Read KapsikiDC Ɛstɛr 4 Bible Online

Ɛstɛr 4 - KapsikiDC bible

Ɛstɛr 4

¹Ma kwa fate wəsə nya kemenete geva Mardoshɛ ne, ŋkwahe ŋkɛ sha lekwesa ta ŋkɛ, pa hwepahwe wəsə hwa hwə ba'a behwekɛ ghəa ŋkɛ le pəsəɗə. Cape kadzeyi mbe meleme le lewela nya ndiremi.

²Hwa'a ŋkɛ kwa degha ta ghɛ meghe, pa ghereŋenyɛ, kwa nza ŋkɛ kaɗema wəndə nya kehwepahwe wəsə hwa hwə kadzeki ghɛ meghe.

³Mbe yayata sla ta hɛɗi nya ntsehe ghena ta meghea shɛ ne, nehwene nya wəba ya va ka Zhəwif pɛtɛ: kamene səwəmayɛ hɛ, kanehwene hɛ, kaŋgaɗe ghə hɛ, kahwepe wəshi hɛ hwa hwə ba'a kaɓelahe hɛ hwa pəsəɗə.

⁴Pa ka kwaterashia Ɛstɛr ba'a ka tsewe tsewe ta ŋkɛ se kagezete nda wəsə nya kemenete geva. Benake nde va ghazlənə, pa ghweneghe lekwesa kezha seɗe Mardoshɛ ba'a kezha pelemte wəsə nya hwa hwəa ŋkɛ ŋkɛ, ama kese kayɛ we.

⁵Tagha ne, pa Ɛstɛr hekakɛ Hatak, nde tsewe tsewe nya veyi meghe kamene nda slene, pa ghwenakɛ kalə sha Mardoshɛ kezha fa wəsə nya kemenete geva ba'a va wa nda menete ŋkɛ tsagha.

⁶Pa Hatak shave sha Mardoshɛ pelɛke te ŋwela ta ghɛ meghe.

⁷Pa Mardoshɛ gezete nda ghena nyi kemenete nda geva, pa le ghena ta cɛdɛ nya meɗeyi bete Haman hwa mcɛləa meghe kempəmte ka Zhəwif mbeli pɛtɛ.

⁸Pa ŋkɛ ndeke nda palepa kwetɛŋe kala nyi neheyi mbeli mbe Səze kezha mpə ka Zhəwif, yitea ncɛte nda ŋkɛ ke Ɛstɛr nya ketelə sha meghe ka'yɛwe zhɛ helia ŋkɛ ba'a kanehwene nda nehwene ke hwelefe ta nta.

⁹Pa Hatak se kagezete nda ghena ta Mardoshɛ ke Ɛstɛr.

¹⁰Pa Ɛstɛr gezete nda kezha lə ŋkɛ kazhɛne nda ke Mardoshɛ kala nya:

¹¹«Nahe ka mene slene ta meghe pɛtɛ le mbeli nyi mbe sla ta hɛɗia meghe keɗepe, ma yayata wəndə nya kedzeki te zlave ta ghɛ meghe, za keɗema male kaɗema meghe kehekakɛ ŋkɛ ne, nda mbeli kapeslekɛ kala nya kegezete geva. Ma nda nza wəndə kanza pələsə ne, nda meghe kahave nda geta meghea ŋkɛ kwa mze kwa tere tere ke wəndəa shɛ. Hɛ mahekenemsə ɓeshi kanakama mbeli kahekakɛ ɗa kalə sha meghe.»

¹²Pa mbeli gezete nda ghena ta Ɛstɛr ke Mardoshɛ.

¹³Ma ke Mardoshɛ shɛ: «Zəzəma na wərə na kambele ŋa kwetɛŋe ŋa va ɗa nya te ka Zhəwif, va nya nza na ki ghɛ meghe ma.

¹⁴Ma kentishɛ ŋa na le ghena nya ne, katekemave kemane ba'a mbele ka Zhəwif se te kwete ŋkwa, ama gha le mbelia ŋa ne, pɛtɛ tempə yɛ. Wa ɗepe wa? Nda kwete kezha wəsə nya kala nya veyi geva na kamale ta meghe wəka?»

¹⁵Ma ke Ɛstɛr sha Mardoshɛ ɓiyitsa:

¹⁶«Kwiɗi tsenete ka Zhəwif nyi mbe Səze pɛtɛ kamene səwəmayɛ te ghəa ɗa kahɛ mahekene kwa zemema wəsə ba'a kwa sama wəsə viɗi le veci. 'Ya perə, tsagha mene ghen'yɛ le ka kwaterashia ɗa. Ma tsagha, katelə 'ya sha meghe, ya 'ya nza katemte kala nya gezete wəsə mahalegə ne, kamtea shɛ 'ya.»

¹⁷Tagha gɛ, cape Mardoshɛ kalə kamene wəsə nya gezete nda Ɛstɛr kamene.