Read KapsikiDC Job 37 Bible Online

Job 37 - KapsikiDC bible

Job 37

¹Vatse nza wənəa ɗa kaslesla ba'a katsetsərəkə mbe hate ta ɗa.

²Fa mə, fa mə gaka ta ŋwələa Shala, ghwəghwə nya kesame kwa mɛa ŋkɛ.

³Kaghwene sla ta va ŋkɛ dzeyi te ghweme, se te kwete mendɛkwe ta hɛɗi hwa'a te kwete.

⁴Kwa sebe ta ŋkɛ ne, kaghwəghwə ŋwələa ŋkɛ, mbe kwelea ŋkɛ ne, kagaka ŋwələa ŋkɛ. Taghanyɛ ne, werete ŋkɛ pelakɛ yɛ sla ta va nda tegaka ŋwələa ŋkɛ.

⁵Shala kancɛ wəshi meŋelea ŋkɛ laka gaka ta ŋwələa ŋkɛ, wəshi nyi jama jama nyi ɗepema gheɓəmə yamene ŋkɛ.

⁶Ma ke sha geze nda ke kwacakelɛ: Me te hɛɗi! Kaghwene va nya wəba, mbəzliməa va ŋkɛ.

⁷Ma vəa ŋkwa shɛ ne, wəsə shɛ kashɛ mbeli mene we. Deke slene nyi mene Shala yanza hɛ kaɗepete.

⁸Kalə wəshi keseɗa nyi hwa gamba kadzete ghweɓea nci, kaɓelahe hɛ kwa ghɛa nci.

⁹Kase sefə nya laka bela kwa zeme ba'a sefə nya keheka ntasle laka bela kwa gwela.

¹⁰Va zhɛne mpi ta Shala ne, kamene geva kwacakelɛ, kazhɛre yɛmə ntɛaŋe ntɛaŋe kala pelɛ.

¹¹Kave lɛnɛa ŋkɛ kadzembe yɛ ləmbə, kaviɗi hɛ ŋkɛ le slesla ta va ba'a kaghwene hɛ ŋkɛ laka yayata bela.

¹²Kazhɛre hɛ ŋkɛ laka yayata bela kala nya zəzəte ŋkɛ. Tsagha ne, wəshi nyi gezete ŋkɛ yamene hɛ te hɛɗi lema.

¹³Kaghwene ləmbə Shala kezha ɗa mbeli nyi te hɛɗi keɗema kezha ncɛ nda ganyɛa mehele ta ŋkɛ ke hɛ.

¹⁴Job, keseve mehele yitea wəshi nyi pɛtɛ, ghereŋe shɛ na neweve wəshi meŋelea Shala.

¹⁵Nahe na keɗepe tsema tsema sleke hɛ Shala ba'a tsema tsema slesla va ŋkɛ te ləmbə na?

¹⁶Nahe na keɗepete tsema tsema ghereŋeyi geva ləmbə na? Kezha mene wəshi meŋele nyi ne, nda ɗepe wəsə nya tiɗiɗi kanza shɛ.

¹⁷Ma gha nya nza lekwesa ntasle kənə vəa ŋkwa nya nza hɛɗi kepesa pesa va sefə nya kesame laka bela kwa zeme ne,

¹⁸gha nde kemanakɛ Shala kapele ghweme nya ntɛaŋentɛa kala deraŋgale kwa lɛ lɛ na?

¹⁹Tekete ɗa ghena nya hi gheɓə kageze nda ke Shala. Ama ghena ganyɛ va gheɓə we, mbe ŋkwesle mə.

²⁰Ma kwa geze ghena 'ya ne, nda mbeli kagezete nda na? Nda mbeli kagezete nda nahe kwete wəndə kegezete ghena na?

²¹Tewə ketemə ne, kanakɛ ŋkwa mbeli wɛŋe we: nahe veci kewəfərəakɛ geva mbe ləmbə. Tagha gɛ, mpahwe sefə ntsa ba'a tsalemte ləmbəa shɛ.

²²Hwa'a waŋe nya kala mze kwa tere tere sawa laka bela kwa gwela, ntake waŋe nya tɛzlɛzlɛ kaɓele yitea Shala.

²³Shala nde berete nya ɗema gheɓəmə kateɓakɛ ŋkɛ, wəbake ŋkɛ laka berete ta ŋkɛ ba'a tiɗiɗia ŋkɛ, kasa nda yaka ŋkɛ ke wəndə nya tiɗiɗi fate fate we.

²⁴Vatse nda hawe mbeli ve. Ama kave ntsə ŋkɛ te mbeli nyi keve ghəa nci kaka ntsehwele ntsehwele we.