Read KapsikiDC Job 9 Bible Online

Job 9 - KapsikiDC bible

Job 9

¹Ma ke Job zhɛnete:

²«Kaganda ne, nahe 'ya keɗepe tsagha ŋkɛ. Tsema nza wəndə ŋelɛ kanzanyɛ tiɗiɗi sha Shala wa?

³Ma keɗe wəndə kaghəpə le, mbe ghena slibə ne, kazhɛne ŋkɛ ya kwetɛŋe we!

⁴Kwele kwele ntsehwele ba'a berete ve. Wa nde nza kazhɛnete nda ghə kaɗema kekemave pamə hwa tsə wa?

⁵Taghanyɛ ne, kakelemte yɛ ghweme ŋkɛ, kaŋzla hɛ ŋkɛ mbe hwepe wənəa ŋkɛ.

⁶Kagaŋkəɗə hɛɗi ŋkɛ te shihəa ŋkɛ, kagagəzə selə nyi yite ŋkɛ.

⁷Wərə ŋkɛ kafɛake veci kesame kwa ghɛ, wərə ŋkɛ kafɛake yɛ saseregwa keɓele.

⁸Gheŋkɛ kwetɛŋenyɛ nde pelake ghweme, kadzeghwa ŋkɛ te yɛ gaŋkeɓe ta ndərə.

⁹Gheŋkɛ nde pate yɛ saseregwa: saseregwa kwa kiɗi ŋkwa, ka kese sla, ka danehi ba'a saseregwa nyi laka bela kwa zeme.

¹⁰Kamene wəshi nyi jama jama ba'a nyi dzawe dzawe ŋkɛ, kwele kwele wəshi meŋele nyi mene ŋkɛ kaɗema kaɓelate geva.

¹¹Ma kadzeyi ŋkɛ vare 'ya ne, kanakɛ ŋkɛ 'ya we. Ma kadzeghwanyɛ ŋkɛ ne, kaɗepete 'ya we.

¹²Wa nde nza kazhɛneke wəsə nya zləgwəhwe ŋkɛ wa? Wa nde nza kageze: ‹Wa yamene na wa› ke shɛ wa?

¹³Kagweɗakwe hwepe wənəa ŋkɛ Shala we. Yitea seɗa ta ŋkɛ shishi nyi jama jama kwa ndərə, yɛ Rahab le mbelia ŋkɛ meɓelahe.

¹⁴Vatse nda ɗema 'ya shɛ zhɛne nda ghena ke Shala, ghena shɛ va 'ya kageze te we.

¹⁵Ya kaganda nza va 'ya ne, ghena shɛ kazhɛnete 'ya we, deke zlaɓa heli ya'yɛwe 'ya va nde meha ghwə te 'ya.

¹⁶Ya gheŋkɛ zhɛnete heka ta ɗa ne, keɗepe 'ya kafa səkwə ta ɗa ŋkɛ we.

¹⁷Gəmə sa ɗa gəli ŋkɛ, kafɛa ŋkɛ yitea ɗa ɗa le zhi gəmə we.

¹⁸Kasərə ɗa ŋkɛ kazhɛne mpi we, ama yaka nya dzawe yasa ɗa ŋkɛ.

¹⁹Ya 'ya geze kawəti le Shala ne, berete ma ŋkɛ ke 'ya. Dzete ŋkwa kemeha ghwə 'ya tse gɛ na? Wa nde teheka ɗa kase kadzete ghwə wa?

²⁰Ya kaganda nza va 'ya ne, kateve ɗa fete mɛa ɗa. Ya fete ɗema va 'ya ne, kande fete teve ɗa nde.

²¹Wəndə nya ɗema fete ve 'ya na? Kaɗepete 'ya le ghəa ɗa we. Wərə ɗa nza teghweme!

²²Ma sha 'ya ne, kanya kwetɛŋe nde mene fete le nde menema fete. Vatse gɛ, ma 'ya gezete: katepesle wəndə nya ɗema fete ve keɗema nya kemenete fete Shala.

²³Ma vəkə kese ndiremi kampəmte mbeli nyi ɗema fete va hɛ ne, kaŋ'wəshi yaka nya kənəa mbelia shɛhɛ Shala.

²⁴Ma kedzembe dzeve ta nde 'yaghwa mehele hɛɗi ne, kadəpə ntsə ta ka meha ghwə Shala. Ma keɗema gheŋkɛ nde mene tsagha ne, wa wəndəa shɛ wa?

²⁵Kahe kahe ma hwɛ hɛa ɗa ke nde dzeghe wampelɛa wampelɛa, nahe hɛ kehwɛnji kaɗema 'ya kenakɛ zeɗe nza.

²⁶Kahe kahe hwɛ hɛ kala kwambelə ghwəvərə[1], kala zele nya keme kənəa wəsə kezeme ta ŋkɛ.

²⁷Ma kegeze 'ya nda ke ghəa ɗa: ‹Zamte ghə yitea ndiremia ŋa, nza fare fare ba'a hwepete ghə›, 'ya ne,

²⁸keyirə yirə 'ya va pɛtɛa yaka nyi te 'ya. Nahe 'ya keɗepe kaɗema na kateve ɗa kawəndə nya ɗema fete ve.

²⁹Ma sha gha ne, nda 'ya kanza kande fete! Wa raberə leɓe ghəa ɗa 'ya gəmə gɛ?

³⁰Ya 'ya pɛmte ghəa ɗa le sempere, ya 'ya pɛmte dzeve ta ɗa le zlɛampəli ne,

³¹mbe kəsə teləɗə ɗa na, pa le yɛ lekwesa ta ɗa kateɗema ɗa.

³²Kwa nza ŋkɛ ne, wəndə ŋelɛ Shala kala 'ya we, kashɛ 'ya zhɛne nda ghena we, kashɛ 'ya dzete ghwə le we.

³³Ma kwelɛ ghen'yɛ ne, nde negha fete shɛ kezha sla fete ta n'yɛ we,

³⁴nza wərə ŋkɛ kafɛake Shala keɗa ɗa, ma tsagha ne, katezhɛne 'ya kamte va ghazlənə we.

³⁵Nza wərə 'ya kageze nda ghena kaɗema kaghazlənə. Ama kwa ɗema ŋkɛ tsagha ne, kwetɛŋe ɗa 'ya.