Read KapsikiDC Job 22 Bible Online

Job 22 - KapsikiDC bible

Job 22

¹Tagha ne, laŋe Ɛlifaz, nde Tɛman te ghena, ma ke sha Job:

²«Kakemanakɛ Shala wəndə ŋelɛ tse na? Deke ghəa ŋkɛ yakemane ŋkɛ kenza mehele ve.

³Wa yaketekɛ Shala nde berete na le kenza na tiɗiɗi wa? Wa yakemanakɛ ŋkɛ na le keɗema ŋele te gha wa?

⁴Va nza ta ŋa tiɗiɗi 'yɛ ŋa ŋkɛ, nza ŋkɛ te ghwə le gha na?

⁵Ama va nya nza mehele ta ŋa 'yaghwake ba'a va nya nza fete ta ŋa kwele kwele.

⁶Kafə wəshi na yitea ka menəhɛ ŋa gəmə, kaseɗemte lekwesa ta nci na kənəa hɛ, sərə hɛ mederelaŋe.

⁷Kese na kasa nda yɛmə ke wəndə nya zhɛ nda ndere keɗema kave nda ɗafa ke wəndə nya zhɛ nda ma we.

⁸Ama pa na pelakɛ ka berete berete kakele hɛɗi ba'a ka kele ghə kanza te.

⁹Pa na ŋkamte ka wedidi pala pala ba'a sahwe nda yaka ke ka mezhɛtiti.

¹⁰Vatse nza na dzasle kwa dagalawe ba'a seke ŋa se ghazlənə vəkə.

¹¹Bətə na mbe ŋkwesle, kanakɛ ŋkwa na we, bətə na kwa ŋkwəɗəa ndiremi.

¹²Nahe mbeli keɗepe pelɛ ghweme Shala. Newema cakeɗa ta yɛ saseregwa pelɛagha gi!

¹³Ama ma ke gezete: ‹Wa yaɗepe Shala wa? Wərə ŋkɛ kamehate ghwə te gheɓəmə sawa hwa ləmbə na?

¹⁴Nahe ləmbə kefɛake nda newe ŋkwa, deke pelɛ ghweme dzedzeghwa ŋkɛ.›

¹⁵Mba na kaɗe kadzeghwa kwa hweŋkwa nya vəashi, nya dzeghwa mbeli nyi kemene jaɗafa kwa na?

¹⁶Nahe hɛ kezanji tewə ketemə, kala shihə nya kelehwe ghwa.

¹⁷Ma ke hɛ sha se kageze nda ke Shala: ‹Sərəakɛ n'yɛ! Wa wəsə nya nza Nde berete kamenete n'yɛ wa?›

¹⁸Ndagwara gheŋkɛ nde viɗikɛ ghɛa nci le mcɛlə. Ama kateke nza ta ka 'yaghwa mehelea shɛhɛ 'ya we.

¹⁹Katezlama mbeli nyi tiɗiɗi yitea newe za ta nci, kateŋ'wəshi hɛ mbeli nyi ɗema fete va hɛ.

²⁰Ma ke hɛ sha geze: ‹Rayɛ sebe te ka jaga ta ɓəmə, nahe ghwə keteremte wəshia nci!›

²¹Diməkɛ ghə yitea Shala, kwelɛŋe tenza na. Tsagha tezhɛne na kakemave zeɗe nza na.

²²Yɛte wəshi nyi teke ŋa Shala, veyi ghena ta ŋkɛ kwa wənəa ŋa.

²³Ma kezhɛneke nda geva na ke Nde berete ne, katezhɛne ŋkɛ kave ŋa te ŋkwa ŋa. Hendemte wəsə nya ndiremi cakeɗake le gha.

²⁴Negheyi mze kwa tere tere ta ŋa hwa hɛɗi keɗema negheyi ŋkɛ hwa pelɛ nyi kwa hələ.

²⁵Shala nde berete nde tenza kamze kwa tere terea ŋa ba'a kamze kwa tɛawetɛa ta ŋa.

²⁶Ma tsagha ne, katezlama na te Nde berete, katekafe kema na laka Shala le gezleŋema ghə.

²⁷Vəa ŋkwa nya tesəkwə ŋkɛ na ne, katefa səkwə ta ŋa ŋkɛ, ma tsagha ne, wərə na kamenete nda wəsə nya meɗeyi nda na.

²⁸Ma yayata wəsə nya zəzəte na ne, katemene geva ŋkɛ, waŋe tenza ŋkwa nya kwa hweŋkwa ta ŋa.

²⁹Kashifə mbeli nyi kekele ghəa nci Shala, ama kakafe mbeli nyi keshifə ghəa nci ŋkɛ.

³⁰Kambele mbeli nyi ɗema fete va hɛ ŋkɛ va beze ghena. Kaganda ne, waɗe tenza na keyate dzeve ta ŋa na.»