Read KapsikiDC Job 19 Bible Online

Job 19 - KapsikiDC bible

Job 19

¹Laŋe Job te ghena, ma ke:

²«Pa te nyama və tetaze ɗa mehele yɛ ba'a tesa ɗa yaka yɛ le ghena nyi geze yɛ wa?

³Kwele kwele zhigə ŋelekɛ ɗa yɛ. Kazhɛ ŋayɛ hawe va sa ɗa gəli wəka?

⁴Ya ghena zave ɗa za kaganda ne, deke 'ya yatsakɛ ŋkɛ.

⁵Ma kenza ŋkɛ kaganda ɗe kave ghəa ŋayɛ pelɛ wəmbə kaŋele le ndiremi nya te 'ya ne,

⁶Ɗepete mə Shala nde sa ɗa yaka ba'a nde kesehwe ɗa le dagalawea ŋkɛ.

⁷Ya 'ya tsa lewela ne, wəndə kezhɛne shɛ we. Ya 'ya heka ŋkwa 'ya ne, nde negha ɗa fete shɛ we.

⁸Nahe Shala kefɛake ɗa hweŋkwa, kajive ɗa 'ya we, nahe ŋkɛ keveyi ŋkwesle kwa hweŋkwa ta ɗa.

⁹Nahe ŋkɛ kekelemte zləvə te 'ya, nahe ŋkɛ kekelemte derə meghe mbe ghə va 'ya.

¹⁰Nahe ŋkɛ ketaremte ɗa laka yayata bela, kwetɛŋe seɗa ta ɗa kwa kwele. Nahe ŋkɛ kelamte slərə yitea zəzə ta ɗa kala nya lamte slərə mbeli yitea wəfe.

¹¹Kwele kwele hwepenyɛ wənəa ŋkɛ va 'ya, nahe ŋkɛ keveyi ɗa kande jaga ta ŋkɛ.

¹²Se yase wəvəsəa ka sewajɛa ŋkɛ, hweŋkwa kese sha 'ya yakelete hɛ ba'a dzeyi yitea ghɛa nzanji hɛ.

¹³Nahe Shala keŋkamte ka menəhɛ ɗa cakeɗake le 'ya, hwɛ yahwɛ mbeli nyi keɗepe ɗa va 'ya.

¹⁴Nahe ka menəhɛ ɗa kewəfəyite ɗa, nahe ka mcɛhɛ ɗa kezaghəyite ɗa.

¹⁵Kawəndə ŋkwərə newe ɗa mentiɓə ba'a ka kwaterashi nyi ki ghɛa ɗa, kala wəndə nya ɗepema hɛ newe ɗa hɛ.

¹⁶Kaheka nde mene slene ta ɗa 'ya ne, kazhɛne ɗa ŋkɛ, ya 'ya nza kampi nda dzeve we.

¹⁷Kazəŋwə nda geva ta ɗa ke male ta ɗa, zeɗehwe nda nza ta ɗa ke ka kesaka meyɛ ɗa we.

¹⁸Pa le ŋwalea fəshi kaɓelama ɗa. Ma kasate 'ya te ŋkwa ne, kaŋ'wəshi ɗa hɛ.

¹⁹Pɛtɛ ka mcɛhɛ kwa sla pela ta ɗa keɗema ɗa, pɛtɛ mbeli nyi se 'ya kaɗe kezhɛraghe geva kənəa 'ya.

²⁰Deke kagerese ba'a ka'yɛ'yɛ tene 'ya, kala wəndə nya kemte mte tene 'ya.

²¹Zhɛ mə heli yitea 'ya, zhɛ mə heli yitea 'ya, ka mcɛhɛ ɗa, kwa nza ŋkɛ ne, nahe dzeve ta Shala keɗate ɗa!

²²Wa raberə keka ɗa yɛ kala Shala wa? Kabehe yɛ va sa ɗa yaka wəka?

²³Ma ɗe 'ya ne, pa mbeli rafete ghena nyi geze 'ya, pa mbeli rafeyi hɛ mbe palepa.

²⁴Pa mbeli tsasleyi hɛ te pelɛ le lɛ, pa mbeli meneyi dalema dzeyi kwa kezha ŋkɛ kaghala ghala te!

²⁵Nahe 'ya keɗepe teghweme nde mbeɗe ɗa, ma kakwa keɗaŋe ne, katesate ŋkɛ te hɛɗi nya.

²⁶Ma kwa sebe ta nya tebezemte geva hweta ta ɗa ne, katenewe Shala 'ya le ghəa ɗa.

²⁷Kaganda ne, katenewe ŋkɛ 'ya le ntsə ta ɗa, 'ya le ghəa ɗa nde tenewe ŋkɛ, kwete wəndə we. Kedera kedera se ta vəa shɛ sha 'ya.

²⁸Ma vəa ŋkwa nya tegeze yɛ: ‹Tsema nza mə kasahwe nda yaka kezha kemave fete kekese te ghwə wa?›, pe yɛ ne,

²⁹zəzə mə ghəa ŋayɛ va kafayɛ, kwa nza ŋkɛ mte ya kazhɛme ta keka nya se yɛ kakeka ɗa le wənə le wənə. Ma tsagha gɛ, kateɗepe yɛ meha ghwə ya shɛ.»