Read KapsikiDC Job 20 Bible Online

Job 20 - KapsikiDC bible

Job 20

¹Tagha gɛ, laŋe Sofar, nde Na'ama te ghena, ma ke sha Job:

²«Wa nya yɛ zəzə ta ɗa katsəkwə ɗa kazhɛne ghena, kazhɛne 'ya kazereghete we.

³Ghena nyi keŋele ɗa yafa 'ya, ama kave ɗa zhɛne ɗepe ghena ta ɗa.

⁴Gha ɗepema, se ghalanza, ghala veyi geva wəndə ŋelɛ te hɛɗi lema,

⁵kateməma hərə ŋkwa ta ka 'yaghwa mehele, kavə ɓɛhwɛ zlama ta ka ndiremia mehele na?

⁶Ya nde ndiremia mehele nza dəzlə yitea ghweme, ya ghəa ŋkɛ nza kakwaɗe ləmbə ne,

⁷kateza ŋkɛ kaghala ghala kala wevɛa ŋkɛ. Ma tegeze mbeli nyi kesene kanewe ŋkɛ: ‹Tema ŋkɛ gɛ wa?›

⁸Kala shiwə nya kezanyɛ yitea ghə, kazəzətema ŋkɛ mbeli zhɛkwa ŋkɛ, katehwɛ ŋkɛ kala wəshi nyi newe wəndə heviɗi.

⁹Ma wəndə kesene kanewe ŋkɛ ne, katezhɛne ŋkɛ kanakɛ ŋkɛ we. Ya ghɛa ŋkɛ ne, katezhɛne kenakɛ ŋkɛ we.

¹⁰Kateŋki nda wəshia nci ŋwalea ŋkɛ ke ka titikwəa kɛfi, katezhɛnemte mcɛləa ŋkɛ ŋkɛ le dzeve ta ŋkɛ.

¹¹Kala mempɛhweta se berete ve, ama kateɓelahe ŋkɛ kwa kwele zlaɓe le beretea shɛ.

¹²Zeɗekə wəsə kwa ndiremi kwa mɛa ŋkɛ, kawəfərə ŋkɛ mbeyitere ghɛnia ŋkɛ.

¹³Kawəmbə ŋkɛ mbe kavə kwele kwele, mba ŋkɛ le kwa mɛ shanda kezha fa zeɗea ŋkɛ.

¹⁴Ama pa wəsə kezemea shɛ bezemte nda hwə, pa nde zhɛrenyɛ kaghwɛa shishi kwa.

¹⁵Nda ŋkɛ kavənəhweke wəshi nyi fəhwe ŋkɛ va kweci mbeli. Shala nde vənəhwə hɛ same kwa hwəa ŋkɛ.

¹⁶Ghwɛa shishi yase ŋkɛ kamɓisə, va hale mentsape temte ŋkɛ.

¹⁷Katezhɛne ŋkɛ kanakɛ hwɛ ta yɛməa mze, hwɛ ta yɛ hələ ba'a hwɛ ta ŋ'wa we.

¹⁸Katezhɛne wəshi nyi kemave ŋkɛ ŋkɛ tewə ŋkɛ kenaka kabezemte hɛ. Katefa zeɗe ŋkɛ te wəshi nyi kemave ŋkɛ mbe fəlia ŋkɛ we.

¹⁹Va nya sahwe nda yaka ba'a nya wəfəyite ka titikwəa kɛfi ŋkɛ, va nya fəhwe ghɛa nci kaɗema keŋate ya kwetɛŋe.

²⁰Ma va nya nza ŋkɛ kande dzeghwama ntsə ne, kwete shɛ katembeleke ŋkɛ hwa mcɛləa ŋkɛ we.

²¹Wəsə kezeme shɛ katene yite we, vatse ɗema zeɗe nza ta ŋkɛ katetemə.

²²Mbe mcɛləa ŋkɛ ne, keyirə yirə tenza ŋkɛ. Kateme ndiremi te.

²³Ma mbe behe hwəa ŋkɛ ŋkɛ ne, katepele ghwə hwepe wənəa ŋkɛ Shala kənə. Kateme ŋkɛ kənə, kawəsə kezeme ta ŋkɛ tenza ŋkɛ.

²⁴Ma kehwɛnyɛ ŋkɛ va kafayɛ ne, have nya le mze kwa ghwə ghwə nde tempahwe ŋkɛ.

²⁵Kanteɗe have ŋkɛ shave mbe wəmbəa ŋkɛ, kanteɗe hwa ŋkɛ shave mbe mene ta ŋkɛ. Taghanyɛ tekese ŋkɛ ghazlənə va mte.

²⁶Ŋkwesle ya te yayata ŋkwa nya wəfərə ŋkɛ, ghwə nya ɗema wəndə ŋelɛ kemehate nde tere ŋkɛ, ndiremi ya te wəshi nyi ketene ki ghɛa ŋkɛ.

²⁷Katencɛ yɛ fete ta ŋkɛ ŋkwa nya pelɛ ghweme, katesate hɛɗi lema te ŋkwa yite.

²⁸Katefəhwe mcɛləa ŋkɛ yɛmə te veci nya tencɛ hwepe wənəa Shala.

²⁹Nya ya kawəsə nya wəmbə nda Shala ke ka 'yaghwa mehele, kaŋa nci nza nya hi nda ŋkɛ ke hɛ.»