Read KapsikiDC Shave 34 Bible Online

Shave 34 - KapsikiDC bible

Shave 34

¹Ma ke Mahwətə sha Moyize: «Tsehete pelɛ nyi slapesla slapesla bake, kala ka ghate nyi mpəmte na. Katerafe ghena nyi kese te nyi ghate na kampəmte 'ya te hɛ.

²Hite geva kezha hendɛ masheke. Ma masheke masheke ne, katedzeme ghəa ghweme ta Sinay na, pelɛagha teneghe ɗa na.

³Mba wəndə kebeghe ŋa! Yagha mbeli kanakɛ kwete wəndə pelɛ ghwemea shɛ. Yagha wəsə keseɗa, təmə, kwe keɗema sla kanza terasle yitea ghwemea shɛ!»

⁴Pa Moyize tsehete pelɛ nyi slapesla slapesla bake kala ka ghate. Ma masheke masheke te hendɛ ta ŋkwa ne, cape ŋkɛ kadzeme ghweme ta Sinay kala nya gezete nda Mahwətə. Pa fəghe pelɛ nyi slapesla slapesla nyi bake nyi kadzeme.

⁵Pa Mahwətə sawa mbe ləmbə ba'a ghereŋenyɛ tagha dzeme vare. Ntake Moyize kaheka sləa ŋkɛ “kaMahwətə”.

⁶Kwa sebe ta ŋkɛ, pa dzeyinyɛ kwa kema ta Moyize, ma ke gezete le berete: «'Ya ya kaMahwətə! 'Ya ya kaShala nya kezhɛ heli, nya ndeɗea mehele, nya kesəwə ghena, nya keɗe ŋkwa ba'a nya kaganda.

⁷Kamene nda ganyɛ 'ya ke mbeli pa te ka shihɛ slibə, kazereghe fete, fama ghena ba'a jaɗafa 'ya. Ama kave nde beze ghena 'ya kawəndə nya ɗema fete ve we, kameha ghwə 'ya te wəndə nya kemenete jaɗafa, te ŋwalea ŋkɛ ba'a te ka shihɛnyɛ pa te kwa maheke keɗema kwa wəfaɗe ta shi.»

⁸Taghanyɛ ne, gwəɗəŋə Moyize ntiŋə ghə mbe hɛɗi.

⁹Ma ke sha lewela: «Mahwətə yawe, ma kwa nza ŋkɛ nahe na kendeke ɗa zlaɓa ta ŋa ne, begheghe n'yɛ. Nahe 'ya keɗepe megela kaka ntɛaŋentɛa ghə mbeli nyi, ama kelemte jaɗafa ta n'yɛ ba'a fete ta n'yɛ te wənə, ba'a ne, newe n'yɛ kambelia ŋa.»

¹⁰Ma ke Mahwətə sha Moyize: «'Ya katemene jikə geva le gheyɛ. Ma kwa kema ta hwelefefia ŋa pɛtɛ ne, 'ya katemene wəshi meŋele nyi ghama mbeli kanakɛ ya tema tema te hɛɗi lema, ya mbe nyama nyama ta hwelefe. Ma ka Israyɛl nyi kentəsləte ŋa nyi ne, katenewe hɛ tsema tsema temene wəshi meŋele 'ya laka gha.

¹¹Fave ghena nya geze ŋayɛ nya 'ya ɓeshi megela. 'Ya kateŋkamte ka Amor, ka Kanan, ka Hɛt, ka Pɛrɛs, ka Hava ba'a ka Zhɛbəs te kema ta ŋayɛ.

¹²Yate mə ghəa ŋayɛ megela va mene jikə geva le mbeli nyi te hɛɗi nya dzeme nya yɛ. Kakeleŋa tenza nde yitea gheyɛ.

¹³Ama kateŋzla reghwetɛa nci yɛ, katelase gɛaŋa nyi mɓete hɛ yɛ ba'a katetsasle seləa nci nyi keveyi geva tekeleke yɛ.

¹⁴Gwəɗəŋəma yɛ kwa kema ta kwete shala ma, kwa nza ŋkɛ ma 'ya Mahwətə ne, ‹Nde njiɗi ghena› sləa ɗa, 'ya kwetɛŋe ɗa nde ɗe kanza kaShala ta ŋayɛ.

¹⁵Menema jikə geva yɛ le mbeli nyi te hɛɗi nya ma. Ma vəa ŋkwa nya tehawe hɛ va wəshi nyi zhɛrete hɛ kashala ba'a nya tedzeghe nda melɛ hɛ ke hɛ ne, wərə hɛ kahekakɛ ŋayɛ ba'a wərə yɛ kazehwe wəshi nyi dzeghekɛ melɛ hɛ le.

¹⁶Ma kewəmave nda mi yɛ hwa hɛ ke ŋwale tezhilia ŋayɛ ne, katehawe mia shɛhɛ va shala ta nci ba'a kateghwete ŋwale tezhilia ŋayɛ hɛ kahawe va shala ta ncia shɛhɛ.

¹⁷Vɛsəma kweci shala yɛ le mze ma.

¹⁸Katemene gəsəkəa pɛaŋe nya ɗema tenjɛne hwe yɛ. Ma kahɛ mberefaŋe mbe terea Abib ne, pɛaŋe nya ɗema tenjɛne hwe yazeme yɛ kala nya gezete 'ya. Kwa nza ŋkɛ ne, mbe terea shɛ shave yɛ mbe Ɛzhipte.

¹⁹Kaŋa ɗa tenza pɛtɛa ka tezhɛa ŋwale, tsagha tsəməa ŋwale tezhilia wəshi keseɗa. Katedzeghe ɗa melɛ yɛ le tsəməa leve ta sla, zhɛgwəa təmə keɗema ŋa kwe nyi kaŋezhili.

²⁰Ama kenza ŋkɛ katsəməa leve ta kwara nya kaŋeza ne, katembeɗe yɛ te game keɗema zhɛfa, keɗema ne, katepesle yɛ laka ŋkwape tsaraka te. Ma tezhɛa ŋwale nyi mbe hwelefe ta ŋayɛ ne, katembeɗe hɛ yɛ. Kateshɛ yɛ se kadzembe ŋkwa nya keveyi ɗa geva tekeleke pala pala we.

²¹Hɛ ŋkwaŋe ya va gheyɛ kamene slene mbe shikwə, ama kwa mberefaŋe ta hɛ ne, katekwaɗe slene yɛ ya mbe vəa wəza keɗema ŋa mene wəshi te wəve we.

²²Katemene gəsəkəa Pantekote yɛ vəa ŋkwa nya tsa tsəməa ha yɛ se te wəve ba'a katemene gəsəkəa dərəzlə ghwane yɛ mbe kwa keɗaŋe ta və mbe va.

²³Keva keva ne, katese pɛtɛa zhili kadzawa kema ta ɗa, 'ya Shala Mahwətə ta ka Israyɛl mahekene zhigə.

²⁴Kateŋka kweci hwelefefi 'ya kezha mtsehe hɛɗia ŋayɛ. Wəndə shɛ katedzeghe kakele hɛɗia ŋayɛ hwa gəsəkə nyi mahekene nyi se nyi yɛ kadzawa kema ta ɗa, 'ya Shala Mahwətə ta ŋayɛ we.

²⁵Ma vəa ŋkwa nya dzeghe ɗa melɛ yɛ le wəshi keseɗa ne, fə ɗa ma yɛ pɛaŋe nyi nza tenjɛne hwe yɛ kase ma. Kave slia wəsə keseɗa nya dzeghekɛ geva melɛ kwa tɛhwɛɗi le mbeli kezha gəsəkə Pake kamasheke we.

²⁶Katefə tsəməa wəshia ŋayɛ nyi kese te wəve yɛ kadzembe ghɛa Shala Mahwətə ta ŋayɛ. Mba yɛ keta zhɛgwəa kwe hwa ŋ'wa ta meghekɛ.»

²⁷Ma ke Mahwətə sha Moyize zhɛkwa: «Rafete wəshi mahalegə nyi, kwa nza ŋkɛ ghenci ya kashihəa jikə geva nya menete 'ya le gha ba'a le ka Israyɛl.»

²⁸Pa Moyize nzanyɛ pelɛagha yitea Mahwətə kaveci wəfaɗemsə ba'a kaviɗi wəfaɗemsə, kaɗema kezehwe wəsə ba'a kesahwe wəsə. Pa rafate wəshi mahalegə meŋe nyi kashihəa jikə geva te pelɛ nyi slapesla slapesla.

²⁹Tewətelɛwe Moyize zhɛnakawa geva sawa pelɛ ghweme ta Sinay le pelɛ nyi slapesla slapesla bake nyi nza wəshi mahalegə te yitea dzeve. Kaɓele ŋkwa nya kwa kema ta ŋkɛ va nya se hɛ kageze ghena le Mahwətə, ama keɗepete Moyize we.

³⁰Ma kwa nakɛ ɓele ta kema ta ŋkɛ yɛ Aron le ka Israyɛl ne, pa ghazlənə zhɛte nda ke hɛ kehende nda geva.

³¹Pa Moyize hekakɛ hɛ. Tagha ne, pa yɛ Aron le mbeli nyi te ghəa mbeli se shɛ, pa Moyize gezete nda ghena ke hɛ.

³²Kwa sebe ta ŋkɛ ne, pa pɛtɛa ka Israyɛl hendeke nda geva, pa ɓelate nda ghena nyi gezete nda Shala pelɛ ghweme ta Sinay ke hɛ.

³³Ma kwa kiɗimte geze nda ghena Moyize ke hɛ ne, pa dəpəyi wəsə kwa kema ta ŋkɛ.

³⁴Ma yayata və nya lə ŋkɛ kadzawa kema ta Mahwətə kezha geze ghena le se mɛa vəa shɛ ne, pa kelemte wəsə nya kwa kema ta ŋkɛ. Ma keshave ŋkɛ kageze nda ghena nyi kemave ŋkɛ ke ka Israyɛl ne,

³⁵kanewe newe ɓele ta kema ta Moyize ka Israyɛl. Kwa sebe ta ŋkɛ ne, pa Moyize dəpəyi wəsə kwa kema ta ŋkɛ pa te və nya tezhɛne geva ŋkɛ kalə kageze ghena le Mahwətə.