Read KapsikiDC Shave 12 Bible Online

Shave 12 - KapsikiDC bible

Shave 12

¹Ma ke Mahwətə sha yɛ Moyize le Aron mbe Ɛzhipte:

²«Tere nya nde tenza kakwa ghate ta tere va gheyɛ, gheŋkɛ yateɓela yɛ kakwa ghate ta tere mbe va.

³Ma pe yɛ sha hwelefe ta Israyɛl pɛtɛ: Ma te hɛ kwa meŋe ta tere nya ne, keseve mə təmə keɗema kwe keyita keyita keɗema keghɛ keghɛ.

⁴Ma keɗema mbeli nyi ki ghɛ kazehwe wəsə keseɗa zake ne, pa hɛ yipəte le ghɛa nde ghedəkwəa ŋkɛ, kala nza ta mbeli nyi ki. Kwa sebe ta ŋkɛ, pa hɛ keseve wəsə keseɗa kala nya nza yayata wəndə kazehwe.

⁵Ma game keɗema zhɛfa nya tekese yɛ ne, nya kemenete va kwetɛŋe, nya ɗema beze te.

⁶Pa yɛ keseyi pa te kwa meŋe wəfaɗeghəmbe ta hɛ mbe terea shɛ. Ma hetɛhwɛɗi ta vecia shɛ ne, katehene wəsə keseɗa nya kentave geva pɛtɛa hwelefe ta Israyɛl.

⁷Pa yɛ gəve mimia ŋkɛ kezha dase dzeme vare yɛ seɗa ta gelembe bake nci ba'a te zlaŋele ta ŋkɛ, ki yayata ghɛ nya tezeme geva wəsə keseɗa shɛ.

⁸Ma te viɗia shɛ ne, katepesa slia shɛ mbeli, katezeme mbeli le pɛaŋe nya ɗema tenjɛne hwe ba'a le sleke nyi ndɛalɛa ndɛalɛa.

⁹Katezeme slia shɛ yɛ teghweme keɗema keta ta we, ama deke nya pesakɛ yɛ zake le ghə, le jajɛghwa ba'a le wəshi nyi kwa hwə.

¹⁰Wəsə shɛ katetene yɛ kahendɛ we. Ma ketene ŋkɛ ne, pa yɛ teremte masheke.

¹¹Wa nya tsetse tezeme wəsə kezemea shɛ yɛ: le hətə hwa hwə, le tsahwa mbe seɗa ba'a le geta mbe dzeve. Kahe kahe tezeme yɛ. Tsetse tenza Pake nya kemene ɗa geva, 'ya Mahwətə.

¹²Ma heviɗi nya ne, katedzeyi 'ya mbe Ɛzhipte ba'a katempə tezhɛ ŋwale nyi te hɛɗi 'ya pɛtɛ, tsagha ŋa wəshi keseɗa. Ma kala nya ne, katemeha ghwə 'ya, 'ya Mahwətə te shala nyi mbe Ɛzhipte pɛtɛ.

¹³Ma dzeyi te ghɛ nyi nza yɛ ki ne, mimi nde tenza kawəsə keya ŋayɛ. Ma vəa ŋkwa nya tenakɛ mimi 'ya ne, katedzawa 'ya kənəa ghɛa ŋayɛ. Ma vəa ŋkwa nya teve ɗa 'ya te Ɛzhipte ne, katekekave ŋayɛ ndiremi nya te we.

¹⁴Keshi keshi ne, katezəzə vecia shɛ yɛ laka mene ɗa gəsəkə nya wəba, 'ya Mahwətə: kawəsə mahalegə tenza ŋkɛ sha gheyɛ.»

¹⁵Ma ke Mahwətə sha yɛ Moyize le Aron ɓiyitsa: «Kahɛ mberefaŋe ne, pɛaŋe nya ɗema tenjɛne hwe yatezeme yɛ. Ma te kwa ghate ta hɛ ne, kateza sebe yɛ te tenjɛne ki ghɛa ŋayɛ. Ma kenza nde pɛaŋe nya nza tenjɛne hwe yazeme kwete wəndə se te kwa ghate ta hɛ hwa'a te kwa mberefaŋe ta hɛ ne, kateŋkamte geva ŋkɛ shave hwa ka Israyɛl.

¹⁶Te kwa ghate ta hɛ ba'a te kwa mberefaŋe ne, tsene nya wəba yatemene ɗa yɛ. Ma te vecia shɛhɛ ne, slene shɛ katemene yɛ we, deke wəsə kezeme yateta nda yɛ ke ghəa ŋayɛ.

¹⁷Katemene gəsəkəa pɛaŋe nya ɗema tenjɛne hwe yɛ kezha zəzə veci nya fəakave hwelefe ta ŋayɛ nya 'ya shave mbe Ɛzhipte. Katemene gəsəkəa shɛ yɛ keshi keshi, kawəsə mahalegə ŋkɛ.

¹⁸Se te hɛ kwa meŋe wəfaɗeghəmbe mbe tere kwa ghate hetɛhwɛɗi hwa'a te hɛ kwa bakemsə kwetɛŋeghəmbe hetɛhwɛɗi ne, pɛaŋe nyi ɗema tenjɛne hwe yatezeme yɛ.

¹⁹Kahɛ mberefaŋe ne, kahi mbeli kantsate tenjɛne ki ghɛa ŋayɛ we. Ma kezehwe pɛaŋe nya nza tenjɛne hwe nde se se keɗema nde Israyɛl ne, kateŋkamte geva ŋkɛ shave mbe hwelefe ta Israyɛl.

²⁰Kahi yɛ kazeme wəsə nya nza tenjɛne hwe we. Te yayata ŋkwa nya nza yɛ ne, pɛaŋe nya ɗema tenjɛne hwe yatezeme yɛ.»

²¹Pa Moyize tsenete mbelia jama ta ka Israyɛl, ma ke sha hɛ: «Kwiɗi mə kalə kakese təmə keɗema kwe kezha mbeli nyi ki ghɛa ŋayɛ shɛ yɛ henekɛ kezha gəsəkə Pake.

²²Ɓeleve mə dzeve ta wəfe nya heka mbeli kaizope, selameyi mə hwa mimi nya kwa kwenə, shɛ yɛ dedaseyi dzeme vare yɛ seɗa ta gelembe ba'a te zlaŋele ta ŋkɛ. Kwa sebe ta ŋkɛ ne, yagha wəndəa ŋayɛ kateshave ki ghɛ pa va masheke.

²³Katedzeyi Mahwətə mbe Ɛzhipte kezha ɗa mbeli nyi mbe, ama vəa ŋkwa nya tenakɛ mimi ŋkɛ dzeme vare yɛ seɗa ta gelembe ba'a te zlaŋele ta ŋkɛ ne, katedzawa ŋkɛ kənəa ghɛa ŋayɛ.

²⁴Ma gheyɛ le hwelefe ta ŋayɛ ne, kateya ghena nya yɛ kaghala ghala.

²⁵Ma vəa ŋkwa nya tedzete hɛɗi nya teve ŋayɛ Mahwətə yɛ ne, katemene gəsəkəa shɛ yɛ.

²⁶‹Wa yancɛ wəsə nya mene nya yɛ wa?›, ke'yɛwete ŋwalea ŋayɛ va gheyɛ ne,

²⁷ma pe yɛ sha tezhɛne nda ke hɛ: ‹Melɛ nya kedzeghekɛ nda geva ke Mahwətə te vecia gəsəkə Pake. Ma vəa ŋkwa nya nza ka Israyɛl mbe Ɛzhipte ne, nahe Mahwətə keleke mte kadzehwa ka Ɛzhipte, ama pa dzawanyɛ kənəa ghɛa n'yɛ, kaɗema kese kaghereŋe, tsetse dzaŋelemte mbeli nyi ki ghɛa n'yɛ ŋkɛ.›» Tagha gɛ, gwəɗəŋə ka Israyɛl ntiŋə ghə mbe hɛɗi kwa kema ta Mahwətə

²⁸Ma kwa sebe ta ŋkɛ, cape hɛ kalə kamene wəshi nyi gezave nda Mahwətə ke yɛ Moyize le Aron.

²⁹Ma te tepe ta viɗi ne, mɛke Mahwətə mpəmte tezhɛ nyi mbe Ɛzhipte, se te tezhɛa Farawon, meghea ka Ɛzhipte nya ketedzeme pasla ta ŋkɛ hwa'a te tezhɛa mava nya kwa daŋgayɛ, tsagha yɛ tsəməa wəshi keseɗa.

³⁰Ma te viɗia shɛ ne, pelɛhetɛme Farawon, mbeli nyi yite ba'a ka Ɛzhipte pɛtɛ sate te ŋkwa, lewela nya wəba ya shɛ te hɛɗia Ɛzhipte, kwa nza ŋkɛ ne, ghɛ shɛ ya kwetɛŋe kaɗema wəndə kemte ki we.

³¹Pa Farawon hekake yɛ Moyize le Aron te tepe ta viɗi, ma ke sha hɛ: «Sate mə! Shave ŋayɛ mə hwa mbelia ɗa, gheyɛ ba'a ka Israyɛl. Kwiɗi mə kalə kadzeghe nda melɛ ke Mahwətə kala nya gezete yɛ.

³²Ŋka mə yɛ sla, timɛti ba'a kwia ŋayɛ kala nya gezete yɛ, slə mə teke. Kwa sebe ta ŋkɛ, səkwə mə Shala ta ŋayɛ kezha wəpi ɗa ŋkɛ.»

³³Ma zəzə ka Ɛzhipte ne, pɛtɛ tempə hɛ, vatse ŋka ka Israyɛl hɛ kaslə kahe kahe te hɛɗia nci.

³⁴Vatse kelete hə kwa hwaɗe hwaɗe ta nci ka Israyɛl tewə ŋkɛ kenaka kawepe. Pa hɛ peɗeyite lekwesa ta nci yitea wəshi nyi hwaɗe wəshi mbeli kwa hɛ kezha fə te bazla.

³⁵Nahe ka Israyɛl kemenete wəsə nya gezete nda Moyize ke hɛ: pa hɛ 'yɛwakɛ wəshi nyi le mze kwa tere tere, mze kwa tɛawetɛa ba'a yɛ lekwesa va ka Ɛzhipte.

³⁶Pa Mahwətə ndeke nda mehele kenewe ka Israyɛl kambeli ganji ke ka Ɛzhipte. Tsetse fəmte mcɛlə ka Israyɛl shave mbe Ɛzhipte.

³⁷Kwa sebe ta ŋkɛ, ntəŋə ka Israyɛl shave mbe meleme ta Ramsɛs kadzembe Səwkot, gare slibə gwəmsə ŋkwaŋe zhili, kaɗema mbeli keɓelate mi, ŋwale ba'a meha mehɛɗi.

³⁸Kwele kwele kweci hwelefefi nyi keslənji yitea hɛ. Kawəvəsəa wəshi keseɗa kwele kwele timɛti, kwi ba'a yɛ sla nyi va hɛ.

³⁹Pa hɛ zhɛne katakɛ hə kwa hwaɗe hwaɗe nya shave hɛ mbe Ɛzhipte le kaɗema tenjɛne hwe. Kwa nza ŋkɛ ne, kenaka kawepe nda ŋkamte hɛ mbeli shave mbe Ɛzhipte we, kenaka hɛ kamenete wəshi kezeme kwa hweŋkwa we.

⁴⁰Va gwəmsə wəfaɗe ba'a mahekenemsə menete ka Israyɛl mbe Ɛzhipte.

⁴¹Ma te kwa keɗaŋe ta va gwəmsə wəfaɗe ba'a mahekenemsə, veci nya ɗema nya mbeli kazaghəyite ne, pa mbelia Mahwətə shavenji kewəvəsə kewəvəsə mbe Ɛzhipte.

⁴²Hɛ kaya mbelia ŋkɛ Mahwətə te viɗia shɛ kwa nza ŋkɛ kafə hɛ shave mbe Ɛzhipte. Ma viɗia shɛ ne, nahe ŋkɛ keveyi geva tekeleke kaŋa Mahwətə, kaviɗi nya hi ka Israyɛl kanza le ntsə kaghala ghala.

⁴³Ma ke Mahwətə sha yɛ Moyize le Aron: «Wa nyi ghena nyi kegezete geva kezha gəsəkə Pake nyi: Yagha nde se se katezeme wəsə kezemea shɛ.

⁴⁴Wərə mava nya pake mbeli kazeme keslamte mɓɛta ŋkɛ.

⁴⁵Yagha mentiɓə keɗema nde mene slene cɛdɛ katezeme wəsə kezemea shɛ.

⁴⁶Dzeyi ki ghɛ tezeme slia shɛ mbeli. Kakele mbeli kajive te ŋwela we. Kampə 'yɛ'yɛa wəsə keseɗa shɛ mbeli we.

⁴⁷Pɛtɛa hwelefe ta Israyɛl katemene gəsəkəa shɛ.

⁴⁸Ma keɗe nde se se nya hwa gheyɛ kamene nda gəsəkə Pake ke Mahwətə ne, pa zhili ba'a ŋwale tezhili nyi ki ghɛa ŋkɛ slamte mɓɛta. Ma kwa sebe ta ŋkɛ ne, wərə ŋkɛ kamene gəsəkə kala ka Israyɛl. Yagha nde slamtema mɓɛta kazeme wəsə kezemea shɛ.

⁴⁹Kanya kwetɛŋe tenza wəsə mahalegə nya kezha ka Israyɛl ba'a kezha ka se se nyi hwa gheyɛ.»

⁵⁰Tserame ka Israyɛl menete wəshi nyi gezete nda Mahwətə ke yɛ Moyize le Aron.

⁵¹Ma te vecia shɛnyɛ ne, pa Mahwətə fəakave ka Israyɛl kewəvəsə kewəvəsə shave mbe Ɛzhipte.