Read KapsikiDC Job 30 Bible Online

Job 30 - KapsikiDC bible

Job 30

¹Ama tsetsenya gɛ ne, ka dɛgwəa hɛɗi ka ŋ'wəshi ɗa. Ndagwara vəashi ne, kehi ka yitehɛ nci kanza hwa kelɛa keti nyi yitea wəshi keseɗa ta ɗa we.

²Bandanyɛ ne, wa yaneghe 'ya va ka dewə berete nyi wa? Nahe berete kekiɗi va hɛ.

³Ma kwa denemte hɛ ma ba'a titikwə ne, ntake hɛ kahərəci wəshi dzeyi hwa gamba, dzeyi te ŋkwa nya dɛrɛŋe rɛŋe ba'a nya ɓeraka ɓeraka.

⁴Kaɓatse sleke nyi mɛse mɛse hɛ dzeyi te yɛ wəfe, deke slərəa wəfe ya kawəshi kezeme ta nci.

⁵Pɛtɛa mbeli kaŋka hɛ shave hwa ghəa nci, lewela yatsa mbeli yitea hɛ kala nya yitea ka ghərəa kɛfi.

⁶Pa hɛ nzanji dzawa vare zlərə, dzawa kwa yɛ gəli ba'a dzeyi mbe yɛ zlera.

⁷Kanehwene hɛ dzeyi mbe gamba, katsene geva hɛ dzeyi yitea yɛ tigə.

⁸Ka gezhia hɛɗi ba'a ŋwalea wəndə nya ɗema zləvə te hɛ, le geta ŋkamte geva hɛ te hɛɗi.

⁹Tsetsenya ne, 'ya yagha hɛ kwa cimə, ghena nya te 'ya yageze hɛ.

¹⁰Cakeɗake hɛ slənji va ndiremi nya te 'ya, katsakɛ hɛ nciɗi ɗa ndɛghwɛɗɛ kwa kema we.

¹¹Ma kwa nza ŋkɛ nahe Shala kekelehwe berete ta ɗa ba'a keweleyi ɗa ne, kashɛ hɛ fɛa yitea mene ɗa wəsə kwa ndiremi we.

¹²Ma kezha ve ɗa fete ne, mbeli nyi keɗema kambeli ganji ka sate te ŋkwa. Hweŋkwa kewele ɗa yazele hɛ, mpa yaha ɗa hɛ kezha zamte ɗa.

¹³Pɛtɛ hɛ keŋzlemte ɗa hweŋkwa, kaɗe hɛ kazamte ɗa, kwete shɛ hwa hɛ kaɗe kemane we.

¹⁴Dzawa te ŋzla nya wəba te zli dzeki hɛ sha 'ya, dzeyi hwa pelɛ nyi keŋzla ŋzla dzeyi hɛ sha 'ya.

¹⁵Pa ghazlənə tamte geva ta ɗa, pa nde kelemte zləvəa ɗa kala wəsə va sefə. Pa zeɗe nza ta ɗa zanyɛ kala ləmbə.

¹⁶Tsetsenya gɛ ne, nza ta ɗa kakiɗi, nahe vəa yaka kesləyi ɗa.

¹⁷Ma heviɗi ne, pɛtɛ 'yɛ'yɛa ɗa kampeɗe ɗa, kaghereŋe zhɛ ɗa ta nci we.

¹⁸Nahe Shala kekeseve ɗa le berete te lekwesa, ghɛke ŋkɛ keseve ɗa ŋkɛ yitea welɛ kala welɛa lekwesa nya mentɛawe.

¹⁹Pa ŋkɛ neghahwe ɗa hwa nzaɓe, tene 'ya kala keləwə ba'a pəsəɗə.

²⁰Shala yawe, katsa ŋa lewela 'ya ne, kazhɛne na we. Kaslete 'ya kwa kema ta ŋa ne, kese na kanewe ɗa we.

²¹Kazhɛre na ghyanake laka 'ya, pɛtɛ berete ta ŋa kənəa 'ya.

²²Kakele ɗa na hwa sefə parewə parewə kala gədəwə, kaŋwesa ɗa sefə nya wəba laka yayata bela.

²³Nahe 'ya keɗepe, gha kakele nda ɗa ke mte, te ŋkwa nya telə mbeli nyi teghweme pɛtɛ.

²⁴Ma vəa ŋkwa nya nza wəndə kedene dene ne, kakafe dzeve ŋkɛ wəka? Ma mbe ndiremi ne, katsa lewela wəndə wəka?

²⁵Kese 'ya kanehwene yitea mbeli nyi kesa yaka wəka? Kese helia ɗa kasla kwa nakɛ nza ta ka titikwəa kɛfi 'ya wəka?

²⁶Zeɗe nza yavate ghə 'ya te, ama ndiremi nde senyɛ. Waŋe yaneghe 'ya, ama ŋkwesle nde senyɛ.

²⁷Kafɛa helia ɗa kesla ghala kwa nza 'ya mbe yaka nya te 'ya nya we.

²⁸Kadzeghwa 'ya mbe ŋkwesle, kaɗema veci shɛ. Hwa tsene ta mbeli ne, kasate 'ya te ŋkwa kezha tsa lewela.

²⁹Laka lewela ta ɗa ne, nahe 'ya kezhɛre ɗa kawəza meghekɛa yɛ kelɛ gamba ba'a kamcɛnyɛa yɛ zhenɛgə

³⁰Nahe hweta ta ɗa keləvənyɛ ba'a kekwafenyɛ, pa mbe 'yɛ'yɛa ɗa nza 'ya kenefe nefe.

³¹Deke yitea cimə nehwene tsa geva gagera ta ɗa, yitea cimə nehwene vɛa geva shela ta ɗa.