Read KapsikiDC Job 24 Bible Online

Job 24 - KapsikiDC bible

Job 24

¹Kezha wa ɗema Shala nde berete ntave kweci və kezha meha ghwə te mbeli tse wa? Ma tsagha ne, katenewe slene ta ŋkɛ mbelia ŋkɛ.

²Kazhɛre yɛ ghala ta wəve ka ndiremia mehele, kafə wəshi keseɗa hɛ ba'a kaya wəshi keseɗa nyi ghərəke hɛ hɛ.

³Kakele kwara ta ka mezhɛtiti hɛ, kave sla ta male wede hɛ kwa jiŋgina.

⁴Katsetsəkwə ka dewə ŋeli hɛ same kwa hweŋkwa, nda wəfərə yawəfərə pɛtɛa ka titikwəa kɛfi nyi te hɛɗi.

⁵Kala kwara gamba nyi te ɓerama ne, masheke masheke lə ka titikwəa kɛfi kadzemɛa slene. Kazele wəshi kedəkwə ŋwalea nci hɛ dzeyi hwa gamba.

⁶Kaslesla gwəzə hɛ dzeyi mbe yɛ wəve, kandenda nda rɛzɛŋea nde 'yaghwa mehele hɛ.

⁷Mederelaŋe hɛ hɛ heviɗi va titikwə lekwesa, gwada shɛ va hɛ te vəa ntasle we.

⁸Mpecɛke cɛke nza hɛ va va nya keme hwa ghweme, vare gela slape geva hɛ va titikwə ŋkwa kewəfərə.

⁹Kaŋsle mezhɛte ka 'yaghwa mehele te ŋ'wa ta meghekɛ, kabete wəshia ka titikwəa kɛfi hɛ kwa jiŋgina.

¹⁰Kaŋka hɛ hɛ yitea dzeghwa mederelaŋe, kaɗema lekwesa kənəa geva ba'a kafə hwepe ta ghəa ha hɛ le yɛmə hwa heli.

¹¹Kaŋka hɛ hɛ yitea zleɗe bekele te gela kaŋkeɗe rɛzɛŋe kaɗema kandɛmakɛ tɛ.

¹²Mbe meleme ne, ghə yaŋgaɗe mbeli, ŋələvə ba'a lewela yatsa mbeli nyi ɗakɛ zhi. Ama kamədəŋə nzanyɛ Shala laka wəshi nyi shɛma nyi mbeli geze.

¹³Kaɗe waŋe ka 'yaghwa mehele we, keɗepe hweŋkwa ta ŋkɛ hɛ we, kadzeghwa hɛ kwa hweŋkwa ŋkɛ we.

¹⁴Kasate nde pesle ŋkwa te ŋkwa wakaka ŋkwa, kapesle nde titikwə ba'a nde dewə ŋeli ŋkɛ, ma heviɗi ne, wəshia mbeli yaghərə ŋkɛ.

¹⁵Ma za nya kevale tahe ne, tɛhwɛɗi yaneghe ŋkɛ. Ma ke sha geze mbe ghəa ŋkɛ: «Wəndə shɛ katenakɛ ɗa we.» Tagha gɛ, kadəpə wəsə ŋkɛ kwa kema ta ŋkɛ.

¹⁶Heviɗi ntsa ghɛ ghərə. Ma heveci ne, bərəɓə nza ŋkɛ ki ghɛa ŋkɛ. Kaɗepe waŋe ŋkɛ we.

¹⁷Ma sha hɛ pɛtɛ ne, kiɗi ta ŋkwa ya kaŋkwesle. Nahe hɛ kesenehwe mene wəshi nyi ndiremi ndiremi kashasha heviɗi.

¹⁸Ama gheyɛ ne, ma pe yɛ sha geze: «Kahe kahe fə ka 'yaghwa mehele ghwa, kahɛɗi nya kebezla bezla zhɛre wəvea nci. Kazhɛne hɛ kadzemte kamene slene mbe wəvea rɛzɛŋe we.

¹⁹Kala nya rɛɗɛ kwacakelɛ va veci ne, tsagha za ka jaɗafa ghɛa mbelia kwahɛɗi.

²⁰Nahe mi nyi keyake hɛ kezaghəyite hɛ, wəshi kezeme ganji kaŋa menciɗi. Wəndə shɛ kazhɛne kazəzə mbelia shɛhɛ we, ama nahe ndiremia mehele ta nci keŋzlanyɛ kala wəfe.

²¹Nahe hɛ kesahwe nda yaka ke mi nyi kajɛŋa, kese hɛ kamene nda ganyɛ ke ka wedidi we.

²²Ama berete ya va Shala kaŋka ka ghwərə ghwərəa ntsə. Ma kesate ŋkɛ te ŋkwa ne, kave ghə mbelia shɛhɛ te nza teghweme we.

²³Ndagwara kapele hɛ ŋkɛ kanza gwezlayɛ, ama te dzeghwa ta nci ntsə ta ŋkɛ.

²⁴Kavə ɓɛhwɛ nza hɛ yitea ghweme, kwa sebe ta ŋkɛ ne, kaza sebe te hɛ. Kateɗe hɛ kala ha nya ketsaslemte geva, kaghwele hɛ kala ghəa ha nyi kepiɗimte geva.»

²⁵Ashɛ kala nya ŋkɛ wəka? Wa nde teve ɗa kande tseŋwə wa? Wa nde nza kazhɛrete ghena ta ɗa kaghena kwada wa?