Read KapsikiDC Job 38 Bible Online

Job 38 - KapsikiDC bible

Job 38

¹Tagha ne, pa Mahwətə zhɛnete nda ghena shave mbe tepe ta sefə nya wəba ke Job, ma ke:

²«Wa ŋkɛ na, gha nya kekele zləvə te zəzə ta ɗa laka geze ghena kala nde dewə ntsehwele wa?

³Hite geva megela, ghereŋe za za: 'ya kate'yɛwe ghena va gha kezha tezhɛne ɗa na.»

⁴Tema na nda mɓete shihəa hɛɗi 'ya wa? Ma nda nahe na keɗepe kaganda ne, gezete ɗa.

⁵Nahe na keɗepe wəndə nya keveyi yɛ dzeghe ta ŋkɛ na? Wa wəndə nya kedzeghete ŋkɛ le zewe wa?

⁶Te nyama wəsə ntareyi geva selə nyi yite wa? Wa nde mɓeyi pelɛ nya te megwekwe ta ŋkɛ,

⁷vəa ŋkwa nya gha cimə saseregwa nyi masheke kanya kwetɛŋe, vəa ŋkwa nya tsa gaghwe ka ghwene ta Shala wa?

⁸Wa nde ŋzlete gelembe mɛa ndərə vəa ŋkwa wəvəɗə wəvəɗə ŋkɛ same kwa zeweve ta hɛɗi wa?

⁹'Ya ŋkɛ! 'Ya nde zhiɓəyi ləmbə kənə, 'ya nde dəpəyi ŋkɛ mbe meləkwə ləkwə nya zhikwətəkwə.

¹⁰Pa 'ya dzakwemte hwɛ ta ŋkɛ, veyi nda ghala, mɓeyi gelembe mɛ ba'a veyi wəbəzli te.

¹¹Ma 'ya sha ndərə: «Hwa'a teke telə na, ləma na cakeɗake ma! Kaganda ne, teke tezhigə kele ghə ta wəvəɗə wəvəɗə ta ŋa nyi!»

¹²Ya kwetɛŋe zhigə mbe nza ta ŋa ne, nahe na kegha kaslekete kiɗi ta ŋkwa na? Nahe na kegha kageze nda ke pesle ta ŋkwa,

¹³kezha keseve hɛɗi ŋkɛ te sleme te sleme kezha bekwemte ka ndiremia mehele na?

¹⁴Tagha ne, pa hɛɗi zhɛrenyɛ kala ŋkwa nya te lamba rekɛ, kerafe rafe kala lekwesa gəsəkə.

¹⁵Ama ndaŋe nza ka ndiremia mehele te waŋea nci, nahe dzeve ta nci nya kekafete geva kaɗa ŋkwa keɓelenyɛ.

¹⁶Nahe na kegha se te ŋkwa nya same ndərə kwa na? Nahe na kegha kadzeghwa kwa zeweve ta ndərə nya wəba na?

¹⁷Nahe gelembe nyi mɛa ghɛa mbelia kwahɛɗi kegha kancɛte ŋa geva na? Nahe na kegha kanakɛ ŋkwa kedzawa ghɛa mbelia kwahɛɗi na?

¹⁸Nahe na kegha kazəzə te wəba ta hɛɗi lema na? Ma nda nahe na keɗepe wəshi nyi pɛtɛ ne, gezete ɗa.

¹⁹Tema ŋkwa nya nza waŋe te wa? Take ŋkwesle ne, tema ŋkɛ le nza wa?

²⁰Wərə na kabegheghe hɛ kalə te ŋkwa nya nza hɛ shɛ na ɗepete hweŋkwa ta ghɛa nci na?

²¹Wərə na kaɗepete megela, gha nya keyake geva vəashi!

²²Nahe na kegha kase te ŋkwa nya tseneyi geva mɛnɛ na? Nahe na kegha kanakɛ tame nyi nza kwacakelɛ kwa na?

²³'Ya nde wəmbəyi hɛ kezha vəa ndiremi, kezha vecia heɗe geva ba'a kezha vəa mpa.

²⁴Nahe na keɗepe ŋkwa nya se waŋe ba'a ŋkwa nya se sefə nya kesame kwa zeweve ta ghweme kezha pesle geva te hɛɗi te na?

²⁵Wa nde ntseyite nda ŋkwa yitea ghweme ke va wa? Wa nde helete nda hweŋkwa ke sla ta va nya kegaka wa?

²⁶Wa nde me va kadzete hɛɗi nya ɗema mbeli te, kadzete ɓerama nya ɗema wəndə te wa?

²⁷Wa nde behe hɛɗi nya keghwele ghwele le yɛmə kezha pese ba'a kezha kele gwəzə wa?

²⁸Yita ya shɛ te va na? Wa nde ncake mɛnɛ nyi ketiɗi wa?

²⁹Same kwa hwəa nyama ma yake geva kwacakelɛ wa? Wa nde yake mɛnɛ wa?

³⁰Tagha ne, kazhɛre yɛmə ntɛaŋe ntɛaŋe kala pelɛ, kazhɛre ŋkwa nya kənəa ghəa ndərə helambaŋe.

³¹Wərə na kandenderate ka danehi te zewe keɗema kapelemte ka kese sla te na?

³²Wərə na kancake nehe ta yɛ vɛa le ghele ba'a kancɛte nda hweŋkwa ke yɛ saseregwa kwa tɛhwɛɗi le ŋwalea ŋkɛ na?

³³Nahe na keɗepe wəshi mahalegə nyi pelɛ ghweme na? Gha ya te ghəa wəshi nyi mene hɛ kwake te hɛɗi lema na?

³⁴Gha nde zlape nda ghena ke ləmbə kezha me va kasawa kadzeghəa gha na?

³⁵Gha nde ghwene yɛ slesla ta va kalə te ŋkwa nya zhigə hɛ na? Kageze hɛ: «Te dzeve ta ŋa n'yɛ», ke hɛ sha gha na?

³⁶Wa nde ndeke nda ntsehwele ke ghagha ba'a nde ndeke nda ɗepe wəsə ke ŋələ wa?

³⁷Wa nde nza kaɓelate ləmbə ba'a kashɛkakawa yɛmə nyi kwa weta nyi pelɛ ghweme,

³⁸kezha zhɛre keləwə kanzaɓe ba'a kezha nza təsə dzeyi mbe yɛ wəve wa?

³⁹Gha nde kese nda wəsə kezeme ke ŋemalea nivɛrə, gha nde behe ŋwalea nivɛrə,

⁴⁰vəa ŋkwa nya nza hɛ te ghweɓea nci keɗema nya wəmbə wəshi hɛ dzeyi mbe gamba na?

⁴¹Wa nde wəmbə nda wəshi kezeme ke ghame, vəa ŋkwa nya tsa nda lewela ŋwalea ŋkɛ ke Shala ba'a nya ndeŋe hɛ va ma wa?