Read KapsikiDC Job 18 Bible Online

Job 18 - KapsikiDC bible

Job 18

¹Laŋe Bildad, nde Shəwha te ghena, ma ke:

²«Pa te nyama və tefɛa yɛ yitea geze ghena wa? Zəzəakɛ mə ghena, kwa sebe ta ŋkɛ, kategeze ghena gheɓəmə.

³Wa raberə zhɛre n'yɛ na kala wəshi keseɗa wa? Ka dewə mehele newe n'yɛ na na?

⁴Gha nde vate ɗa te ghəa ŋa le hwepe wənəa ŋa. Kazhɛrenyɛ hɛɗi kaɓerama tewəmbəreke gha na? Kaslənyɛ keleɓa te ŋkwa ŋkɛ na?

⁵Kaganda ne, kateza waŋea nde 'yaghwa mehele, katezhɛne ghwə nya ki ghɛa ŋkɛ katse we.

⁶Kaŋkwesle tezhɛre waŋe nya ki ghɛa ŋkɛ, katemte ghwə nya kwa paterela ta ŋkɛ.

⁷Katezhɛre mtsehe dzeghwa ta ŋkɛ kadzeghwa nya laŋase laŋase, kateza ŋkɛ yɛ zəzə ta ŋkɛ.

⁸Katekele ŋkɛ seɗa ta ŋkɛ kadzete dagalawe, kateha seɗa ŋkɛ kadzawa zewe ta ŋkɛ.

⁹Katekese ŋkɛ dagalawe yitea tetərə, kateviwə geva zewe ta ŋkɛ yite.

¹⁰Nahe zewe nya ketekese ŋkɛ kewəfərəakɛ geva mbe hɛɗi, neghe yaneghe ŋkɛ dagalawe kwa hweŋkwa.

¹¹Se yase ghazlənə shɛ laka yayata bela, nda zele yazele ŋkɛ nde kwa seɗa kwa seɗa.

¹²Kateme ma te vəa ŋkwa nya nza ŋkɛ bereteke, ndiremi ya terasle yite.

¹³Katezeme hweta ta geva ta ŋkɛ ndiremi, katekese bela nyi te geva ta ŋkɛ ndiremi kemte.

¹⁴Katekese ŋkɛ mbeli shave ki ghɛa ŋkɛ nya nza ŋkɛ gwezlayɛ, katekele nda ŋkɛ mbeli ke meghea mbelia kwahɛɗi.

¹⁵Wərə kwete wəndə kanza ki ghɛa ŋkɛ, mba kaŋa ŋkɛ we, katebete ghwə ta gezla mbeli kənəa ghɛa ŋkɛ.

¹⁶Kateghwelenji yɛ slərəa ŋkɛ, katekwesamenji yɛ dzeve ta ŋkɛ.

¹⁷Katezhɛne mbeli kazəzə ŋkɛ te hɛɗi we, katezhɛne mbeli kahekɛme sləa ŋkɛ te yayata ŋkwa we.

¹⁸Katetsəkwə ŋkɛ mbeli shave mbe waŋe kadzembe ŋkwesle, kateŋka ŋkɛ mbeli seyi te hɛɗi lema.

¹⁹Wəzege shɛ katenza te ŋkwa ŋkɛ mbe hwelefe ta ŋkɛ we, wəndə shɛ katenza teghweme hwa mbeli nyi ki ghɛa ŋkɛ we.

²⁰Yayata wəndə katenza heɓake va wəsə nya kemenete nda geva, same kwa ŋkwa nya same veci pa kwa nya pəkwə ŋkɛ ne, pɛtɛ mbeli katebare bare va ghazlənə.

²¹Ma ke hɛ sha tegeze: ‹Nya ya kawəsə nya ketene yitea nde 'yaghwa mehele ba'a mbeli nyi ki ghɛa ŋkɛ. Ma ŋkwa nya ne, kaŋkwa nya ɗepema Shala mbeli te se ŋkɛ.›»