Read KapsikiDC Shave 40 Bible Online

Shave 40 - KapsikiDC bible

Shave 40

¹Ma ke Mahwətə sha Moyize:

²«Ma te kwa ghate ta hɛ mbe tere kwa ghate ne, katemɓe cɛ lekwesa kebegeme geva, ŋkwa nya keveyi geva tekeleke na.

³Kateve səndəkwəa jikə geva na kwetere wəmbəa mayafe kenehe ŋkwa kezha ɗema mbeli kanakɛ.

⁴Katekele tabele na kase ba'a katebete ɗafa nyi fəke mbeli kawəshi gəmə na te. Katekele wəsə kentare yɛ paterela kase ba'a katendə ghwə na te yɛ paterela.

⁵Kateve reghwetɛ ketere 'wərdə nya le mze kwa tere tere na kwa kema ta səndəkwəa jikə geva. Katehwepe mayafe na mɛa ŋkwa kedzembe cɛ lekwesa nya keveyi geva tekeleke.

⁶Kateve reghwetɛ kedzeghe melɛ na mbe kema ta ŋkwa kedzembe cɛ lekwesa kebegeme geva, ŋkwa nya keveyi geva tekeleke.

⁷Kateve kwenə nya wəba na kwelɛ yɛ cɛ lekwesa kebegeme geva le reghwetɛ, katepɛre na le yɛmə.

⁸Katehwepe zlave na dzeyi yitea ŋwela nya yitea ŋkwa nya keveyi geva tekeleke, katehwepe mayafe na mɛa ŋkwa kedzeki ŋwela shɛ.

⁹Katekele n'yi keve ŋkwa tekeleke na ba'a katesheke na kənəa yɛ ŋkwa nya keveyi geva tekeleke le wəshi nyi mbe. Ma tsagha ne, kateve hɛ na tekeleke le wəshi nyi mbe. Ma se te vəa shɛ ne, kaganda tenza nde kaŋa ɗa.

¹⁰Katesheke n'yi na perə kənəa yɛ reghwetɛ kedzeghe melɛ le wəshia ŋkɛ. Tsagha ne, kateve ŋkɛ na tekeleke, kezha nza ŋkɛ deke kezha slene ta ɗa.

¹¹Le n'yia shɛ ɓiyitsa ne, kateve yɛ kwenə le wəsə kentare na tekeleke.

¹²Katefə yɛ Aron le ŋwalea ŋkɛ na kase kadzemɛa cɛ lekwesa kebegeme geva ba'a katepɛ hɛ na le yɛmə.

¹³Kwa sebe ta ŋkɛ ne, kateseɗe nda lekwesa nyi keveyi geva tekeleke na ke Aron, ba'a ne, katesheke n'yi na kənə kezha ve ŋkɛ tekeleke kande dzeghe ɗa melɛ.

¹⁴Kategeze nda na ke ŋwalea Aron kahende geva kase ba'a kateseɗe nda lekwesa ta nci na ke hɛ.

¹⁵Kateve hɛ na tekeleke le n'yi, kala yiteyɛa nci kezha dzeghe ɗa melɛ hɛ. Ma laka n'yi nyagha ne, katenza hɛ le hwelefe ta nci kambeli nyi keveyi geva tekeleke kezha dzeghe ɗa melɛ kaghala ghala.»

¹⁶Tserame Moyize yipəyi ghena nyi gezave nda Mahwətə kwa.

¹⁷Ma te kwa ghate ta hɛ mbe kwa ghate ta tere, va kwetɛŋe kwa sebe ta slə mbe Ɛzhipte ne, pa mbeli menete cɛ lekwesa nya keveyi geva tekeleke.

¹⁸Pa Moyize mɓete cɛ lekwesa: pa mbeli veveyi wəshi kentare sheghwə, sheghwə nyi slapesla slapesla ba'a nyi jive te, pa mbeli ntentareyi yɛ selə.

¹⁹Pa mbeli pelakeyi zlave kənəa ŋkwa nya keveyi geva tekeleke, kwa sebe ta ŋkɛ, pa mbeli pelakeyi kwa bake ta zlave kənə kala nya gezave nda Mahwətə ke Moyize.

²⁰Pa Moyize fəte pelɛ nyi slapesla slapesla ba'a beteyi hɛ kwa səndəkwə. Pa mbeli hehame geta mbe səndəkwə ba'a ŋzlame wəsə keŋzle ta ŋkɛ mɛ.

²¹Pa mbeli veyi mbe ŋkwa nya keveyi geva tekeleke, kwa sebe ta ŋkɛ, pa mbeli hwepeyi mayafe kenehe ŋkwa kezha wəfərə səndəkwəa jikə geva, kala nya gezave nda Mahwətə ke Moyize.

²²Pa mbeli veyi tabele kebete ɗafa mbe cɛ lekwesa kebegeme geva, laka bela kwa gwela, mbe kema ta mayafe kenehe ŋkwa.

²³Pa mbeli tseɓate ɗafa nyi fəke nda mbeli kawəshi gəmə ke Mahwətə te, kala nya gezave nda Mahwətə ke Moyize.

²⁴Pa mbeli veyi wəsə kentare yɛ paterela mbe cɛ lekwesa, laka bela kwa zeme, kwa kema ta tabele.

²⁵Pa mbeli ndendəyi ghwə te yɛ paterela, kwa kema ta Mahwətə, kala nya gezave nda Mahwətə ke Moyize.

²⁶Pa mbeli veyi reghwetɛ nya le mze kwa tere tere mbe cɛ lekwesa, kwa kema ta mayafe kenehe ŋkwa.

²⁷Pa mbeli terekɛ 'wərdə te, kala nya gezave nda Mahwətə ke Moyize.

²⁸Pa mbeli hwepeyi mayafe mɛa ŋkwa kedzembe cɛ lekwesa nya keveyi geva tekeleke.

²⁹Pa mbeli veyi reghwetɛ kedzeghe melɛ takwa yitea ŋkwa kedzembe cɛ lekwesa. Pa dzeghekɛ melɛ kwa tere ba'a terekɛ wəshi gəmə nyi kese te wəve te, kala nya gezave nda Mahwətə ke Moyize.

³⁰Pa mbeli veyi kwenə nya wəba kwelɛ yɛ cɛ lekwesa le reghwetɛ, pa mbeli pɛrekɛ le yɛmə kezha pɛ yɛ dzeve le seɗa.

³¹Moyize, Aron ba'a ŋwalea ŋkɛ ka pɛ yɛ dzeve le seɗa le yɛməa shɛ.

³²Ma vəa ŋkwa nya dzembe cɛ lekwesa kebegeme geva ba'a nya hende nda geva hɛ ke reghwetɛ ne, pa hɛ pɛmte yɛ dzeve le seɗa, kala nya gezave nda Mahwətə ke Moyize.

³³Pa Moyize hwepeyi zlave dzeyi yitea ŋwela nya yitea yɛ cɛ lekwesa nya keveyi geva tekeleke le reghwetɛ, ba'a ne, pa hwepeyi mayafe mɛa ŋkwa kedzeki ŋwela. Tsetse kiɗimte slene Moyize.

³⁴Tagha gɛ ne, pa ləmbə zhiɓəaghe geva kənəa cɛ lekwesa kebegeme geva ba'a pa zləvəa Mahwətə viɗikɛ ŋkwa nya keveyi geva tekeleke.

³⁵Shaŋe Moyize kadzembe cɛ lekwesa kebegeme geva, va nya nza ləmbə zhiɓə kənə ba'a va nya viɗikɛ zləvəa Mahwətə.

³⁶Ma vəa ŋkwa nya dzeme ləmbə kənəa cɛ lekwesa kebegeme geva ne, kadzawa hweŋkwa ka Israyɛl mbe yayata dzeghwa ta nci.

³⁷Ama keɗema ləmbə kedzeme ne, kaslə hɛ we. Hɛ nya dzeme ŋkɛ te yaneghe hɛ.

³⁸Pa Mahwətə ncɛte nda nza ta ŋkɛ le hɛ ke ka Israyɛl laka ləmbə nya kənəa ŋkwa nya keveyi geva tekeleke heveci keɗema laka ghwə nya kewaŋe ŋkwa heviɗi mbe dzeghwa ta nci.