Read KapsikiDC Job 15 Bible Online

Job 15 - KapsikiDC bible

Job 15

¹Tagha ne, laŋe Ɛlifaz, nde Tɛman te ghena, ma ke sha Job:

²«Kazhɛne ghena nde ntsehwele ntsehwele le ghena kwada na? Kazhɛne ghena ŋkɛ nyi ghena ghweleme na?

³Ma ghena nyi geze nyi na ne, deme te we, ma caŋa nyi tseha nyi na ne, kaketekɛ ŋkwa we.

⁴Ɓiyitsa ne, kabeze hawe ta ŋa va Shala na, kaza shihə yɛ ta ŋa na kwa kema ta Shala.

⁵Nza ta ŋa kande jaɗafa nde ve ŋa geze ghena nyi, ghena kwada ghena nyi geze na.

⁶Mɛa ŋa nde keseve ŋa le fete, ama 'ya we. Pɛtɛa ghena nyi geze na kakese ŋa le fete.

⁷Adam nya keghate kaya na na? Mpelɛa ma yake geva na ke yɛ ghweme na?

⁸Nahe na keɗepe wəshi nyi tewəfərə va Shala na? Deke gha kwetɛŋe ŋa yanza ntsehwele ve na?

⁹Wa yaɗepe na, kaɗepema ghen'yɛ wa? Wa yafate na, kafatema ghen'yɛ wa?

¹⁰Wəndə nya kentsə ntsə ya hwa ghen'yɛ, wəndə nya nza va ta ŋkɛ kwele ma ke ŋa yiteyɛ ŋa.

¹¹Dewə ŋa gweɗakwe ta Shala ba'a ghena ganji nyi geze ŋa nyi ghen'yɛ na?

¹²Tewəmbəreke wa hwepete wənə na wa? Wa raberə ghwərəzlə n'yɛ na wa?

¹³Wa raberə hwepe nda wənə na ke Shala wa? Kezha wa geze ghena nyi kala nyi mɛa ŋa wa?

¹⁴Wa ŋkɛ wəndə ŋelɛ nda ve ghəa ŋkɛ ŋkɛ kawəndə nya wɛŋe wa? Kanzanyɛ wəzege nya kesawa kwa hwəa male tiɗiɗi na?

¹⁵Ya va ka ghwene ta ŋkɛ ne, kagezleŋema ghə Shala we, ma sha Shala ne, kenza ŋkwa pelɛ ghweme kaŋkwa nya wɛŋe we.

¹⁶Tsema tenza nde kaŋa wəndə ŋelɛ nya ɗema zləvə te, nya kebeze beze ba'a nya kemene fete kala sa yɛmə wa?

¹⁷'Ya kateteke ŋa wəsə, fa ŋa ɗa, 'ya kateɓela ŋa wəsə nya nakɛ 'ya.

¹⁸'Ya kateteke ŋa ghena nyi kese va ka ntsehwele ntsehwele. Dazhɛ dazhɛ geze ghena nyi fate hɛ va ka shihɛnyɛ hɛ hɛ.

¹⁹Deke ke ghenci ndeke nda hɛɗi Shala vəa ŋkwa nya nakama kwete hwelefe kadzehwa hɛ.

²⁰Yaka yasa nde 'yaghwa mehele mbe nza ta ŋkɛ teghweme, nahe va ta nde ghwərə ghwərəa ntsə keɓelate geva.

²¹Katsa geva lewela nyi ghazlənə mbeli ve kwa sleme ta ŋkɛ. Zhibədikə nde mefətekwə kənə te tepe ta kwelɛŋe.

²²Ma zəzə ŋkɛ ne, kateshave ŋkɛ mbe ŋkwesle we, nahe ŋkɛ keɗepe kawəmbə ŋkɛ mte nya ndiremi,

²³nahe ŋkɛ keveyi geva kawəsə kezeme ta zleŋa. Nahe ŋkɛ keɗepe vecia ŋkwesle nde neghe ŋkɛ.

²⁴Yaka ba'a taze ta mehele ka ve nda ghazlənə, kateme hɛ te kala meghe nya ɗeke ɗeke yitea mpa.

²⁵Kwa nza ŋkɛ nahe ŋkɛ kekafete dzeve yitea Shala, nahe ŋkɛ kese kampa le Nde berete.

²⁶Nahe ŋkɛ kese kahwɛ kase sha Shala le ghə teŋa, kwa wəmbəa geləa ŋkɛ nya ɓəsəɓə.

²⁷Keshɛnɛanyɛ se kema kwa ghə ve, kedekenyɛ ba'a ɗehwe ɗehwe se geva ta ŋkɛ.

²⁸Nahe ŋkɛ kese kanza mbe meleme nyi kebeze beze, ki ghɛ nyi ɗema mbeli dzeyi ki ba'a ki nyi takwa takwa kaŋzla.

²⁹Ama kazhɛne ŋkɛ kakemave mcɛlə we, keɗema ne, katetemə wəshia nci we. Katedzemte zləvəa ŋkɛ te hɛɗi we.

³⁰Katembele ŋkɛ va ŋkwesle we, kala wəfe nya ghamemte yɛ dzeve ta ŋkɛ ghwə tenza ŋkɛ, katefə ŋkɛ sefə nya vɛke Shala kalə cakeɗake.

³¹Vema zəzə ŋkɛ te mene mbəɗəkwə, va nya teza ŋkɛ ma, kwa nza ŋkɛ ne, mbəɗəkwə nde tenza kazhɛme ta ŋkɛ.

³²Katemene geva wəsəa shɛ nda temte ŋkɛ, katezhɛne yɛ dzeve ta ŋkɛ kaɗəkwə we.

³³Katenza ŋkɛ kala rɛzɛŋe nya kebetemte ya ta ŋkɛ, kala bekele nya kebetemte ghwə ta ŋkɛ.

³⁴Kaganda ne, ndaŋe nza ka ndiremia mehele te hwelefe. Katetere ghɛa nci nyi viɗi va wəshi mbəɗəkwə ghwə.

³⁵Ndiremi yaya wəndə nya kezəzə wəsə kwa ndiremi. Wəsə nya zəzə ŋkɛ kwa wənəa ŋkɛ nde teghwete ŋkɛ.»