Read KapsikiDC Job 21 Bible Online

Job 21 - KapsikiDC bible

Job 21

¹Tagha gɛ, ma ke Job zhɛnete:

²«Fa mə ghena nya geze 'ya megela, tsagha nza yɛ kagweɗakwete ɗa.

³Gweɗakwe pe yɛ, pelakɛ ɗa mə kageze ghena, ma nahe ŋa ɗa ghena ne, wərə yɛ kaŋ'wəshi ɗa.

⁴Kanehwene 'ya va wəndə ŋelɛ, 'ya nya na? Gəmə shaŋe 'ya kazereghe gɛ na?

⁵Newe ɗa mə ndeɗekə: katenza yɛ hehake ba'a katempa ghəa ŋayɛ yɛ le dzeve te mɛ.

⁶Ma 'ya le ghəa ɗa, kwa zəzə wəsə nya kənəa 'ya 'ya ne, kazhɛ ɗa ghazlənə ba'a kabare bare 'ya.

⁷Va wa nza ka 'yaghwa mehele teghweme tse wa? Va wa jive hɛ mbe kema kehale hale hɛ tse wa?

⁸Katekemave berete ŋwalea nci kwa kema ta nci, katekele ka hwelefefia nci kwa ntsə ta nci.

⁹Wəsə shɛ kaghazlənə ghɛa nci nyi kwelɛŋe ve we, kame geta ta Shala te hɛ tɛape we.

¹⁰Kaɗema ya mbe mcɛmcɛlia nci tɛape we, kaya ŋwale ŋemia sla ta nci kaɗema kabereɗe.

¹¹Waɗe sərə ŋwalea nci kajɛgwəli kala timɛti, kawetse ka hwelefefia nci gwezlayɛ.

¹²Kagha cimə hɛ yitea dimə ba'a gagera, kazlama hɛ yitea vɛ ta shela.

¹³Mbe zeɗe nza kiɗi nza ta nci hɛ, mbe kwelɛŋe dzawa ghɛa mbelia kwahɛɗi hɛ.

¹⁴Ndagwara ma ke hɛ sha Shala: ‹Sərəakɛ n'yɛ, zeɗehwe n'yɛ wəsə nya ɗe na we!

¹⁵Gha nya kaShala nde berete, wa ŋkɛ na nda nza n'yɛ kaka mavashia ŋa wa? Wa yakema n'yɛ mbe səkwə ŋa wa?›

¹⁶Ndagwara hɛ ka sleke zeɗe nza ta nci we. Mba 'ya keteke wəshi nyi mene hɛ!

¹⁷Ama kenakɛ mə ghalanza kamte waŋea ka 'yaghwa mehele taghanyɛ, kame ndiremi te hɛ ba'a hwepe wənəa Shala te wəshia nci na?

¹⁸Kala mezaɗe nya kweshalemte sefə, kala cɛkəvə nyi fə sefə nya wəba hɛ na?

¹⁹Kawəmbə nda ɗa nya te yita Shala ke ŋwalea ŋkɛ na? Yita nde hi kazereghe ɗa ta ŋkɛ, yitea fave hɛ megela!

²⁰Nakɛ ɗa nya te ghəa ŋkɛ nde 'yaghwa mehele le ntsə ta ŋkɛ, fave hwepe wənəa Shala nde berete ŋkɛ!

²¹Kwa nza ŋkɛ ma kemte ŋkɛ ne, ketsakɛ ŋkɛ nza ta ŋwalea ŋkɛ we.

²²Wəndə shɛ nya keteke nda mene wəshi ke Shala na? Kaɗema Shala kameha ghwə te ka ghwene ta ŋkɛ na?

²³Mba kwete wəndə le berete nda mte ŋkɛ. Mba ŋkɛ mbe zeɗe nza ba'a mbe kwelɛŋe.

²⁴Kedekenyɛ ba'a keshɛnɛanyɛ geva ta ŋkɛ, mba ɗəɗə megela mbe 'yɛ'yɛa ŋkɛ.

²⁵Le wənə kebeze beze mte kwete wəndə, keghama ŋkɛ kandɛmakɛ zeɗe nza.

²⁶Pɛtɛa nci ne, kwa kwele hɛ, bətə geva ta nci mbe menciɗi.

²⁷Nahe 'ya keɗepe zəzə ta ŋayɛ ba'a mehele ta ŋayɛ laka 'ya.

²⁸Kwa nza ŋkɛ ne, ma pe yɛ sha geze: ‹Tema ghɛa nde ghwərə ghwərəa ntsə wa? Tema ghɛ nya se ka 'yaghwa mehele ki wa?›

²⁹Kegha yɛ ka'yɛwe ghena va ka dzeghwa kwa hweŋkwa wəka? Kese yɛ kayɛ ghena nyi gezete ŋayɛ hɛ wəka?

³⁰Ma te vecia ndiremi ne, kambele nde 'yaghwa mehele, pələsə nza ŋkɛ va hwepe wənəa Shala.

³¹Wa nde tenza kancɛte nda dzeghwa ta ŋkɛ wa? Wa nde tewa beze ghena nya menete ŋkɛ te wa?

³²Ma kemte wəndəa shɛ ne, kabeghe ŋkɛ mbeli kadzeme kwele, kanewe ghweme mbeli te kwele ta ŋkɛ.

³³Kweɗe kweɗe nza ŋkwa kwele ta ŋkɛ, mpəɗə nza mbeli kwa sebe ta ŋkɛ ba'a kwele kwele mbeli te kema ta ŋkɛ.

³⁴Wa ŋkwa nya ketekɛ gweɗakwe ŋkwa gɛ? Deke tseŋwə ghena nyi zhɛne yɛ.»