Read KapsikiDC Job 39 Bible Online

Job 39 - KapsikiDC bible

Job 39

¹Nahe na keɗepe və nya ya ŋwale yɛ le kwa na? Nahe na kegha kanakɛ yɛ kɛme kaya ŋwale na?

²Tere ŋkwini mene ŋwalea nci kwa hwə wa? Nahe na keɗepe və nya ya ŋwale hɛ te na?

³Kaɓelahe hɛ kezha ya ŋwalea nci ba'a kambele hɛ va zhɛ ta nci.

⁴Kakema berete ŋwalea le ba'a kakele hɛ waɗe, kwa sebe ta ŋkɛ ne, kaslə hɛ yitea megheyɛa nci ba'a kazhɛne geva hɛ kase we.

⁵Wa nde pelakɛ kwara gamba waɗe wa? Wa nde pelemte zewe nya kwa wa?

⁶'Ya nde ndeke nda nza te hɛɗi nya keghwele ghwele, hɛɗi nya ghwənəghwə ya kaŋkwa kenza ta ŋkɛ.

⁷Kazhɛ nda ŋ'wəshi va gaka nyi mbe meleme ba'a kegha ŋkɛ kafate heka ta nde sleke ŋkɛ we.

⁸Kadzeghwa ŋkɛ dzeyi hwa ghweme, ŋkwa kezeme gwəzə ta ŋkɛ, gwəzə nyi menjaɓa yazele ŋkɛ le mehele.

⁹Kateyɛ sla gamba kamene ŋa slene na? Katehɛ ŋkɛ kwa gəzhia ŋa na?

¹⁰Katehwepe ŋkɛ na kezha wəza ŋa wəza na? Katezele ŋa ŋkɛ dzate te deɓa le wəsə kempə təsə na?

¹¹Kateve ghə na te va wəba ta berete ta ŋkɛ ba'a katewəfə nda slene ta ŋa na na?

¹²Kateve zəzə na te kezha fə wəshia ŋa sheke kwamte ba'a kezha tsene hɛ te lane ta ŋa na?

¹³Kampempa geva bidzə zhenɛgə le zlama, ama kashɛ ŋkɛ zlə kala kwaghela we.

¹⁴Ama katewəfə yɛ slesle ta ŋkɛ ŋkɛ te hɛɗi, kasərə hɛ ŋkɛ kavereghe te ndaleghe,

¹⁵kazəzə ŋkɛ wərə seɗa kampəmte hɛ we, wərə wəshi keseɗa nyi hwa gamba kaŋkeɗemte hɛ we.

¹⁶Kama nya ghyana nde sha ŋwalea nta, kala wəsə nya ɗema hɛ kaŋa nta. Katsakɛ ŋkɛ yaka nya sahwe nde gəmə we.

¹⁷Va nya ŋkate nda ntsehwele 'ya, 'ya Shala, kendeke nda ɗepe wəsə 'ya kaŋa ŋkɛ we.

¹⁸Ama satema ta ŋkɛ te ŋkwa kezha hwɛ ne, kaŋ'wəshi gədəwə ba'a wəndə nya pelɛ ŋkɛ.

¹⁹Gha nde ndeke nda berete ke gədəwə, nde pesete nda gadza te welɛ

²⁰ba'a nde ve nda mpereke kala hegi na? Kadake ŋkwa gaka ta yɛyia ŋkɛ.

²¹Kagaka yɛ cɛpea ŋkɛ dzate kwelɛ zlərə ba'a kahwɛ ŋkɛ te kema ta ka sewajɛ le berete.

²²Kaɓela ghazlənə ŋkɛ we, kadake ŋkɛ va wəsə we, kazhɛre geva ŋkɛ dzeyi te sebe va kafayɛ we.

²³Te wəmbəa ŋkɛ ne, kagaka wəshi kempa: gwecɛ, megha nya keslesla ba'a kafayɛ

²⁴Ma kwa nza geva ta ŋkɛ yare yare ne, ntake ŋkɛ kahwɛ le berete. Vɛma ta tereme ne, kazhɛne ŋkɛ kakeseyi ghəa ŋkɛ we.

²⁵Kala nya vɛte geva tereme ne, katsa yɛyi ŋkɛ. Se cakeɗake ne, kafa zəŋwəa mpa, gaka ta mbeli nyi te ghə ba'a gaka ta ka sewajɛ ŋkɛ.

²⁶Laka ɗepe wəsə ta ŋa zlə mazavɛ, pele bidzə ŋkɛ dzawa laka bela kwa zeme na?

²⁷Gha nde geze nda ke zele kadzeme kapa ghɛa ŋkɛ pelɛ ghəa ghweme na?

²⁸Pelɛ ghəa ghweme nza ŋkɛ, pelɛ mepeɗeŋelɛ nya ɗema mbeli kateɓakɛ.

²⁹Sawa pelɛagha ne, kanewe wəsə nya tekese ŋkɛ, kanewe wəsəa shɛ ntsə ta ŋkɛ se cakeɗake.

³⁰Mimi yasa ŋwalea ŋkɛ. Te ŋkwa nya nza wəshi nyi kempə mpə nza ŋkɛ.