Read KapsikiDC Shave 24 Bible Online

Shave 24 - KapsikiDC bible

Shave 24

¹Ma ke Mahwətə sha Moyize: «Same mə sha 'ya pelɛ ghweme le Aron, Nadab, Abihəw ba'a mbelia jama ta ka Israyɛl nyi mberefaŋemsə. Ma mba yɛ cakeɗake ne, kategwəɗəŋə yɛ ntiŋə ghə mbe hɛɗi.

²Ama deke gha nde tehende ɗa geva. Ma kweci mbeli ne, katehende ɗa geva hɛ we, ba'a ne, katedzeme ghweme mbeli pɛtɛ yitea gheyɛ we.»

³Cape Moyize kalə kaɓela nda ghena ta Mahwətə ke ka Israyɛl ba'a wəshi nyi gezeke ŋkɛ. Ma ke hɛ zhɛnete kanya kwetɛŋe: «Katemene slene n'yɛ le ghena nyi gezete Mahwətə.»

⁴Pɛtɛ Moyize rafete wəshi nyi gezete nda Mahwətə. Ma te hendɛ ta ŋkwa ne, pelɛhetɛme ŋkɛ sate te ŋkwa mba ŋkwa, pa pate reghwetɛ yitea seɗa ta ghweme ba'a mɓete yɛ gɛaŋa meŋe bakeghəmbe kaŋa hwelefefia Israyɛl nyi meŋe bakeghəmbe.

⁵Pa ghweneghe mempɛhwetɛti nyi hwa ka Israyɛl kalə kadzeghe nda melɛ kwa tere tere ba'a melɛ kejikə ghə le mcɛmcɛli ke Mahwətə.

⁶Pa shekeyi kwete bela ta mimi dzeyi kwa yɛ kwenə ba'a pa yisəate kwete bela te reghwetɛ.

⁷Kwa sebe ta ŋkɛ, laŋe ŋkɛ te palepa ta jikə geva, pa jaŋgate le berete te kema ta mbeli. Ma ke ka Israyɛl zhɛnete: «Katemene slene n'yɛ le ghena nyi gezeke Mahwətə pɛtɛ ba'a katehawe n'yɛ va hɛ.»

⁸Tagha ne, laŋe Moyize te mimi nya kwa kwenə, pa yisəaghe kənəa mbeli, ma ke: «Nya ya kamimia jikə geva nya menete Mahwətə le gheyɛ laka ghena nyi gezeke ŋayɛ ŋkɛ.»

⁹Ma kwa sebe ta ŋkɛ, tarame Moyize pelɛ ghweme le Aron, Nadab, Abihəw ba'a mbelia jama ta ka Israyɛl nyi mberefaŋemsə.

¹⁰Pa hɛ nakɛ Shala ta Israyɛl. Ma yitea seɗa ta ŋkɛ ne, kwete wəsə ya shɛ kala pelɛ kwa lɛa lɛa ghweme nya nza zləvə te, nya wɛŋe kala ŋkwa nya pelɛ ghweme.

¹¹Wəsə kwa ndiremi shɛ kamene nda Shala ke mbelia jama nyi hwa ka Israyɛl we. Wərə hɛ kanakɛ ŋkɛ, kwa sebe ta ŋkɛ, pa hɛ zehwe wəsə kezeme ba'a sahwe wəsə kesa.

¹²Ma ke Mahwətə sha Moyize: «Same sha 'ya pelɛ ghweme shɛ na nza ŋa teke. 'Ya kateve ŋa pelɛ nyi slapesla slapesla nyi rafate ghena nyi gezete 'ya kawəshi mahalegə te 'ya, kezha teke nda na ke ka Israyɛl.»

¹³Cape yɛ Moyize le nde mene slene ta ŋkɛ Zhozəwɛ, tarame Moyize pelɛ ghweme ta Shala.

¹⁴Ma nda tedzeme ŋkɛ ne, ma ke sha mbelia jama: «Neghe n'yɛ mə teke pa te və nya tezhɛne geva n'yɛ kase. Hwa gheyɛ nza yɛ Aron le Həwr. Ma kenza ghena kwelɛ gheyɛ kezha yipə ne, lə mə sha hɛ.»

¹⁵Ma vəa ŋkwa nya dzeme ghweme Moyize ne, pa ləmbə zhiɓəaghe geva kənəa ghwemea shɛ.

¹⁶Pa zləvəa Mahwətə nzanyɛ kənəa ghweme ta Sinay, pa ləmbə zhiɓəaghe geva kənə kahɛ ŋkwaŋe. Ma te kwa mberefaŋe ta hɛ ne, pa Mahwətə hekakɛ Moyize shave mbe tepe ta ləmbə.

¹⁷Tagha gɛ, pa zləvəa Mahwətə ncɛte nda geva ke ka Israyɛl kala ghwə nya ketse kwa ghəa ghweme.

¹⁸Shilimə Moyize mbe ləmbəa shɛ ba'a tarame ŋkɛ pelɛ ghweme. Pa Moyize nzanyɛ pelɛ ghwemea shɛ kaveci wəfaɗemsə ba'a kaviɗi wəfaɗemsə.