Read KapsikiDC Job 17 Bible Online

Job 17 - KapsikiDC bible

Job 17

¹Tekwazhizhi zhɛne mpi 'ya, sefə kateshave hwa 'ya. Neghe yaneghe ɗa kwele.

²Dzasle 'ya kwa mbeli nyi keŋ'wəshi ɗa, kafɛa ɗa ghena ŋkele ntsə kedzete hɛ.

³Shala yawe, sate te ŋkwa shɛ na ŋkikɛ kelɛhe te 'ya. Kwa nza ŋkɛ ne, wa kwete wəndə nya ketesate te ŋkwa yitea 'ya wa?

⁴Nahe na kekelehwe ɗepe ghena va ka mcɛhɛ ɗa, vatse ne, katesərə hɛ na kanza kaka hərəte ŋkwa we.

⁵Kala wəndə nya kehekake ka mcɛhɛnyɛ yitea wəsə kezeme vəa ŋkwa nya deneve ŋwalea ŋkɛ ma hɛ.

⁶Nahe mbeli kezhɛrete ɗa kaghena heca, ndɛghwɛɗɛ yanciɗi hɛ kwa kema va 'ya.

⁷Ghare yaghare ntsə te 'ya va yaka ta zəzə, kala shenaŋkwe tene geva ta ɗa.

⁸Ma ketenakɛ ɗa mbeli nyi tiɗiɗi ne, heheɓake tenza hɛ. Ma mbeli nyi ɗema fete va hɛ ne, katezhɛ nda wənəa nci ke hɛ ka mbəɗəkwə.

⁹Ma ke hɛ sha tegeze: «Ma mbeli nyi kehawe va Shala ne, ntsə geva hɛ! Ma mbeli keɗema kamene fete ne, mtsehe berete hɛ!»

¹⁰Ma gheyɛ ka mcɛhɛ ɗa gɛ ne, nde mə, zhɛneke mə pɛtɛ! Hwa gheyɛ ne, nde ntsehwele ntsehwele shɛ we.

¹¹Nahe hɛa ɗa kekiɗi, nahe sebe keza te yɛ zəzə ta ɗa ba'a yɛ ɗe ta ɗa.

¹²Ma keyɛte nda ŋa ka mcɛhɛ ɗa 'ya ne, kaveci tenza viɗi, kakiɗi ta ŋkwa tenza pəkwə ta veci.

¹³Wa yatene 'ya kazəzə tse wa? Ghɛa mbelia kwahɛɗi ya kaŋkwa kenza ta ɗa gɛ na! Gezle nya ɓelahe 'ya te mbe ŋkwesle gɛ na!

¹⁴Ma 'ya tsave nda lewela ke kwa kwele ta ɗa: «Gha ya kayite ɗa!» Ma 'ya sha menciɗi: «Gheyɛ ya kameyɛ ɗa ba'a kawəzha ta meyɛ ɗa!»

¹⁵Tema lənyɛ zəzə ta ɗa gɛ wa? Wa nde nakɛ zeɗe nza ta ɗa wa?

¹⁶Dzawa yadzawa ghɛa mbelia kwahɛɗi ŋkɛ le 'ya, zlaɓe n'yɛ katedzawa hɛɗi.