Read KapsikiDC Job 35 Bible Online

Job 35 - KapsikiDC bible

Job 35

¹Tagha gɛ, ntake Ɛlihəw kageze ghena, ma ke:

²«Ma zəzə na ne, tiɗiɗi nza ta ŋa kwa geze na: ‹Tiɗiɗi ma 'ya ke Shala› pa na?

³Kwa nza ŋkɛ ne, ma pa na gezete: ‹Wa yakemanakɛ ɗa ŋkɛ le wa? Wa yaketekɛ ɗa menema jaɗafa le wa?›

⁴'Ya nde tezhɛne ŋa ghena ta ŋa ba'a ŋa ka mcɛhɛ ŋa nyi zlaɓe le gha.

⁵Newe pa sha ghweme, mare pa sha yɛ ləmbə: pelɛagha hɛ kənəa ghəa ŋa!

⁶Ma kemenete jaɗafa na ne, Shala yatsakɛ ŋkɛ na? Ma kemtsehete fama ghena na ne, wa yamene nda nde wa?

⁷Ma kenza na tiɗiɗi ne, wa yaŋ'we ŋkɛ wa? Wa yakema ŋkɛ va gha wa?

⁸Mbeli kala gha yatsakɛ wəsə kwa ndiremia ŋa, deke mbeli kala gha yakete wəsə kwa ganyɛa ŋa.

⁹Ghə yaŋgaɗe mbeli va wəba ta yaka, lewela yatsa mbeli va bəla ta ka ghwərə ghwərəa ntsə.

¹⁰Ama wəndə shɛ kegeze: ‹Tema Shala nya kepate ɗa, gheŋkɛ nya keve nda gha cimə ke mbeli heviɗi,

¹¹gheŋkɛ nya keteke ɓəmə wəshi za ma ke wəshi keseɗa nyi te hɛɗi ba'a nya keve ɓəmə ntsehwele za ma ke 'yɛ nyi yitea ghweme wa?›

¹²Ya tema tema ne, lewela yatsa mbeli va kele ghəa ka 'yaghwa mehele, ama kazhɛne Shala we.

¹³Kaganda ne, kafa ghena kwada Shala we, kave sleme Nde berete yite we.

¹⁴Ama gha nde gezete kaɗema na kanakɛ ŋkɛ, ndagwara ve ghena ta ŋa ba'a neghe yaneghe ŋkɛ na.

¹⁵Ama tsetsenya keɗema hwepe wənəa ŋkɛ kencɛte geva ba'a keɗepema fama ghena ta wəndə ŋelɛ ŋkɛ ne,

¹⁶ghena kwada ka same kwa mɛa Job ba'a ghena dewə mehele yagegeze ŋkɛ.»