Read KapsikiDC Job 36 Bible Online

Job 36 - KapsikiDC bible

Job 36

¹Pa Ɛlihəw mtsehete geze ghena, ma ke:

²«Ntsagwe ŋa Job, 'ya kateteke ŋa wəshi. Mba kweci ghena va 'ya kageze te ghəa Shala.

³'Ya katencɛ nda ɗepe wəsə ta ɗa ke mbeli nyi cakeɗa kezha ve nda kaganda ke Shala nya kepate ɗa.

⁴Kaganda yageze 'ya, kasla tseŋwə 'ya we, wəndə nya keɗepe wəsə tsape ya yitea gha.

⁵Berete ya va Shala ba'a kaɓelama ŋkwa ŋkɛ we. Berete ya va Shala ba'a kaslə ŋkɛ te ghena nyi tarete ŋkɛ we.

⁶Kasərə nde 'yaghwa mehele ŋkɛ teghweme we, ama kameha nda ghwə nya tiɗiɗi ŋkɛ ke ka dewə ŋeli.

⁷Kakele ntsə ŋkɛ seyi te mbeli nyi tiɗiɗi we. Kabete hɛ ŋkɛ pelɛ pasla le ka meghea kɛfi, kantishɛ hɛ ŋkɛ pelɛ kaghala ghala yitea kele ghə hɛ.

⁸Ma nda nza hɛ kehwepe hwepe kwa zewe lɛ, nda sa yaka hɛ kwa zewe ne,

⁹wəshi nyi menete hɛ yaɗe ŋkɛ kancɛ nda ke hɛ ba'a fama ghena ta nci vəa ŋkwa nya kele ghəa nci hɛ.

¹⁰Kaghwene sleme ta nci ŋkɛ yitea ŋele ta ŋkɛ, kageze nda ŋkɛ ke hɛ kasərə wəsə kwa ndiremia nci.

¹¹Ma ya kafa ŋa Shala hɛ ba'a kahawe hɛ ve ne, nza katekiɗi hɛa nci hɛ mbe zeɗe nza, yɛ va ta nci hɛ mbe zlama.

¹²Ama keɗema hɛ kafa ne, katempə va megha, kateza sebe te hɛ va dewə ntsehwele.

¹³Kaganda ne, mbe hwepe wənəa nci nza ka ndiremia mehele, ma vəa ŋkwa nya hwepe hɛ Shala kwa zewe lɛ ne, katsa lewela hɛ we.

¹⁴Mba hɛ kaka mempɛhwetɛti nda mpə hɛ, kala ŋa ka megelɛshi nyi kemene vale tahe kiɗi mpia nci.

¹⁵Ama kambele nde titikwə Shala laka titikwə, laka yaka ghwene sleme ŋkɛ te.

¹⁶Gha perə ne, nahe ŋkɛ kembelete ŋa va yaka, nahe ŋkɛ kendeke ŋa ŋkwa ganyɛ, wəshi kezeme ganji ka se kwele kwele te tabelea ŋa.

¹⁷Ama nahe fete kendeke ŋa geva kala nde 'yaghwa mehele, kambeɗemte geva ɗa nya kevate geva te gha we.

¹⁸Yagha hwepe wənə kaŋkeyite ŋa yitea wəsə kwa ndiremi! Ntsehwele yitea mene nda mbəɗəkwə ke Shala laka wəshi gəmə nyi ganji ganji.

¹⁹Wərə lewela ta ŋa kezha ɗema na kanza mbe yaka na? Wərə nza pɛtɛa berete ta ŋa na?

²⁰Vema zəzə na te viɗi nya teŋkamte geva nya mbeli shave mbe hɛɗia nci ma.

²¹Ya ghəa ŋa va zhɛre nda geva ke wəsə kwa ndiremi, kwa nza ŋkɛ tewəmbəreke gheŋkɛ nza na mbe ndiremi.»

²²Kaganda ne, Shala ya kwele laka berete ta ŋkɛ. Wa nde nza katekete nda wəshi ke mbeli kala gheŋkɛ wa?

²³Wəndə nya kencɛ nda hweŋkwa ya shɛ na? Wəndə shɛ kageze: Wəsə kwa ndiremi yamene na, ke shɛ na?

²⁴Zəzə ɓetəkə kave zləvə te wəshi nyi menete ŋkɛ. Tewəmbəreke ghenci ne, gheŋkɛ yatsahe mbeli le cimə.

²⁵Pɛtɛa mbeli kanewe wəshi nyi menete ŋkɛ, se cakeɗake ne, kanewe newe wəshia shɛhɛ mbeli.

²⁶Kaganda ne, wəbake Shala, ama kafave ŋkɛ gheɓəmə we. Kaɓelate kwele kwelea va ta ŋkɛ gheɓəmə we.

²⁷Kazhɛne yɛmə ŋkɛ kadzeme sha ghəa ŋkɛ, kazhɛre ŋkɛ kaləmbə yitea me va.

²⁸Tagha gɛ, kame va ləmbə kasawa ba'a kasheke ŋkɛ kadzeghəa mbeli kwele kwele.

²⁹Wa nde nza kafave taze geva ta ləmbə ba'a gaka ta va mbe ghweme wa?

³⁰Kaslesla va Shala dzeyi te ghweme ba'a kadzawa ŋkɛ hwa'a kwa yɛ zeweve ta ndərə.

³¹Laka va nya me ŋkɛ meha ghwə ŋkɛ te mbeli ba'a ve nda wəshi kezeme ŋkɛ kwele kwele ke hɛ.

³²Kawəfərə sla ta va ŋkɛ mbe hwə dzeve ta ŋkɛ, kwa sebe ta ŋkɛ, kadzeghe nda ŋkwa nya lə ŋkɛ te.

³³Gaka ta va nde ncɛ se ta ŋkɛ, pa le wəshi keseɗa keɗepe se ta ŋkɛ.