Read KapsikiDC Job 27 Bible Online

Job 27 - KapsikiDC bible

Job 27

¹Ma ke Job mtsehete ghena ta ŋkɛ:

²«Le Shala teghweme nya kendeke ɗa fete, le Shala nde berete nya kebezemte ɗa wənə zeme fela 'ya:

³Ma mba sefə hwa 'ya, ma mba Shala kave ɗa zhɛne mpi ne,

⁴katesame ghena kwa ndiremi kwa mɛa ɗa we, katesla tseŋwə ghɛnia ɗa we.

⁵Kageze 'ya kaganda ya va gheyɛ 'ya we! Pa te mte ne, fete va 'ya we, 'ya sha tegeze.

⁶Te kaganda ta ɗa ghereŋe 'ya, kaslə 'ya te we. Kazhɛ ɗa hawe va nza ta ɗa we, wəsə shɛ kampeɗe ɗa ghəa ɗa ve we.

⁷Menete nda mbeli ke nde jaga ta ɗa kala nde 'yaghwa mehele, menete nda mbeli ke nde ghema ta ɗa kala wəndə nya kemene wəsə kwa ndiremi!

⁸Kwa nza ŋkɛ ne, wa wəsə nya ketene va nde beze ghena, vəa ŋkwa nya kelehwe mpia ŋkɛ Shala wa?

⁹Katefa lewela ta ŋkɛ Shala vəa ŋkwa nya teme ndiremi te tse na?

¹⁰Katezlama ŋkɛ te Nde berete na? Katesəkwə Shala ŋkɛ keveci keveci na?

¹¹'Ya kateteke ŋayɛ tsema tsema mene wəshi Shala, katewəfərə zəzə ta Nde berete 'ya va gheyɛ we.

¹²Gheyɛ le ghəa ŋayɛ ne, nahe yɛ kenakɛ wəsəa shɛ. Wa raberə geze ghena nyi ɗema deme te yɛ wa?»

¹³Wa nya wəsə nya wəmbəyi nda Shala ke ka 'yaghwa mehele, wəsə nya teŋ'we ka ghwərə ghwərəa ntsə va Nde berete nya:

¹⁴Ma keyake ŋwale hɛ kwele kwele ne, katempə hɛ kwamte mpa, katekemave wəshi kezeme ka hwelefefia nci we.

¹⁵Ma mbeli nyi mba teghweme ne, katempə hɛ ba, katenehwene hɛ ya ka wedidia nci we.

¹⁶Ma ketsenete mze kwa tɛawetɛa hɛ kala hɛɗi ba'a ketsenete lekwesa hɛ kala rekɛ ne,

¹⁷wəndə nya tiɗiɗi nde teseɗe lekwesa shɛhɛ, wəndə nya le mehele nde tefə mze kwa tɛawetɛa shɛ.

¹⁸Ma ghɛ nya ŋate hɛ ne, berete mbe we, kahe kahe beze nde kala ghwəlia nde ya ha.

¹⁹Ma nda ɓelahe hɛ ne, kaka mcɛlə hɛ, ama kwa keɗaŋe ta zhigə nyagha. Ma kwa feɗeghe hɛ ne, wəsə shɛ ketene we.

²⁰Vəkə seke nda se ghazlənə ke hɛ kala ghwa. Ma heviɗi ne, kafə hɛ sefə nya wəba.

²¹Kafə hɛ sefə nya kesame kwa ghweme kalə cakeɗake, kafə hɛ ŋkɛ le berete shave ki ghɛa nci.

²²Kakwa zhɛma heli ne, he yahe hɛ Shala le have, nda hwɛ yahwɛ hɛ va ɗa ta ŋkɛ.

²³Kampi dzeve mbeli yitea ndiremi nya te hɛ, kavɛ figwə mbeli va ŋkwa nyi se ghɛa nci te.