Read KapsikiDC Job 12 Bible Online

Job 12 - KapsikiDC bible

Job 12

¹Tagha gɛ, ma ke Job zhɛnete:

²«Kaganda ne, nahe yɛ keɗepe pɛtɛa wəshi! Yipə yipə tempə yɛ le ntsehwele!

³Ma 'ya perə ne, ɗepe wəshi ya va 'ya kala gheyɛ, kenza 'ya gezhi ma ke gheyɛ we. Ma ghena nya gezete nya yɛ ne, pɛtɛ mbeli keɗepe.

⁴Katsa nda lewela 'ya ke Shala kezha kemave zhɛne, wa nde menete geva wa? Kawəsə keŋ'wəshi zhɛre ɗa 'ya sha ka mcɛhɛ ɗa. Ma wəndə nya keyɛ nda fete ke Shala, nya kedzeghwa tiɗiɗi ne, gheŋkɛ yaŋ'wəshi mbeli!

⁵Ma ke mbeli nyi mbe zeɗe nza sha geze: ‹ɓelama shinti mə mbe ghə va nde dewə ŋeli ma!› Ghena nya yageze nda hɛ ke mbeli nyi keteɗe.

⁶Kwelɛŋe ka mefətekwə ki ghɛa nci, gwezlayɛ nzanji ka ghweze mɛ hwa Shala. Kwete Shala shɛ keɗepe hɛ za ma ke berete ta nci we.

⁷Ama 'yɛwe ghena va wəshi keseɗa, kateteke ŋa wəshi hɛ, 'yɛwe ghena va 'yɛ nyi kezlə yitea ghweme, katencɛ ŋa ŋkɛ hɛ.

⁸Geze nda ghena ke hɛɗi, kateteke ŋa ghena ŋkɛ, kwele kwele ghena va kelepe nyi kwa ndərə kezha ɓela ŋa.

⁹Nyama nde ɗepema hwa wəshia shɛhɛ dzeve ta Mahwətə nde menete pɛtɛa wəshi wa?

¹⁰Mbe dzeve ta ŋkɛ mpia yayata wəsə nya teghweme ba'a sefə nya mbe yayata wəndə ŋelɛ.

¹¹Ma ke mbeli sha kwete ghena: ‹Ghena yaɗe sleme kafa kala nya fa zeɗe mɛ te wəsə kezeme.

¹²Va mbeli nyi kentsə ntsə nza ntsehwele, va mbeli nyi kehale hale nza ɗepe wəshi.›

¹³Ama va Shala nza ntsehwele ba'a berete, gheŋkɛ yanza ɗepe nehe ghena ba'a ɗepe wəshi ve.

¹⁴Ma ŋkwa nya ŋzlamte Shala ne, kazhɛne nde kaŋate geva we, ma wəndə nya veyi ŋkɛ kwa daŋgayɛ ne, katepelakame geva ŋkɛ we.

¹⁵Ma keghereŋeyi va ŋkɛ ne, ɓɛaŋwela ya shɛ. Ama kepelakɛ va ŋkɛ ne, pɛtɛ beze hɛɗi nde.

¹⁶Berete ba'a ɗepe wəshi ya ve, ŋa ŋkɛ wəndə nya keza za ba'a wəndə nya keza ŋkwa.

¹⁷Kave nda dzeghwa le seɗa ŋkɛ ke ka sleke hɛɗi ba'a kave nda 'yi'yɛghwə ŋkɛ ke ka meha ghwə.

¹⁸Kafə ka meghea kɛfi ŋkɛ sawa te meghe ba'a kazhɛre hɛ ŋkɛ kaka daŋgayɛ.

¹⁹Kave nda dzeghwa le seɗa ŋkɛ ke ka dzeghe Shala ba'a kashifə mbeli nyi kesleke ŋkwa ŋkɛ.

²⁰Kakele ghena ŋkɛ va ka ɗepe geze ghena megela ba'a kazləgwə nehe ghena va ka meha mehɛɗi.

²¹Kave hawe ŋkɛ te mbeli nyi nza zləvə te ba'a kakiɗi berete ŋkɛ ka ghwərə ghwərəa ntsə.

²²Kancɛ wəshi nyi te wəfərə mbe ŋkwesle ŋkɛ darahwe, ba'a kave waŋe ŋkɛ kənəa wəsə nya mbe ŋkwesle ta va.

²³Kave nda berete ŋkɛ ke kweci hwelefefi ŋkɛ, zhɛne ne, kampə hɛ ŋkɛ. Kambake hɛ ŋkɛ, kwa sebe ta ŋkɛ, kafə hɛ ŋkɛ kadzete kwete ŋkwa.

²⁴Kakele mehele ŋkɛ va ka sleke hɛɗi ba'a kave nda ndeŋe ŋkɛ ke hɛ te ɓerama nya ɗema hweŋkwa.

²⁵Katsepe tsepe hɛ heviɗi kaɗema waŋe shɛ ba'a kateteɗe hɛ te hɛɗi kala ka ghwəyi ghwəyi.»