Read KapsikiDC Ɛstɛr 5 Bible Online

Ɛstɛr 5 - KapsikiDC bible

Ɛstɛr 5

¹Ma te kwa maheke ta hɛ ne, pa Ɛstɛr seɗete lekwesa meghe kadzeki te zlave ta ghɛ meghe tiɗiɗi le ŋkwa kenza ta meghe. Mentishɛ meghe pelɛ pasla ta ŋkɛ tiɗiɗi le mɛ kedzeki.

²Ma kwa nakɛ meghe meslete Ɛstɛr te zlave ne, pa zlaɓa yite, pa have nda geta meghea ŋkɛ nya kakwa mze kwa tere tere, nya yitea dzeve ve. Pa Ɛstɛr hendave nda geva kakwaɗakɛ ghəa geta shɛ.

³Ma ke meghe 'yɛwete ve: «Wa wəsə nya kemenete geva wa Ɛstɛr male ta ɗa? Wa yaɗe na wa? Wəsə nya ɗe na ne, kamene ŋa 'ya, ya bela ta meghea ɗa ŋkɛ ne, kave ŋa 'ya.»

⁴Ama ma ke Ɛstɛr zhɛnete: «Ma keɗe na ne, meghe ne, pa yɛ kase le Haman yitea wəsə kezeme nya temene ŋa 'ya ɓeshi.»

⁵Ma ke meghe: «Hekake ɗa mə Haman kahe kahe kase kezha wəsə kezeme nya takɛ Ɛstɛr!»

⁶Ma te keɗaŋe ta zeme wəsə ne, ma ke meghe sha Ɛstɛr: «Wa wəsə nya ɗe na ka'yɛwe va 'ya wa? Katemene ŋa 'ya. Kateve ŋa 'ya ya pa le bela ta hɛɗi meghea ɗa ŋkɛ.»

⁷Ma ke Ɛstɛr shɛ: «Ma wəsə nya 'yɛwe 'ya va gha ne, wəsə nya mawe 'ya:

⁸Ma kenza nde nahe 'ya kekemave zlaɓa ta ŋa meghe yawe, kenza nde nahe na keɗehwe kamene ɗa wəsə nya 'yɛwete 'ya va gha ne, se zhɛkwa le Haman yitea wəsə kezeme nya temene ŋa 'ya hendɛ. Tagha gɛ, katezhɛne ŋa 'yɛwe ta ŋa 'ya.»

⁹Ma vəa ŋkwa shɛ ne, le zlama ba'a fare fare shave Haman ki ghɛa male ta meghe. Ama kwa nakɛ Mardoshɛ ŋkɛ kwa degha ta meghe kaɗema Mardoshɛ kese kahawe ba'a kabare bare ve ne, mɓɛke Haman hwepete nda wənə kwele kwele.

¹⁰Ama pa zereghehwe tsagha, pa ŋkɛ lənyɛ sha ghɛ. Pa ghwenakɛ ŋkwa kaheka ka mcɛhɛnyɛ le male ta ŋkɛ Zɛrɛsh.

¹¹Pa ŋkɛ gezete nda zləvəa mcɛləa ŋkɛ ba'a ŋwale tezhilia ŋkɛ nyi kwele kwele ke hɛ. Pa ŋkɛ ɓelate nda ke hɛ tsema tsema ndeke nda kwele meghe ba'a nya veyi ŋkɛ te ghəa pɛtɛa ka mene slene nyi jama jama ba'a mbeli nyi te ghə nyi yite.

¹²Ma ke Haman zhɛkwa: «Tsagha shɛ zhɛkwa ɓeshi, 'ya kwetɛŋe ɗa yahekakɛ Ɛstɛr, male ta meghe yitea wəsə kezeme le meghe bake n'yɛ. Ɓiyitsa ne, nahe ŋkɛ kehekakɛ n'yɛ le meghe yitea wəsə kezeme hendɛ.

¹³Ama kawəsə gəmə newe 'ya pɛtɛ, kwa nza ŋkɛ mba 'ya kanewe newe Mardoshɛ nde Zhəwif nya kwa degha ta meghe mba mbe slene.»

¹⁴Tagha gɛ, ma ke Zɛrɛsh, male ta Haman ba'a pɛtɛa ka mcɛhɛnyɛ gezete nda: «Gezete kezha hite sheghwə mbeli gare mɛtre bakemsə mcɛfeghəmbe kadzeyitea ghweme. Ma hendɛ masheke ne, geze nda ke meghe kezha hwepe Mardoshɛ mbeli ŋalawe te. Tagha gɛ, wərə na kalə fare fare yitea wəsə kezeme zlaɓe le meghe.» Gwəfə ghəa Haman te ghena shɛ, pa gezete nda ke mbeli kala sheghwəa shɛ.