Read KapsikiDC Job 2 Bible Online

Job 2 - KapsikiDC bible

Job 2

¹Ma te kwete hɛ, kwa se ka ghwene ta Shala kadzawa kema ta Shala ne, pa Gətəli senyɛ hwa hɛ perə.

²Ma ke Mahwətə 'yɛwete ve: «Tema se na wa?» Ma ke Gətəli zhɛnete nda: «'Ya se kantəslə hɛɗi lema.»

³Ma ke Mahwətə shɛ: «Nahe na keneweve nde mene slene ta ɗa Job tse na? Wəndə shɛ kala gheŋkɛ te hɛɗi lema we. Wəndə nya ganyɛ ba'a nya tiɗiɗi ŋkɛ. Kahawe ŋkɛ va 'ya ba'a kahwɛ ŋkɛ va wəsə kwa ndiremi. Nda ntsə yantsə geva ŋkɛ mbe nza tiɗiɗia ŋkɛ. Gəmə tsəkwəte ɗa na kaza sebe te.»

⁴Ama ma ke Gətəli zhɛnete nda ke Mahwətə: «Hweta ta geva te hweta ta geva! Ma yayata wəsə nya ve nda wəndə ke wəndə, kezha kemave kwete. Ma pɛtɛa wəshi nyi yitea dzeve va wəndə ne, kave nda hɛ ŋkɛ ke mbeli kezha mbele mpia ŋkɛ.

⁵Ama hake dzeve ta ŋa shɛ na kwaɗakɛ geva ta ŋkɛ, ghəpə yite katebezla ŋa ŋkɛ dazhɛ dazhɛ we!»

⁶Ma ke Mahwətə sha Gətəli: «Yewə, mbe dzeve ta ŋa ŋkɛ, ama kwaɗema mpia ŋkɛ na ma.»

⁷Tagha gɛ, cape Gətəli slənyɛ kwa kema ta Mahwətə. Pa ŋkɛ vate kwete zereghwe kala damara te Job, ghala slə nde mbe hwə seɗa hwa'a kwa dapana ta ghə.

⁸Hwa pəsəɗə ntishɛ Job ba'a laŋe ŋkɛ te kələ kezha hele geva ta ŋkɛ.

⁹Ma ke male ta ŋkɛ shɛ: «Nda ntsə yantsə geva na kanza mbe nza tiɗiɗi shanda na? Megela ma bezlakɛ Shala na shɛ na mte ŋa wəka!»

¹⁰Ama ma ke Job zhɛnete nda: «Kala gezhia male geze ghena na! Ma kayɛ zeɗe nza mə kala wəsə nya kese va Shala ne, va wa ɗema mə yɛ ndiremi nya ve ŋkɛ te gheɓə wa?» Ma mbe pɛtɛa wəshi nyi ne, kemenete nda fete Job ke Shala laka ghena nyi gezete ŋkɛ we.

¹¹Pa kweci ka mcɛhɛnyɛa Job mahekene fate ndiremi nyi kemenete nda geva. Ɛlifaz, nde Tɛman, Bildad, nde Shəwha ba'a Sofar, nde Na'ama. Yayata wəndəa nci kese te hɛɗia ŋkɛ. Pa hɛ tsahwe kase kanjiŋwe ŋkɛ ba'a kagweɗakwe nda wənə.

¹²Ma kwa nakɛ ŋkɛ hɛ mba hɛ cakeɗake ne, ndɛare hɛ kaɗepete ŋkɛ. Tagha ne, ntake hɛ kapesle ghə le nehwene. Pa hɛ ŋkwahemte lekwesa ta nci ba'a ntake hɛ kakərə hɛɗi kənəa ghəa nci.

¹³Kwekwelebəhə hɛ ntishɛnji hwa hɛɗi yite kavəghwə ba'a kaviɗi mberefaŋe. Wəndə shɛ kenteɗe mɛ, va nya nakɛ wəba ta yaka nya te hɛ we.