Read KapsikiDC Job 41 Bible Online

Job 41 - KapsikiDC bible

Job 41

¹Ma wəndə nya kevate ghə te hərə kelea shɛ ne, ghəa ŋkɛ yaghwete ŋkɛ. Ncama ta ŋkɛ ne, pɛtɛ mbeli kabete te hɛɗi.

²Wəndə shɛ kahwepe ghə kezha ghweze mɛ hwe we. Tsagha gɛ ne, wa nde nza kaghereŋe te kema ta ɗa wa?

³Wa nde nzəɓəave ɗa dewa kezha ŋki nda 'ya wa? Ma pɛtɛa wəshi nyi kwake te hɛɗi ne, ŋa ɗa hɛ!

⁴Katenza ɗa 'ya kegeze ghena te geva ta ŋkɛ, te nza ta berete ta ŋkɛ ba'a te ndeɗea nza ta ŋkɛ we.

⁵Wa nde seɗemte lekwesa ta ŋkɛ kənə wa? Wa nde nza kajivenyɛ mbe ghweleme ta ŋkɛ wa?

⁶Wa nde ghwenemte gelembe nyi mɛa mɛa ŋkɛ wa? Va slene nyi kwa mɛa ŋkɛ ne, pɛtɛ mbeli kaghazlənə.

⁷Kwele kwele zəɗəa jɛpəli dzeyi te wəmbəa ŋkɛ. Yipə yipə nza ta nci le gelə nyi ketseɓate geva mɛ mɛ.

⁸Mendeɓe mendeɓe hɛ va kweci mbelia nci. Kadzawanyɛ sefə kwelɛ hɛ we.

⁹Yayata jɛpəli mendeɓe vare kwete wəndəa ŋkɛ, pɛtɛ hɛ tendeɓe tendeɓe, kanehemte geva hɛ we.

¹⁰Ma ketsate watɛhe ŋkɛ ne, kawəslə wəslə ghwə, ma yɛ ntsə ta ŋkɛ ne, kala same ta veci ɓele hɛ.

¹¹Same kwa mɛa ŋkɛ ne, katsa geva ghwə, kawəslə wəslə ghwə jive laka yayata bela.

¹²Katələ n'yi shave mbe ŋshia ŋkɛ kala ŋa dəghwə keɗema kemə nya kenefe nefe.

¹³Katsa ghwə sefə nya kesame kwa mɛa ŋkɛ yitea wəvene, kasame ghɛnia ghwə kwa mɛa ŋkɛ.

¹⁴Mbe welɛa ŋkɛ berete ta ŋkɛ. Kwa kema ta ŋkɛ ne, pɛtɛ mbeli kahwɛ.

¹⁵Mejikə nzanji gerese nyi te geva ta ŋkɛ, Ma ŋkwa nya kweɗekwe ma te geva ta ŋkɛ ne, kala lɛ.

¹⁶Kala gela ntɛaŋentɛa ta wənəa ŋkɛ, kala vena ntɛaŋentɛa ta ŋkɛ.

¹⁷Ma kesate kelea shɛ te ŋkwa ne, pa le mbelia jama kaghazlənə, kwetɛ kwetɛŋe taze hɛ.

¹⁸Ma katsasle ŋkɛ mbeli le kafayɛ ne, kadzembe te we. Tsagha shɛ megha, masalame keɗema have.

¹⁹Kala shekwəli nza ta lɛ shɛ, kala sheghwə nya kefehwe fehwe mze kwa ghwə ghwə.

²⁰Kahwɛ ŋkɛ va have we, kala shekwəli yɛ pelɛa kwa beza pelɛ shɛ.

²¹Kala shekwəli ghəa deme shɛ, ŋ'wəshi ŋ'wəshi ŋkɛ yitea gaka ta megha.

²²Kelɛmelɛa lɛmelɛanji kweci wəshi yitea hwəa ŋkɛ, kala wəsə kempə təsə rahe hɛɗi wəshia shɛhɛ.

²³Dzawama yɛmə ta ŋkɛ ne, kawəvaɗe wəvaɗe ŋkɛ kazhɛre ndərə ŋkɛ kawəsə kesheke 'wərdə.

²⁴Waŋe sərə hweŋkwa ŋkɛ kwetere wəmbəa ŋkɛ, kazhɛre ŋkwa nya kwa ŋkwəɗə tɛawe tɛawe kala shinti meha.

²⁵Te hɛɗi lema ne, wəsə shɛ kala kelea shɛ we. Nahe ŋkɛ kepate geva kaɗema ghazlənə hwe.

²⁶Kwa ntsə kwa ntsə newe wəshi keseɗa nyi jama jama ŋkɛ, gheŋkɛ ya kameghea wəshi keseɗa pɛtɛ nyi ghyana ghyana.