Read KapsikiDC Job 5 Bible Online

Job 5 - KapsikiDC bible

Job 5

¹Heka ŋkwa tse ga! Kenza ŋkɛ wəndə ya shɛ katezhɛne ŋa? Nyama yanza na kahekakɛ hwa ka ghwene ta Shala wa?

²Ma gezhi ne, taze ta mehele nde pesle ŋkɛ, wənə nde pesle nde dewə ntsehwele.

³Kaganda ne, nahe 'ya kenakɛ gezhi nya kehate slərə, Ama ma 'ya bezlakɛ ghɛa ŋkɛ taghanyɛ:

⁴«Yagha ŋwalea ŋkɛ kakemave kemane, ɗema kwete wəndə kakemane hɛ te ghwə!

⁵Zehwe wəshi nyi meneke ŋkɛ te wəve mbeli nyi zhɛ nda ma! Fəhwe hɛ hɛ ya hɛ nza dzasle kwa hwele! Fəhwe mcɛləa ŋkɛ ka dzeghwama ntsə!»

⁶Kwa nza ŋkɛ ne, kashave wəsə kwa ndiremi mbe hɛɗi we, kapese yaka shave mbe hɛɗi we.

⁷Ama nahe wəndə ŋelɛ keyake geva kezha sa yaka, kala peraslɛaslɛa ta ghwə dzeme yitea ghweme.

⁸Ma nda gha 'ya ne, katezhɛre nda geva 'ya ke Shala, ke gheŋkɛ ncɛ nda ghena nya te 'ya 'ya.

⁹Kamene wəshi nyi dzawe dzawe ŋkɛ, wəndə shɛ kafave we. Wəshi meŋele nyi mene ŋkɛ ne, wəndə shɛ kaɓelate we.

¹⁰Gheŋkɛ nde me va te hɛɗi lema, nde ghwene yɛmə sawa pelɛ ghweme kaɓasle yɛ wəve.

¹¹Ma mbeli nyi keshifə ghə ne, kaslete hɛ ŋkɛ. Ma mbeli nyi nza nehwene kwa ntsə va hɛ ne, kave nda zlama ŋkɛ ke hɛ.

¹²Kabeze slene ta ka tseŋwəa kɛfi ŋkɛ, kamenete wəshi nyi zəzəte hɛ hɛ we.

¹³Kakese ka ntsehwele ntsehwele ŋkɛ le keleŋa ta tseŋwəa nci, kaketekɛ ŋkwa ncɛ ntsehwelea nci nyi mendale mendale we.

¹⁴Kaka ghwələa kɛfi mbelia shɛhɛ talala veci kwa ghə, katsepe tsepe hɛ kala wəsə nya hwa ŋkwesle kwa ghə veci.

¹⁵Ama kambele wəndə nya keyirə yirə Shala same kwa mɛa nci, kazləgwə nde titikwə ŋkɛ shave mbe pela ta nci nyi berete berete.

¹⁶Tsagha, mbele ya shɛ va ka dewə ŋeli, kaŋzle nda mɛ ŋkɛ ke ka beze ghena shɛhɛ.

¹⁷Ma gɛ ne, zlama ya va wəndə nya 'yɛ Shala! Ma na gɛ ne, neghama 'yɛ ta Shala nde berete na ma!

¹⁸Shala nde ɗa ŋkwa le zhi, gheŋkɛ nde peɗe, kampa ŋkwa ŋkɛ, dzeve ta ŋkɛ nde mbe ŋkwa ɓiyitsa.

¹⁹Wərə na kasahwe yaka kwele kwele, kateya ŋa ŋkɛ shanda, katekwaɗe ŋa ndiremi tɛape we.

²⁰Ma mbe vəa ma ne, kambele ŋa ŋkɛ va mte, ma hwa mpa ne, wəsə shɛ kateɗa ŋa we.

²¹Pələsə tenza na va ghena tseŋwə, ma kese ndiremi ne, ghazlənəma na ma!

²²Kateŋ'wəshi ndiremi ba'a ma na, ghazlənəma na va wəshi keseɗa nyi hwa gamba ma.

²³Katenza yɛ gela dzeyi mbe yɛ wəvea ŋa we, kateɗa ŋa wəshi nyi hwa gamba we.

²⁴Katenza na mbe zeɗe nza ki ghɛa ŋa, ma vəa ŋkwa nya tetɛŋe wəshi keseɗa ta ŋa na ne, tserame tenza hɛ.

²⁵Katenewe na nda mtsehe hwelefe ta ŋa, katepese hwelefefia ŋa kala gwəzə kwamte.

²⁶Katenza berete mbe gha pa te mte ta ŋa, kala ghwɛpɛa megi nya mba yitea ghweme hefeghwe.

²⁷Wa nya wəsə nya zəzəve ghen'yɛ se vəashi nya: tsagha shɛ ŋkɛ. Fave wəsəa shɛ shɛ na menete slene le.