Read KapsikiDC Job 23 Bible Online

Job 23 - KapsikiDC bible

Job 23

¹Tagha ne, ma ke Job zhɛnete:

²Nahe 'ya keɗe kagweɗakwe yɛ ŋələvə ta ɗa, tsetsenya nya ne, kwele kwele ŋgaɗe ghə 'ya.

³Amaga! Ma ya nahe 'ya keɗepe ŋkwa nya nza Shala te ne, nza hwa'a te ŋkwa nya nza ŋkɛ lə 'ya.

⁴Katempa 'ya yitea ghəa ɗa kwa kema ta ŋkɛ, kwele kwele tenza ghena va 'ya kageze nda.

⁵Kateɗepe ghena nyi tezhɛne ɗa ŋkɛ 'ya, katefave wəsə nya tegeze ɗa ŋkɛ 'ya.

⁶Kateɗa ɗa ŋkɛ le berete ta ŋkɛ pɛtɛ na? Ewə! Kateve sleme ŋkɛ yitea ghena ta ɗa.

⁷Kategeze ghena ŋkɛ le wəndə nya tiɗiɗi, katepələsə 'ya va nde meha ghwə te 'ya kaghala ghala.

⁸Ama lə 'ya laka ŋkwa kesame ta veci ne, Shala laka gha we. Lə 'ya laka ŋkwa kepəkwə ta ŋkɛ ne, kenakɛ ŋkɛ 'ya we.

⁹Slene yamene ŋkɛ laka bela kwa gwela na? Kenakɛ ŋkɛ 'ya laka gha we. Tewəfərə ŋkɛ laka bela kwa zeme na? Kebetate ntsə 'ya te we.

¹⁰Ndagwara nahe ŋkɛ keɗepe hweŋkwa nya nza 'ya kwa. Ma vəa ŋkwa nya tedzeghakɛ ɗa ŋkɛ ne, wɛŋe tesame 'ya kwa ghwə kala mze kwa tere tere.

¹¹Kwa seɗa kwa seɗa zelete ŋkɛ 'ya, nahe 'ya keyate hweŋkwa ta ŋkɛ kaɗema kesame kwa.

¹²Kesərəakɛ ghena nyi gezete ŋkɛ 'ya we, pɛtɛ veyi wəshi nyi gezave ɗa ŋkɛ 'ya kwa wənəa ɗa.

¹³Ama ketarete wəsə ŋkɛ ne, wa nde nza kazhɛremte zəzə ta ŋkɛ wa? Wəsə nya ɗe ŋkɛ yamene ŋkɛ.

¹⁴Tserame temene wəshi nyi tarete ŋkɛ te 'ya, kwele kwele kweci zəzə nyi kala nyi ve.

¹⁵Vatse zhɛ ɗa ghazlənə kwa kema ta ŋkɛ. Kala nya mtsehe zəzə 'ya ne, tsagha mtsehe zhɛ ɗa ghazlənə.

¹⁶Shala nde tamte geva ta ɗa, Nde berete nde ve ɗa bare bare.

¹⁷Kenza ɗa divə, ya tsemanyɛ nza viɗi shɛ, ya tsemanyɛ ŋkwesle nya vaghe ŋkɛ kənəa 'ya we.