Read KapsikiDC Job 7 Bible Online

Job 7 - KapsikiDC bible

Job 7

¹Ma ke Job zhɛkwa: Kaganda ne, dzawe nza ta mbeli te hɛɗi. Yipə yipə nza ta nci le nde mene slene cɛdɛ.

²Kala mava nya kemawe nza yitea shenaŋkwe keɗema kala nde mene slene nya keneghe zhɛmea ŋkɛ hɛ.

³Tsagha nza ta ɗa: Tere kwele kwele menete slene gəmə 'ya. Deke yaka yasa 'ya mbe yayata viɗi.

⁴Ɓelahema ta ɗa: «Hweŋkwa tekiɗi ŋkwa wa?», 'ya sha geze. Kebiyanyɛ viɗi sha 'ya, nda geva yazhɛre 'ya te gezle pa va masheke.

⁵Bətə geva ta ɗa mbe menciɗi ba'a mbe rekɛ. Kaperawe geva ta ɗa ba'a kandətsə zhi nyi te 'ya.

⁶Kahe kahe kiɗinyɛ nza ta ɗa kala wəsə ketsa ta zlave, tereke tenza ŋkɛ vəa ŋkwa nya nahe pawa.

⁷Zəzəte ɗa Shala: kala zhɛne ta mpi nza ta mpia ɗa. Katezhɛne ntsə ta ɗa kanakɛ zeɗe nza we.

⁸Ma gha nya kenewe ɗa nya ne, katezhɛne na kanakɛ ɗa we. Katezele ɗa ntsə ta ŋa, mba tenza 'ya tagha we.

⁹Ma wəndə nya kedzawa ghɛa mbelia kwahɛɗi ne, yipə ŋkɛ le ləmbə nya ketazenyɛ ba'a nya kedzeghwanyɛ.

¹⁰Mba ŋkɛ kazhɛneke geva kase kadzeki ghɛa ŋkɛ we, mba mbelia ŋkɛ kateɗepete ŋkɛ we.

¹¹Vatse ɗema 'ya kaŋzlete mɛa ɗa. Keshilə shilə ŋwələa ɗa, ama nda ghena yageze 'ya. Keyirə yirə mehele ta ɗa, vatse teŋgaɗe ghə 'ya.

¹²Wa raberə ya ɗa na kala nya wa? 'Ya nza kandərə nya wəba keɗema kamɓɛa nya kwa ndərə na?

¹³Ma keɓelahe 'ya ne, ma 'ya sha zəzə: Ya kwete katezhɛne ɗa mpi ŋkwa nya te gezle, kategweɗakwe yaka ta ɗa viɗi.

¹⁴Ama kave ɗa ghazlənə na le yɛ shiwə, kadake ɗa na laka wəshi nyi ncɛ ɗa na.

¹⁵Megela ma ncɛhakeve ɗa na yitea ŋwələ! Jara ma mte 'ya ke sa yaka nya kala nya!

¹⁶Wərə ɗa, katenza 'ya kandimə ndimə te ghweme we. Kala wa mpia ɗa wa, sərəakɛ ɗa divə gi ga!

¹⁷Kwete wəsə nya zlahe wəndə ŋelɛ nda ve zəzə na te na? Tewəmbəreke wa ndeke nda mehele ta ŋa na wa?

¹⁸Kala kiɗi ta ŋkwa newe wəshi nyi mene ŋkɛ na na? Va wa dzeghe ŋkɛ na kevə kevə wa?

¹⁹Hweŋkwa tefɛa na yitea newe ɗa wa? Te nyama və tesərə ɗa na kanda ndɛghwɛɗɛ wa?

²⁰Ma nda 'ya menete ŋa jaɗafa ne, wa yabezemte ŋa 'ya wa nde newe mbeli? Wa raberə veyi ɗa na kawəsə kehe ta ŋa wa? Kawəsə nya ɗaŋeɗa 'ya sha gha na?

²¹Va wa ɗema na kazereghe fete ta ɗa, kakele beze ghena ta ɗa seyi te wənə wa? Kwa nza ŋkɛ tsetsenya ne, 'ya katemte. Ma vəa ŋkwa nya tezele ɗa na ne, katenza 'ya shɛ we.