Read KapsikiDC Job 29 Bible Online

Job 29 - KapsikiDC bible

Job 29

¹Pa Job mtsehete geze ghena, ma ke:

²«Wa nde nza kazhɛneke ɗa nza nya vəashi, və nya se Shala kanewe ghweme te 'ya tse wa?

³Vəa ŋkwa shɛ ne, kaɓele paterela ta ŋkɛ kənəa ghəa ɗa ba'a kawaŋe ɗa ŋkwa waŋea ŋkɛ hwa ŋkwesle.

⁴Wa nde nza kazhɛnave ɗa və nya se 'ya kamegela, və nya se Shala kanewe ghweme te ghɛa ɗa tse wa?

⁵Ma vəa ŋkwa shɛ ne, mba Shala nde berete le 'ya ba'a mba 'ya dzasle kwa ŋwale tezhilia ɗa.

⁶Seɗa yase 'ya kapɛ le ŋ'wa ba'a hwɛ yase n'yi kahwɛ te gela n'yia ɗa.

⁷Ma keshave 'ya mɛa mɛ degha ta meleme ba'a kentishɛ 'ya te ŋkwa kebeke ne,

⁸kaslənji ka mempɛhwetɛti kenakɛ ɗa hɛ, kasate meha zhili te ŋkwa kezha nza meslete.

⁹Kaghereŋe geze ghena mbeli nyi jama jama ba'a kaŋzle mɛa nci hɛ.

¹⁰Kagweɗakwe ŋwələ mbeli nyi te ghə ba'a kanza hɛ tikə tikə.

¹¹Katsahe ɗa mbeli nyi kefate ghena ta ɗa ba'a ghena ganyɛ yageze mbeli nyi kenakɛ ɗa te 'ya.

¹²Kambele nde titikwə nya ketsa lewela ba'a mezhɛte nya ɗema wəndə te 'ya.

¹³Kawəpi ɗa mbeli nyi kempə ba'a kave zlama 'ya kwa wənəa ka wedidi.

¹⁴Nza tiɗiɗi ya kalekwesa nya kənəa 'ya. Hawe va wəsə nya tiɗiɗi ya kakaralame ba'a kawəsə kepeɗe ghəa ɗa.

¹⁵'Ya nde se kantsə nyi kwa ghwələ ba'a kaseɗa nyi yitea gweleba.

¹⁶'Ya nde se kayitenyɛa ka dewə ŋeli, 'ya nde se kanewe zeweve ta ghena nya te nde se se.

¹⁷Ama 'ya nde se katsa slene kwa mɛ va ndiremia mehele, 'ya nde se kazləgwə wəsə nya keseve hɛ shave mbe mɛa nci.

¹⁸Tagha gɛ, ma 'ya sha ghəa ɗa: ‹Katemte 'ya ki ghɛa ɗa, katenza hɛa ɗa kwele kwele kala ndaleghe.

¹⁹Kala wəfe nya nza slərəa ŋkɛ hwa yɛmə se 'ya, ncɛhwɛaɓɛ nza mɛnɛ te slekea ŋkɛ heviɗi.

²⁰Katenza zləvə te 'ya keveci keveci, bereteke tenza rəgia ɗa yitea dzeve ta ɗa.›

²¹Ɗeke ɗeke nza mbeli kafa ghena ta ɗa. Tikə tikə nza mbeli kezha fa ɗa ŋa ɗa.

²²Ma kegezemte ghena 'ya ne, wəndə shɛ kazhɛne ghə we, te wəndə te wəndə teɗe ghena ta ɗa.

²³Kaneghe ɗa mbeli kala nya neghe va mbeli. Kaghwene mɛa nci hɛ kala wəsə yitea kwa ghate ta va.

²⁴Ma kaŋ'wəshi nda ŋ'wəshi 'ya ke hɛ ne, kayɛ hɛ we, ganyɛ nya kwa kema ta ɗa yazele hɛ kanewe.

²⁵'Ya nde se kawəndə nya te ghəa nci, 'ya nde se kancɛ nda hweŋkwa ke hɛ. Hwa hɛ se 'ya kanza kala meghe nya hwa ka sewajɛa ŋkɛ, kala wəndə nya kegweɗakwe mbeli nyi keyirə yirə.»