Read KapsikiDC Job 40 Bible Online

Job 40 - KapsikiDC bible

Job 40

¹Tagha gɛ, ma ke Mahwətə gezete nda ghena ke Job:

²«Gha nya keghəpə le Nde berete ne, kazhɛne na kageze ghena te na? Gha nya kembeɗe mɛ le Shala ne, mba na kanteɗe mɛa ŋa na?»

³Tagha ne, ma ke Job zhɛnete nda ke Mahwətə:

⁴«Wəsə kwadanyɛ 'ya, wa ghena nya va 'ya kazhɛne ŋa wa? 'Ya kampa ghəa ɗa le dzeve te mɛ.

⁵Kwele kwele gezete ghena 'ya, kazhɛne 'ya kageze ghena we. Ɓəshi 'ya kageze ghena we, tsetsenya ne, 'ya kanza divə.»

⁶Pa Mahwətə zhɛnete nda ghena ke Job shave mbe tepe ta sefə nya wəba, ma ke:

⁷«Hite geva megela, ghereŋe za za: 'ya kate'yɛwe ghena va gha kezha zhɛne ɗa na.

⁸Kaganda ɗema meha ghwə ta ɗa na na? Gha ɗe kave ɗa fete yitea nza kaganda va gha na?

⁹Berete ya va gha kala 'ya na? Kagaka ŋwələa ŋa kala va kala ŋa ɗa na?

¹⁰Ma kenza ŋkɛ tsagha na ne, seɗete zləvə ba'a kwele kala lekwesa, pesakɛ geva le ndeɗe ba'a wəba.

¹¹Pelakɛ ghwə ta hwepe wənəa ŋa, laka ghwərəzlə ŋkwa ta ŋa ne, shifəmte pɛtɛa ka kele ghə.

¹²Laka ghwərəzlə ŋkwa ta ŋa ne, kelemte zləvə te hɛ, ŋkeɗemte ka 'yaghwa mehele te ŋkwa shɛnyɛ.

¹³Lame hɛ pɛtɛ mbe hɛɗi kanya kwetɛŋe, ŋzleyi hɛ kwa ghɛa mbelia kwahɛɗi.

¹⁴Tagha gɛ, 'ya le ghəa ɗa nde tetsahe ŋa, kwa nza ŋkɛ nahe berete ta ŋa kendeke ŋa hərə ŋkwa.»

¹⁵Newema mamena yɛmə, 'ya nde pate ŋkɛ kala nya pate ŋa 'ya. Gwəzə yazeme ŋkɛ kala sla.

¹⁶Newema berete nya dzate te geva ta ŋkɛ ba'a vərəvəa sli nya dzate te hwəa ŋkɛ.

¹⁷Dzaŋe dzaŋe sheghe ta ŋkɛ kala sheghwəa lekeleke, ketsa tsa berete nyi dzate te yɛ basa ta ŋkɛ.

¹⁸Bereteke teke yɛ 'yɛ'yɛa ŋkɛ kala geta mze kwa ghwə ghwə, yipə yipə yɛ slerepe ta ŋkɛ le yɛ geta lɛ.

¹⁹Gheŋkɛ ya za ma hwa wəshi nyi pate 'ya, ama deke 'ya nya kande pate ŋkɛ nde nza kahərəte ŋkɛ.

²⁰Yɛ wəmbə ka ha nda gwəzə, te ŋkwa nyi raberə wəshi keseɗa nyi hwa gamba.

²¹Dzeyi hwa yɛ ghwəli ghwa ɓelahe ŋkɛ, dzeyi hwa tere nyi te ghwa wəfərə ŋkɛ.

²²Yɛ ghwəli ghwa ka mene nda shenaŋkwe, wəfe nyi jama jama nyi dzeyi mɛa hələ ka dzasle ŋkɛ.

²³Ya hələ viɗinyɛ ne, katsakɛ ŋkɛ we. Ya yɛmə nza pa kwa mɛa ŋkɛ ne, divə nza ŋkɛ.

²⁴Wa nde nza kakeseve ŋkɛ kenza ntsə ta ŋkɛ tepele wa? Wa nde nza kakeseyi ŋkɛ kezha ntsa nda wəfela mbe ŋshi wa?

²⁵Kateheve kele nya wəba na le dzara na? Katehwepame nda zewe na mbe ghɛni na?

²⁶Kateha nda tere na mbe ŋshi na? Katentsa nda dzara na kadzembe ghweleme na?

²⁷Katetemə ŋkɛ kasəkwə ŋa kezha pele ŋkɛ waɗe na? Ghena nyi ganji ganji yategeze ŋa ŋkɛ na?

²⁸Katemene jikə geva ŋkɛ le gha na? Katekele ŋkɛ na kamava kaghala ghala na?

²⁹Kateraberə na le kala nya le 'yɛ na? Katehwepe ŋkɛ na kezha nzeghe ŋwalea kwɛa ŋa le na?

³⁰Katejikə geva ka kese kelepe kezha pamte ŋkɛ na? Katenehe nda ŋkɛ hɛ ke ka zhɛre dzeve na?

³¹Katentsentsa yɛ wəfela na te hweta ta ŋkɛ ba'a katentsa nda kwaslerakacɛ na kadzembe ghə na?

³²Dapate dzeve te: zəzətema ta ŋa ke mpa ne, katezhɛne na kagha we!