Read KapsikiDC Job 34 Bible Online

Job 34 - KapsikiDC bible

Job 34

¹Tagha gɛ, ntake Ɛlihəw kageze ghena, ma ke:

²«Gheyɛ ka ntsehwele ntsehwele, fa mə ghena ta ɗa, gheyɛ ka ɗepe wəshi, ve mə sleme yitea ghena ta ɗa.

³Kwa nza ŋkɛ ne, fa ghena ya kaslene ta sleme kala nya fa zeɗea wəsə kezeme mɛ.

⁴Zele ɓəmə wəsə nya tiɗiɗi kanya kwetɛŋe, sepa ɓəmə wəsə nya kehi kanya kwetɛŋe.

⁵Ma ke Job gezete: ‹Wəndə nya tiɗiɗi 'ya, ama kaɗe Shala kave ɗa kawəndə nya tiɗiɗi we.

⁶Ma kwa zele nza tiɗiɗi 'ya ne, kande tseŋwə zhɛre 'ya. Kemenete jaɗafa 'ya we, ama pa ɗakɛ ɗa le zhi kemte.›

⁷Wa wəndə nya kala Job tse wa? Kahe kahe ŋele Shala ŋkɛ kala sa ta yɛmə.

⁸Zlaɓe dzeghwa ŋkɛ le ka mefətekwə, jikə nza ŋkɛ le ka ndiremia mehele.

⁹Kwa nza ŋkɛ ma ke gezete: ‹Wəsə shɛ kakemave wəndə mbe hawe va Shala we.›

¹⁰Gheyɛ mbeli nyi nza mehele ve, fa mə ghena ta ɗa! Kegeze 'ya kamene wəsə kwa ndiremi Shala, kamene mbəɗəkwə Nde berete 'ya we!

¹¹Ama kaɗa nda zhɛme ŋkɛ ke wəndə kala slene ta ŋkɛ, kala dzeghwa ta yayata wəndə mene nda ŋkɛ.

¹²Kaganda ne, kamene wəsə kwa ndiremi Shala we, kameha ghwə ɗafa Nde berete we.

¹³Kwete wəndə nde dapate nda hɛɗi te dzeve na? Kwete wəndə nde ndeke nda hɛɗi lema na?

¹⁴Ma ya ghəa ŋkɛ yadambeghənyɛ Shala yite, ma ya nahe ŋkɛ kezhɛnehwe sefəa mpia ŋkɛ ne,

¹⁵nza te və nya kwetɛŋe tempə wəshi nyi nza mpi hwe ba'a katezhɛne wəndə kanza kahɛɗi.

¹⁶Ma kwa nza na kande ɗepe wəshi ne, fa ba'a ve sleme yitea ghena ta ɗa:

¹⁷Kaganda nza wəndə nya keɗema kaganda kaslekete ŋkwa na? Kaganda ɗe na kave nda fete ke Wəndə nya tiɗiɗi, ke Nde berete na?

¹⁸Deke Shala nde nza kageze: ‹Wəsəa kwadanyɛ wəndə› ke sha meghe ba'a ‹Ka mpə ŋkwa yɛ› ke sha mbeli nyi te ghə.

¹⁹Deke gheŋkɛ nde ɗema kakemane mbeli nyi te ghə ba'a ɗema kanta ghala kwelɛ yɛ nde mcɛlə le nde titikwə. Kwa nza ŋkɛ ne, gheŋkɛ nde pate hɛ pɛtɛ.

²⁰Taghanyɛ ne, kampə hɛ te tepe ta viɗi, ma kagaŋkəɗə mbeli ne, kampə mbeli nyi te ghə. Rayɛ sebe te ka ghwərə ghwərəa ntsə kaɗema gəli yite.

²¹Kwa nza ŋkɛ ne, te dzeghwa ta mbeli ntsə ta Shala, pɛtɛ newe ŋkeɗe ta seɗa ta nci ŋkɛ.

²²Viɗi keɗema ŋkwesle nyi diŋwədi shɛ kafɛake ŋkɛ kenewe ka mene wəshi nyi ndiremi ndiremi we.

²³Kakele zəzə Shala kwele kwele te wəndə nda kele ŋkɛ kadzete ghwə we.

²⁴Kaɗema ŋkɛ keneweve megela ne, kafə mbeli nyi berete berete ŋkɛ sawa te meghe ba'a kabete kweci mbeli ŋkɛ te ŋkwa nci.

²⁵Kwa nza ŋkɛ nahe ŋkɛ keɗepe wəshi nyi mene hɛ. Kafə hɛ ŋkɛ sawa te meghe ba'a kampə hɛ ŋkɛ mbe viɗi kwetɛŋe.

²⁶Kampa hɛ ŋkɛ le balema kwa ntsə ta mbeli kala ka mpə ŋkwa.

²⁷Va nya ɗema hɛ kese kaɗe kazele ŋkɛ, kefave wəshi nyi teke nda ŋkɛ ke hɛ.

²⁸Tsagha ŋkate ka titikwəa kɛfi hɛ katsa nda lewela, ntake Shala kafa nehwene ta ka dewə ŋeli!

²⁹Ama nda divə nzanyɛ Shala ne, wa nde teve nda fete wa? Ma kewəfərənyɛ ŋkɛ ne, wa nde nza kantsate ŋkɛ wa? Ama kanewe ghweme ŋkɛ te yɛ hɛɗi ba'a te mbeli nyi te hɛ.

³⁰Kaɗe ŋkɛ kanza nde ndiremia mehele, nde ŋa nda keleŋa ke mbeli te ghəa mbeli we.

³¹Banda ta ŋkɛ ma kegeze nda wəndə ke Shala: ‹Nde jaɗafa 'ya, kazhɛne 'ya kamene wəsə kwa ndiremi we.

³²Ncɛte ɗa fete ta ɗa nyi ɗema 'ya kenakɛ. Ya 'ya menete wəsə kwa ndiremi ne, katezhɛne 'ya kamene we.›

³³Kahi Shala kave ɗa te na? Tsema ŋa ŋa zəzə, gha nya keŋ'wəshi ŋkwa wa? Ma kwa nza ŋkɛ gha nde tare, kaɗema ka'ya ne, gezete wəsə nya ɗepe na te.

³⁴Ma tegeze ɗa mbeli nyi nza mehele ve ba'a ka ntsehwele ntsehwele nya kefate ghena ta ɗa:

³⁵‹Ghena dewə ntsehwele yageze Job. Slə kwa ghena nyi geze ŋkɛ we.

³⁶Kaɗe 'ya ka'yɛwete ghena mbeli va Job, pa te və nya tendɛkwe ŋkɛ, va nya nza ŋkɛ kageze ghena kala nde mene wəsə kwa ndiremi.

³⁷Kwa nza ŋkɛ fama ghena yamtsehe ŋkɛ kadzevare jaɗafa ta ŋkɛ, gezleŋe ghə yave ŋkɛ mbe gheɓəmə ba'a mtsehe yamtsehe ŋele Shala ŋkɛ.›»