Read KapsikiDC Shave 35 Bible Online

Shave 35 - KapsikiDC bible

Shave 35

¹Pa Moyize tsenete pɛtɛa ka Israyɛl, ma ke sha hɛ: «Wa nyi wəshi nyi geze Mahwətə kamene nyi:

²Hɛ ŋkwaŋe ya shɛ mbe shikwə kezha mene slene. Ama kwa mberefaŋe ta hɛ ne, veci nya keveyi geva tekeleke ŋkɛ, veci kezhɛne mpi kezha Mahwətə. Ma yayata wəndə nya ketemene slene te vecia shɛ ne, katepesle ŋkɛ mbeli.

³Katemeha ghwə yɛ kwa reghwetɛ te veci kezhɛne mpi te yayata ŋkwa nya nza yɛ we.»

⁴Ma ke Moyize sha pɛtɛa ka Israyɛl: «Wa nya ghena nya geze Mahwətə nya:

⁵Tsehe mə wəshi kwelɛ ghəa ŋayɛ kezha Mahwətə. Ma pɛtɛa mbeli nyi ketemene le wənə kwetɛŋe ne, katefə nda mama ta wəshi hɛ kase ke Mahwətə: mze kwa tere tere, mze kwa tɛawetɛa, mze kwa ghwə ghwə,

⁶shintia təmə nyi kefi fi le yirə kwa ndereme ndereme, kwa gheme keɗema kwa ghɛmɛ, pawa nyi slɛahe slɛahe, shintia kwe,

⁷hweta ta gamea lɛmə nyi kefi fi le yirə kwa gheme, hweta nyi berete berete, sheghwəa gwevɛre,

⁸n'yi kemeha ghwə kwa paterela, 'wərdə kemene hwa n'yi keve ŋkwa tekeleke ba'a 'wərdə ketere,

⁹pelɛ nyi ghemea ghemea ba'a kweci pelɛ nyi nza zləvə te kezha lekwesa nya kənəa rewebe ba'a wəsə nya slape kwa hate ta wəndə kwelea ka dzeghe Shala.

¹⁰Pɛtɛa ka caŋa caŋa nyi hwa gheyɛ katetsene geva kezha mene wəsə nya gezete Mahwətə:

¹¹ŋkwa nya keveyi geva tekeleke le cɛ lekwesa ba'a zlave nyi kənə, ndɛaŋe nyi te, sheghwəa ŋkɛ nyi slapesla slapesla, sheghwə nyi jive te, yɛ seləa ŋkɛ le wəshi kentare te,

¹²səndəkwəa jikə geva, yɛ geta ta ŋkɛ, wəsə keŋzle ta ŋkɛ, mayafe kenehe ŋkwa,

¹³tabele, yɛ geta ta ŋkɛ, wəshi kemene slene te pɛtɛ ba'a ɗafa nyi fəke mbeli,

¹⁴wəsə kentare yɛ paterela, wəshi nyi te, yɛ paterela ba'a n'yi kegə kwa paterela,

¹⁵reghwetɛ ketere 'wərdə le yɛ geta ta ŋkɛ, n'yi keve ŋkwa tekeleke, 'wərdə ketere, mayafe nya mɛa ŋkwa kedzembe ŋkwa nya keveyi geva tekeleke,

¹⁶reghwetɛ kedzeghe melɛ le wəsəa ŋkɛ kala lɛ kepesa sli nya le mze kwa ghwə ghwə, yɛ geta ta ŋkɛ ba'a wəshi kemene slene te. Kwenə nya wəba ba'a wəsə nya ntare mbeli te,

¹⁷zlave nyi dzeyi yitea ŋwela, yɛ seləa ŋkɛ ba'a wəshi kentare hɛ, mayafe nya mɛa ŋkwa kedzete ŋwela shɛ,

¹⁸sheghwə nyi baŋeyi mbeli kwa hɛɗi dzeyi yitea cɛ lekwesa ba'a dzeyi yitea ŋkwa nya dzeyi yitea ŋwela nya yite ba'a zewe ta nci,

¹⁹yɛ lekwesa kemene slene mbe ŋkwa nya keveyi geva tekeleke, yɛ lekwesa nyi keveyi geva tekeleke kaŋa yɛ Aron le ŋwalea ŋkɛ mbe slene ta nci.»

²⁰Pa ka Israyɛl slənji yitea Moyize.

²¹Kwa sebe ta ŋkɛ ne, pɛtɛa mbeli nyi kendeke nda ghəa nci ba'a mehele ta nci fəke nda wəshi ke Mahwətə kezha slene ta cɛ lekwesa kebegeme geva, kezha slene nyi mene mbeli mbe ba'a kezha tsa lekwesa nyi keveyi geva tekeleke.

²²Pa yɛ zhili le mi nyi kendeke nda ghəa nci fəke mama ta wəshi kepesa geva nyi le mze kwa tere tere: wəshi nyi mbe sleme, yɛ takase, yɛ ŋgwedɛba keɗema livə nyi kwa welɛ, pa hɛ fəave nda hɛ ke Mahwətə kala nya ve nda mze kwa tere tere mbeli.

²³Pa mbeli nyi nza shintia təmə nyi kefi fi le yirə kwa ndereme ndereme, kwa gheme keɗema kwa ghɛmɛ, pawa nyi slɛahe slɛahe, shintia kwe, hweta ta gamea lɛmə nyi kefi fi le yirə kwa ghɛmɛ keɗema hweta nyi berete berete fəke hɛ kase.

²⁴Pa mbeli nyi kebeteyi mze kwa tɛawetɛa keɗema mze kwa ghwə ghwə tekeleke kezha Mahwətə fəke hɛ kase. Pa mbeli nyi nza sheghwəa gwevɛre va hɛ kezha mene slenea shɛ fəke hɛ.

²⁵Pa mi nyi caŋa caŋa fəke pawa nyi slɛahe slɛahe ba'a shintia təmə nyi kefi fi le yirə kwa ndereme ndereme, kwa gheme keɗema kwa ghɛmɛ nyi lemete hɛ le dzeve ta nci.

²⁶Pa kweci mi nyi caŋa caŋa nyi kendeke nda ghəa nci lemete shintia kwe.

²⁷Pa mbeli nyi te ghəa hwelefe fəke pelɛ nyi ghemea ghemea ba'a kweci pelɛ nyi nza zləvə te hɛ kezha lekwesa nya kənəa rewebe ba'a wəsə nya slape kwa hate ta wəndə kwelea ka dzeghe Shala,

²⁸tsagha yɛ 'wərdə ba'a n'yi kezha yɛ paterela, kezha ve ŋkwa tekeleke ba'a kezha 'wərdə ketere.

²⁹Pɛtɛa ka Israyɛl nyi kendeke nda ghəa nci, zhili keɗema mi, fəke nda wəshi le ɗe ta nci ke Mahwətə, kezha mene slene nya gezave nda Mahwətə ke Moyize.

³⁰Ma ke Moyize sha ka Israyɛl: «Newema mə tsema tsema ntave Bɛsalɛl, wəzege ta Əwri ba'a shia Həwr, kwa yita ta Zhəwda Mahwətə gi!

³¹Nahe ŋkɛ keviɗikɛ le sefəa ŋkɛ kezha ve nda caŋa ba'a ɗepe wəshi. Nahe Bɛsalɛl keɗepe mene mama ta slene:

³²nahe keɗepe nca wəshi ganji, vɛsə mze kwa tere tere, mze kwa tɛawetɛa ba'a mze kwa ghwə ghwə,

³³tsehe pelɛ nyi nza zləvə te hɛ ba'a ŋa ŋkwa le hɛ, nahe keɗepe feɗe sheghwə. Geze ta ŋkɛ ne, nahe keɗepe mene mama ta wəshi.

³⁴Nahe Mahwətə kendeke nda ntsehwele keteke nda slenea shɛhɛ ke mbeli kala ŋa Oholiyab, wəzege ta Ahisamak, kwa yita ta Dan.

³⁵Nahe kendeke nda caŋa ke hɛ kezha ɗepe mene slene ta tsehe pelɛ nyi nza zləvə te hɛ, rafe pa ta wəshi, tsa wəshi le shintia təmə nyi kefi fi le yirə kwa ndereme ndereme, kwa gheme keɗema kwa ghɛmɛ, tsa wəshi le pawa nyi slɛahe slɛahe ba'a tsa mama ta wəshi. Wərə hɛ kamenete yayata slene ta nde ɗepe mene wəshi keɗema ŋa nde ɗepe nca wəshi.