Read KapsikiDC Job 42 Bible Online

Job 42 - KapsikiDC bible

Job 42

¹Tagha gɛ, ma ke Job zhɛnete nda ke Mahwətə:

²Nahe 'ya keɗepe wərə na kamenete wəshi pɛtɛ, wəsə shɛ kandakɛ ŋa berete we.

³Wa wəndə nya kekele zləvə nya te ɗe ta ɗa laka geze ghena kala nde dewə ntsehwele wa? Kaganda ne, nahe 'ya kese kageze ghena te wəshi meŋele nyi kendakɛ ɗa berete kaɗema 'ya keɗepe.

⁴Ma 'ya sha se kageze: «Fa ɗa ŋa ɗa, 'ya nde geze ghena. 'Ya kate'yɛwe ghena va gha kezha tezhɛne ɗa na.»

⁵Deke sleme ta ɗa nde fate kageze ghena mbeli te gha, ama tsetsenya ne, nahe 'ya kenakɛ ŋa le ntsə ta ɗa.

⁶Vatse mpi dzeve 'ya te ghena nyi gezete 'ya. Mentishɛ hwa keləwə ba'a hwa pəsəɗə ɗepete fete ta ɗa 'ya.

⁷Ma kwa sebe ta nya gezemte nda ghena ta ŋkɛ Mahwətə ke Job ne, ma ke sha Ɛlifaz, nde Tɛman: «Kazhɛ ɗa wənəa ɗa va gha ba'a va ka mcɛhɛ ŋa nyi bake, va nya ɗema yɛ kese kageze kaganda te 'ya kala nya menete nde mene slene ta ɗa Job.

⁸Ma tsetsenya ne, ŋkave mə mcɛmcɛli mberefaŋe ba'a gamea lɛmə mberefaŋe, kwiɗi mə kalə sha nde mene slene ta ɗa Job, dzeghekɛ nda mə melɛ kwa tere tere ke ghəa ŋayɛ le hɛ, vəa ŋkwa nya səkwə ghə nde mene slene ta ɗa Job kezha gheyɛ. Ma laka gheŋkɛ ne, katemene ŋayɛ 'ya kala dewə mehele ta ŋayɛ, gheyɛ nyi keɗema kese kageze kaganda te 'ya kala nya menete nde mene slene ta ɗa Job we.»

⁹Cape Ɛlifaz, nde Tɛman, Bildad, nde Shəwha ba'a Sofar, nde Na'ama kalə kamene wəsə nya gezete nda Mahwətə ke hɛ. Pa Mahwətə yɛte səkwə ghə ta Job.

¹⁰Ma vəa ŋkwa nya səkwə ghə Job kezha ka mcɛhɛnyɛ ne, pa Mahwətə zhɛnave nda mcɛləa ŋkɛ. Kazhigə bake ɗave nda pɛtɛa wəshi nyi kese ve Mahwətə.

¹¹Tagha gɛ, hwa'a pɛtɛa ka kesaka yitenyɛ ba'a ŋwalea kwɛa meghekɛa Job ba'a pɛtɛa mbeli nyi keɗepete ŋkɛ vəashi se kanjiŋwe ŋkɛ. Pa hɛ zehwe wəsə kezeme zlaɓe le ki ghɛa ŋkɛ. Pa hɛ ncɛte nda ɗe ta nci ba'a gweɗakwakɛ nda wənə va pɛtɛa ndiremi nyi vate Mahwətə te. Pa yayata wəndəa nci ndeke nda wəsə gəməa dəɓərəa mze kwa tɛawetɛa kwetɛŋe ba'a ŋgwedɛba nya le mze kwa tere tere kwetɛŋe.

¹²Pa Mahwətə wəpikɛ va ta Job nyi kekeɗaŋe za ma ke nyi keghate. Tagha gɛ, pa Job kemave timɛti 14.000, zlegweməa lɛmə 6.000, sla kewəza 2.000 ba'a kwara lɛmə slibə.

¹³Pa ŋkɛ zhɛne kakemave ŋwale tezhili mberefaŋe ba'a ŋwalea kwɛ mahekene.

¹⁴Pa ŋkɛ hekate nda sləa ke kwa ghate ta wəzha ta ŋkɛ kaYemima, geze ta ŋkɛ, gheɗepe, ke kwa bake kaKɛsiya geze ta ŋkɛ, ghwə ta kanɛle ba'a ke kwa mahekene kaKɛrɛn-Hapəwk, geze ta ŋkɛ, wəsə nya yitea ntsə.

¹⁵Te hɛɗia shɛ pɛtɛ ne, kasləyi mi nyi ndeɗe ndeɗe mbeli kala ŋwalea kwɛa Job we. Pa yiteyɛa nci nehave nda wəshi kezeme ghɛ ke hɛ yipə yipə le ka kesaka yiteyɛa nci.

¹⁶Ma kwa sebe ta wəshi nyi ne, va gwəmsə ba'a wəfaɗemsə zhɛne Job kamenete. Nahe ŋkɛ kenakɛ ŋwalea ŋkɛ ba'a ka hwelefefia ŋkɛ pa te kwa wəfaɗe ta hwelefe.

¹⁷Kwetere wəmbəa ŋkɛ ne, mtiwə Job mbe meha ba'a behe va nza teghweme.