Read KapsikiDC Job 4 Bible Online

Job 4 - KapsikiDC bible

Job 4

¹Tagha gɛ, laŋe Ɛlifaz, nde Tɛman te ghena, ma ke sha Job:

²Kaɗe 'ya kageze ŋa ghena we, kwele kwele yirə ŋa na. Ama kashɛ 'ya nza ɗa divə we.

³Gha ne, kwele kwele ncɛte nda ntsehwele na ke mbeli, nahe na keɗepe mtsehe nda berete ke ka dewə ŋeli,

⁴kakese mbeli nyi keseraɗe ghena ta ŋa sate te ŋkwa, kaslete mbeli nyi kese metsehwekwe na.

⁵Ma tsetsenya gɛ ne, ŋa ŋa nya və, keyirə yirə na. Ma kwa me ndiremi te gha ne, nahe na kedake ŋa.

⁶Gha nya kehawe va Shala gɛ ne, mba na kave nda ghə na? Wərə dzeghwa tiɗiɗia ŋa kandeke ŋa mbele tse gɛ na?

⁷Zəzəte: nahe na kegha kanakɛ mbeli nyi ɗema fete va hɛ keɗema mbeli nyi tiɗiɗi kampə va ndiremi na?

⁸Nahe 'ya keneweve megela: ma mbeli nyi kewəzate wəsə kwa ndiremi ba'a nyi ketsawete yaka ne, wəsə kwa ndiremi ba'a yaka yamene hɛ se te wəve.

⁹Ma kezhɛnete mpi Shala ne, kampə hɛ, ma kehwepe wənəa ŋkɛ ne, rayɛ za sebe te hɛ.

¹⁰Kaghwəghwə hɛ kala nivɛrə ba'a kala deghwava, ama pa mpəmte slene kwa mɛ va megelɛshia nivɛrə.

¹¹Kampə yɛ nivɛrə va titikwə wəsə kezeme, kataze geva ŋwalea nci kwetɛ kwetɛŋe.

¹²Pa 'ya fate ghena nya tewəfərə, pa sleme ta ɗa fate ndəghwə ndəghwə.

¹³Heviɗi menete geva ŋkɛ, te shiwə, vəa ŋkwa nya nza mbeli ca'a ca'a yitea hɛ.

¹⁴Pa 'ya dake ɗa, pa ntasle zhɛte ɗa, ntake pɛtɛa geva ta ɗa kabare bare.

¹⁵Pa kwete sefə vɛte geva seyi mɛa kema ta ɗa, pɛtɛ shinti sletenji te geva ta ɗa.

¹⁶Pa kwete wəndə sletenyɛ tagha, keɗepete wəndəa shɛ 'ya we. Kanewe newe nza ta wəndəa shɛ ntsə ta ɗa. Tikə tikə ŋkwa, zhɛne ne, pa 'ya fate ghena. Ma ke:

¹⁷«Wərə wəndə ŋelɛ kanzanyɛ tiɗiɗi ma ke Shala na? Wərə ŋkɛ kanzanyɛ wɛŋe ma ke nde pate ŋkɛ na?

¹⁸Newema: kagezleŋe ghə Shala va ka ghwene ta ŋkɛ, kazele fete nyi menete ka mene slene ta ŋkɛ ŋkɛ.

¹⁹Tsagha ne, tsema ɗema ŋkɛ kagezleŋe ghə va mbeli wa? Kwa nza ŋkɛ ne, le rekɛ pate geva hɛ, hɛɗi geva ta nci. Wərə hɛ kampaslɛmte geva kala zhiwə.

²⁰Wərə sebe kazamte geva te hɛ mbe veci kwetɛŋe. Kaza geva hɛ kaghala ghala, kaɗema wəndə kevate mehele te hɛ.

²¹Nahe zewe nyi kekeseyi hɛ te ghweme keŋslenji. Katempə hɛ va titikwə ntsehwele.»