɗema yɛ fete, ba'a nahe hɛ kezaghəyite wəshi meŋele nyi menete nda na ke hɛ. Pa hɛ menete ghəa nci ntɛaŋe ntɛaŋe, pa hɛ zəzəte kazhɛne geva kadzembe slene mava ta nci nya mbe Ɛzhipte. Ama gha ne, kewəfəyite hɛ na we, kwa nza na kaShala nya kekelemte ghena te wənə, nya kemene ganyɛ ba'a nya kezhɛ heli, nya kezereghe ghena ba'a nya nza ɗe kwele kwele ve.

¹⁸Pa hɛ vɛsəte leve yitea mze, ma ke hɛ: “Wa nya Shala ta ɓəmə nya kelakave ɓəmə shave mbe Ɛzhipte nya”! Kwa menete hɛ kala nya ne, fete nya wəba yamenete ŋa hɛ.

¹⁹Ya tsagha shɛ ŋkɛ, laka ɗe ta ŋa nya keɗema kakiɗi ne, kesərəakɛ hɛ na te ɓerama we: geɗeɗe ta meləkwə ləkwə nya kencɛ nda hweŋkwa ke hɛ heveci ne, keslənyɛ ŋkɛ cakeɗake kənəa hɛ we, ya geɗeɗe ta ghwə nya kewaŋe nda hweŋkwa ke hɛ heviɗi.

²⁰Pa na ndeke nda sefə ganyɛ ke hɛ kezha ɗepe nehe ghena. Kese na ndaŋe nda mane ke mɛa nci we, nahe na kendeke nda yɛmə ke hɛ va ndere.

²¹Va wəfaɗemsə menete na kanewe ghweme te hɛ, kwamte te ɓerama ne, wəsə shɛ kaɗema va hɛ we. Kehalenji lekwesa ta nci we, kekesle seɗa te hɛ we.

²²Pa na ndeke nda berete ke hɛ te ghəa kweci hwelefefi ba'a kweci hɛɗi: pa na nehave nda hɛɗi nyi dzeyi yitea hɛ ke hɛ, hɛɗia Sihon, meghea ka Hɛshebon ba'a hɛɗia Og, meghea ka Bashan.

²³Pa na ndeke nda ya ŋwale ke hɛ kala yɛ saseregwa pelɛ ghweme. Pa na keleghe hɛ kadzete hɛɗi nya gezave nda nya na ke ka shihɛ nci kalə kakele.

²⁴Pa hwelefe ta nci dzete hɛɗia shɛ kakelehwe, pa na ŋkamte ka Kanan kwa kema ta nci ba'a vame hɛ mbe dzeve ta nci. Nahe mbelia ŋa kemenete kala wəsə nya ɗe hɛ le ka mazea kɛfi ba'a kweci hwelefefi nyi te hɛɗi shɛ.

²⁵Pa hɛ fəhwe yɛ meleme nyi nza zli yite, wəve ganji, ghɛ nyi viɗi va mama ta mcɛlə, belageji nyi kelate geva, wəvea rɛzɛŋe, wəvea bekele ba'a wəfe kwele kwele nyi keya. Te zlaɓa ta ganyɛa mehele ta ŋa nda zehwe wəshi hɛ behe behe, nda neghate negha hɛ kedeke dekenji ba'a nda nzahwe nza hɛ mbe zeɗe nza.

²⁶Ndagwara kaka fama ghena hɛ, pa hɛ ɗema ghena ta ŋa ba'a zhɛrave nda wəmbə ke wəsə mahalegəa ŋa, pa hɛ mpəmte ka mɛ ŋkwa ta ŋa nyi kesəkwə hɛ kazhɛne geva kase sha gha. Kwele kwele bezemte ŋa ghena hɛ.

²⁷Vatse ndeke nda hɛ na ke ka ghema nyi kesahwe nda yaka ke hɛ. Ma mbe və nya nza yaka te hɛ, pa hɛ tsave ŋa lewela, gha nya pelɛ ghweme, pa na fate lewela ta nci. Mbe ɗe ta ŋa nya keɗema kakiɗi, pa na ghweneke mbeli nyi kembeleke hɛ mbe dzeve ta ka ghema ta nci.

²⁸Ama tewə ketemə kwa mbele hɛ va yaka ne, zhɛne hɛ kamene jaɗafa kwa kema ta ŋa, pa na pelakɛ hɛ zhɛkwa kadzembe dzeve ta ka ghema ta nci nyi kesahwe nda yaka ke hɛ. Zhɛne hɛ katsa ŋa lewela zhɛkwa, gha pelɛ nya ghweme, pa na fate lewela ta nci. Mbe ɗe ta ŋa, nahe na kembeleke hɛ kwele kwele zhigə.

²⁹Nahe na kegezave nda ke hɛ kezha zhɛne kahawe va wəsə mahalegəa ŋa, ama va kele ghəa nci ne, kese hɛ kave sleme yitea wəshi nyi gezeke na we. Nahe hɛ kemenete nda fete ke wəshi nyi gezeke na, ndagwara mpi yave nda hɛ ke mbeli keyɛ fete yitea hɛ. Pa hɛ ncɛte ghəa nci kaka fama ghena ba'a zhɛrete wənəa nci ntɛaŋe ntɛaŋe, pa hɛ nzanji kefa ŋa ghena.

³⁰Nahe na kesəwəhwe ghena yitea hɛ kava kwele kwele. Nahe na kendeke nda sefəa ŋa ke ka mɛ ŋkwa ta ŋa nyi kese kaheka hɛ te sləa ŋa, ama hɛreɗɛ hɛ ɗema fa. Vatse pelame hɛ na mbe dzeve ta mbeli nyi te kweci hɛɗi.

³¹Ndagwara mbe ɗe ta ŋa nya keɗema kakiɗi ne, kezamte sebe na te hɛ ba'a kewəfəyite hɛ na we, kwa nza na kaShala nya ganyɛa mehele ba'a nya kezhɛ heli.

³²Tsetsenya gɛ Shala ta n'yɛ, Shala nya wəba, nya berete ba'a nya ghazlənə mbeli ve, nya kekeseyi ghena ta jikə geva nya menete na le ghen'yɛ tsape tsape. Newevema ndiremi nya te ghen'yɛ, te ka meghea n'yɛ ba'a mbeli nyi te ghəa n'yɛ, te ka dzeghe Shala ta n'yɛ ba'a ka mɛ ŋkwa ta n'yɛ, te ka shihɛ n'yɛ ba'a te ghen'yɛ se mbe vəa ka meghea ka Asiri pa ɓeshi.

³³Ma gha ne, le hweŋkwa ta ŋkɛ menete n'yɛ wəshi nyi na, kwa nza ŋkɛ kaganda yamenete na, ama ghen'yɛ ne, le 'yaghwa mehele menete n'yɛ.

³⁴Ma ka meghea kɛfia n'yɛ le mbeli nyi te ghəa n'yɛ, ka dzeghe Shala ta n'yɛ le ka shihɛ n'yɛ ne, kese hɛ kahawe va wəsə mahalegəa ŋa we. Nahe hɛ kepeleyite se yitea ghena nyi gezeke nda na ke hɛ ba'a nyi fɛake hɛ nyi na yite.

³⁵Ma kwa nza hɛ mbe meleme ta nci, te tepe ta wəshi ganji nyi ndeke nda na ke hɛ kwele kwele, mbe hɛɗi nya bezle ba'a nya mene wəshi te, nya ndeke nda nya na ke hɛ ne, kese hɛ kamene ŋa slene ba'a kazhɛre nda wəmbə ke wəsə kwa ndiremia nci we.

³⁶Ɓəshi nya tse, wa nyi ghen'yɛ kaka mavashi! Te hɛɗi nya ndeke nda na ke ka shihɛ n'yɛ kezha zeme yɛ ya ta wəfe ba'a kezha fa deme te wəshi ganji nyi kese te wəve ne, kaka mavashi n'yɛ.

³⁷Wəshi ganji nyi mene hɛɗia shɛ kwele kwele ne, kaŋa ka meghea kɛfi nyi nza n'yɛ mbe dzeve ta nci va jaɗafa ta n'yɛ. Kala nya ɗe hɛ mene hɛ le ghen'yɛ ba'a le wəshi keseɗa ta n'yɛ. Ndiremi nya wəba ya te ghen'yɛ!