Read KapsikiDC Job 10 Bible Online

Job 10 - KapsikiDC bible

Job 10

¹Zeɗehwe ɗa nza teghweme we, katezhɛne 'ya kafɛa yitea ŋgaɗe ghə we, 'ya katevənəhwe shitə nya kwa hwəa ɗa.

²Ma tegeze nda 'ya ke Shala: ve ɗa ma fete na ma, ɗepete wəsə nya ŋele ɗa na yite.

³Zeɗehwe ŋa sa ɗa yaka, kele zləvə te wəsə nya menete na ba'a yipə zəzə ta ka 'yaghwa mehele kadzawa na?

⁴Kala ntsə ta wəndə ŋelɛ ntsə ta ŋa na? Kala nya newe ŋkwa wəndə ŋelɛ newe ŋkwa na na?

⁵Keɓɛhwɛnyɛ hɛa ŋa teghweme kala ŋa n'yɛ na? Kahe kahe kiɗi va ta ŋa kala ŋa n'yɛ na?

⁶Wa raberə zele fete ta ɗa na ba'a sepa zeweve ta jaɗafa ta ɗa na wa?

⁷Ndagwara nahe na keɗepe kaɗema 'ya kande jaɗafa ba'a kawəndə nya keɗema kambele va gha.

⁸Dzeve ta ŋa ka pate ɗa ba'a ka ŋate ɗa. Ama tsetsenya ne, ghenci kahemɛke ɗa, kaɗe na kaza sebe te 'ya.

⁹Zəzəte: nahe na keŋate ɗa kala nya ŋa ghene mbeli, gha ɗe kazhɛne ɗa kadzembe hɛɗi.

¹⁰Vəashi ne, nahe na kepate ɗa kwa hwəa meyɛ ɗa kala ŋ'wa nya shekeyi mbeli kwa kwalekwə kezha mesle.

¹¹Nahe na kemenate sli ba'a hweta te 'ya, nahe na kembeɗete 'yɛ'yɛa ba'a berete mbe 'ya.

¹²Kwa sebe ta ŋkɛ, nahe na kendeke ɗa mpi gəmə ba'a nahe na kenewete ghweme fate fate te 'ya.

¹³Ama nahe na kewəfərəakɛ kwete ghena kwa wənəa ŋa, nahe 'ya keɗepe zəzə ta ŋa:

¹⁴gha ɗe kaceha ɗa mbe mene jaɗafa, fete shɛ katekelemte ɗa na te wənə we.

¹⁵Ma kenza nde nde mene fete 'ya ne, ɗa ya te 'ya! Ma kenza nde wəndə nya ɗema fete ve ne, kaslete ghə 'ya we. Kala nde ghwəyi ghwəyi 'ya va hawe ba'a va yaka nya te 'ya.

¹⁶Ma kesletete ghə 'ya ne, kakeka ɗa na kala nivɛrə kakeka wəsə. Nda berete ta ŋa ya ɗaŋe ɗaŋe kənəa 'ya.

¹⁷Nda mpa yaha na kevə kevə, mtsehe yamtsehe hwepe wənəa ŋa na kənəa 'ya, kewəvəsə kewəvəsə se ka sewajɛa ŋa kampa le 'ya.

¹⁸Wa raberə kelakawa ɗa na kwa hwəa meyɛ ɗa wa? Ma ya nahe 'ya kemte ɗa ne, nza ntsə shɛ katenakɛ ɗa we.

¹⁹Nza kala wəsə nya kesema shɛ 'ya, nza kata kata dzawa kwele ɗa 'ya.

²⁰Tsetsenya ne, ɓɛhwɛ tene hɛa ɗa teghweme. Pelakɛ ɗa kazhɛne mpi kezha nakɛ zlama 'ya ɓɛhwɛ.

²¹Takwa takwa 'ya katedzete ŋkwa nya ɗema mbeli kazhɛne geva kase te, te hɛɗia ŋkwesle ba'a zhikwətəkwə ta ŋkwa,

²²te hɛɗi nya nza ŋkwesle ba'a wəshi mehwaɗe mehwaɗe, nya nza waŋe yipə yipə le ŋkwesle ta va.»