Read KapsikiDC Shave 27 Bible Online

Shave 27 - KapsikiDC bible

Shave 27

¹Ma kezha dzeghe melɛ ne, katemene reghwetɛ mbeli yitea sheghwəa gwevɛre. Yipə yipə tenza yɛ biya ta ŋkɛ le bezlea ŋkɛ, kamɛtre bake ba'a kwete gasle yite tenza ŋkɛ. Kamɛtre kwetɛŋe ba'a kwete gasle yite tenza dzeme ghweme ta ŋkɛ.

²Katemene yɛ tereme mbeli te yɛ megwekwe ta ŋkɛ nyi wəfaɗe. Kanya kwetɛŋe tenza tereme nyighɛ le. Katefi mbeli le mze kwa ghwə ghwə.

³Katevɛsə wəshi kemene slene te reghwetɛ mbeli le mze kwa ghwə ghwə: wəshi kefə pəsəɗə, yɛ pɛlə, yɛ kwenə kesheke mimi, wəshi kezhɛre sli te ghwə ba'a wəshi ketere 'wərdə.

⁴Katevɛsə kwete wəsə kala lɛ kepesa sli mbeli le mze kwa ghwə ghwə ba'a takase nyi wəfaɗe te yɛ megwekwe ta lɛa shɛ le mze kwa ghwə ghwə.

⁵Katemene wəsə nya kala lɛ kepesa slia shɛ mbeli dzeyi yitea reghwetɛ, ghala slə nde te hɛɗi hwa'a mbe tepe ta ŋkɛ.

⁶Katefeɗe geta mbeli bake yitea sheghwəa gwevɛre ba'a katefi hɛ mbeli le mze kwa ghwə ghwə.

⁷Kateha hɛ mbeli mbe takase nyi dzeyi vare yɛ bela ta reghwetɛ nyi bake kezha kele te.

⁸Ma reghwetɛ nya le sheghwə nyi slapesla slapesla shɛhɛ ne, ghwəarara tenza ŋkwa nya kwa hwəa ŋkɛ. Kala nya ncɛte ŋa 'ya teke pelɛ ghweme temene mbeli.

⁹Ma dzeyi yitea ŋkwa nya keveyi geva tekeleke ne, katesla ŋwela mbeli. Ma ŋwela shɛ ne, zlave nyi tsate mbeli le pawa nyi berete berete ka tenza kaghala ta ŋkɛ. Ma laka bela kwa zeme ne, mɛtre mcɛfemsə tenza biya ta zlavea shɛ.

¹⁰Katendɛaŋe hɛ mbeli le yɛ ndɛaŋe ba'a yɛ geta mze kwa tɛawetɛa te selə nyi le mze kwa ghwə ghwə bakemsə. Te wəshi kentare selə nyi bakemsə le mze kwa ghwə ghwə tentare seləa shɛhɛ mbeli.

¹¹Ma laka bela kwa gwela ne, mɛtre mcɛfemsə tenza biya ta zlavea shɛ ba'a tsagha shɛ tendɛndɛaŋe hɛ mbeli.

¹²Ma laka ŋkwa kepəkwə ta veci ne, mɛtre bakemsə mcɛfeghəmbe tenza bezlea zlavea shɛ, laka bezlea ŋwela shɛ. Te selə meŋe nyi mentare te wəshi kentare selə meŋe tendɛndɛaŋe mbeli.

¹³Ma laka ŋkwa kedzembe nya laka ŋkwa kesame ta veci ne, mɛtre bakemsə mcɛfeghəmbe tenza bezlea ŋkɛ.

¹⁴Ma laka kwete bela ta ŋkwa kedzembe ne, mɛtre mberefaŋe ba'a kwete gasle yite tenza zlave, tsagha selə mahekene ba'a wəshi kentare selə mahekene.

¹⁵Ma laka kwete ɓiyitsa ne, mɛtre mberefaŋe ba'a kwete gasle yite tenza zlave, tsagha selə mahekene ba'a wəshi kentare selə mahekene.

¹⁶Ma mɛa ŋkwa kedzeki ta ŋwela shɛ ne, katehwepe mayafe nya kamɛtre meŋe mbeli, mayafe nya tsate ka tsa zlave le pawa nyi berete berete, welaɗe le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Katehwepe mbeli te selə wəfaɗe nyi ntareyi nyi mbeli te wəshi kentare selə wəfaɗe.

¹⁷Geta nyi le mze kwa tɛawetɛa ka tejikə pɛtɛa selə nyi yitea ŋwela nyagha, le mze kwa tɛawetɛa tenza yɛ ndɛaŋea nci ba'a le mze kwa ghwə ghwə tenza wəshi kentare hɛ.

¹⁸Ma ŋwela nya yitea shɛ ne, mɛtre mcɛfemsə tenza biya ta ŋkɛ ba'a mɛtre bakemsə mcɛfeghəmbe tenza bezlea ŋkɛ. Kamɛtre bake ba'a kwete gasle yite tenza dzeme ghweme ta zlave pawa. Kamze kwa ghwə ghwə tenza wəshi kentare seləa shɛhɛ.

¹⁹Ma pɛtɛa wəshi kemene slene nyi mbe cɛ lekwesa shɛ, pɛtɛa wəshi nyi kebaŋeyi geva kwa hɛɗi dzeyi yitea ŋkwa nya keveyi geva tekeleke ba'a dzeyi yitea ŋwela nya yite ne, le mze kwa ghwə ghwə tenza hɛ.

²⁰Gha Moyize, kategeze nda na ke ka Israyɛl kagə ŋa n'yi ganyɛa bekele, yitea nza ghwə kwa paterela hetɛhwɛɗi hetɛhwɛɗi.

²¹Kateve wəsə kentare yɛ paterela yɛ Aron le ŋwalea ŋkɛ mbe cɛ lekwesa kebegeme geva, kwa kema ta mayafe nya kewəfərəakɛ səndəkwəa jikə geva. Hwencɛke ncɛke tetse ghwə kwa yɛ paterela kwa kema ta ɗa, 'ya Mahwətə. Kawəsə mahalegə nya keɗema kazhɛre tenza ŋkɛ kezha ka Israyɛl keshi keshi.