Read KapsikiDC Cimə 105 Bible Online

Cimə 105 - KapsikiDC bible

Cimə 105

¹Tsahe mə Mahwətə, zlape mə sləa ŋkɛ, ɓela nda mə wəshi nyi menete ŋkɛ ke kweci mbeli.

²Gha nda mə cimə, tsa nda mə wəshi ketsa, geze mə pɛtɛa wəshi meŋelea ŋkɛ zhɛkwa.

³Nza mə fare fare te sləa ŋkɛ nya keveyi geva tekeleke, zlama mə, gheyɛ mbeli nyi kezele Mahwətə.

⁴Zele mə Mahwətə ba'a berete ta ŋkɛ, zele mə ŋkɛ kevə kevə.

⁵Zəzəte mə wəshi meŋele nyi menete ŋkɛ, wəshi nyi kebenake ŋkwa ta ŋkɛ ba'a ghena nyi tarete ŋkɛ,

⁶gheyɛ, hwelefe ta Abraham nya kande mene slene ta ŋkɛ, gheyɛ, ŋwalea Zhakob nyi ntave ŋkɛ.

⁷Gheŋkɛ ya kaMahwətə Shala ta ɓəmə, nya kesleke hɛɗi lema.

⁸Keveci keveci zəzə jikə geva ta ŋkɛ ŋkɛ, ghena nya kendeke nda geva ke ka shihɛ slibə.

⁹Gheŋkɛ jikə geva nya menete ŋkɛ le Abraham, ghena nya gezeyi nda ŋkɛ gheci gheci ke Izak,

¹⁰nya zhɛrete ŋkɛ kawəsə mahalegə kaŋa Zhakob, kajikə geva nya kaghala ghala kaŋa Israyɛl,

¹¹vəa ŋkwa shɛ ne, ma ke gezete: «Kateve ŋa hɛɗia Kanan 'ya. Gheŋkɛ nde tenza kaŋa ŋa bela.»

¹²Vəa ŋkwa shɛ ne, kese ka shihɛ ɓəmə kwele kwele we, deke ka se se nyi jɛɓɛakwe te hɛɗi se hɛ.

¹³Kehɛɗi kehɛɗi se hɛ kadzeghwa, kehɛɗi meghe kehɛɗi meghe.

¹⁴Ama kese Shala kasərə mbeli kasa nda yaka ke hɛ we, nahe ŋkɛ kevate ɗa te ka meghea kɛfi tewəmbəreke hɛ.

¹⁵Ma ke gezete: «Kwaɗema mbeli nyi ntave 'ya yɛ ma, mene nda ma wəsə kwa ndiremi yɛ ke ka mɛ ŋkwa ta ɗa ma.»

¹⁶Pa veyi ma te hɛɗia nci, pa fəhwe wəshi kezeme va hɛ.

¹⁷Pa ghweneghe kwete wəndə te kema ta nci, gheŋkɛ Zhozɛf nya pamte mbeli kamava.

¹⁸Pa mbeli hwepeyi nda zewe lɛ kwa yɛ seɗa, pa mbeli hwepeyi nda zewe lɛ kwa welɛ,

¹⁹hwa'a te və nya yipəyi geva ghena ta ŋkɛ kwa, te və nya dzeghakɛ ŋkɛ ghena ta Mahwətə.

²⁰Pa meghe gezete kezha pele ŋkɛ mbeli, pa wəndə nya kesleke mbeli pelemte ŋkɛ.

²¹Pa veyi ŋkɛ kawəndə nya te ghəa ghɛa ŋkɛ ba'a kande sleke wəshia ŋkɛ pɛtɛ.

²²Pa Zhozɛf tekave nda wəshi ke mbeli nyi te ghə kala nya ɗe ŋkɛ ba'a tekave nda ntsehwele ke mbelia jama.

²³Kwa sebe ta ŋkɛ, hwa'a Israyɛl ntsehe mbe Ɛzhipte, pa Zhakob dzetenyɛ te hɛɗia Sham.

²⁴Pa Shala ndeke ŋwale kwele kwele ke mbelia ŋkɛ, pa zhɛrete hɛ berete ma ke ka ghema ta nci.

²⁵Pa ŋkɛ zhɛrete mehele ta ka Ɛzhipte, ntake hɛ kaɗema ntsə ta mbelia ŋkɛ, ba'a kamene nda mbəɗəkwə ke ka mene slene ta ŋkɛ.

²⁶Pa ŋkɛ ghwenakɛ Moyize nya kande mene slene ta ŋkɛ ba'a Aron nya ntave ŋkɛ.

²⁷Pa hɛ menete wəshi kencɛ wəshi mbe Ɛzhipte, wəshi meŋelea Shala te hɛɗia Sham.

²⁸Pa Shala ghweneke ŋkwesle ba'a keleke viɗi. Ama wəndə shɛ kese kahawe va ghena ta ŋkɛ we.

²⁹Pa ŋkɛ zhɛrete yɛməa nci kamimi ba'a mpəmte yɛ kelepe ta nci.

³⁰Pa yɛ gwambe dzetenji te hɛɗia nci, pa mbe cɛ nyi ki ghɛa meghe.

³¹Ma kwa gezete ghena Shala ne, ŋkeɗe yɛ ŋgezlere ba'a yɛ veyinze senji te hɛɗia nci.

³²Kwacakelɛ yamakawa nda ŋkɛ ke hɛ te ŋkwa va, dəvə berazlɛ ta va ndəyite ghwə yitea hɛɗia nci.

³³Pa ŋkɛ bezemte yɛ rɛzɛŋea nci ba'a yɛ dasekwa ta nci, pa mpempəakawa wəfe nyi te hɛɗia nci.

³⁴Ma kwa gezete ghena ŋkɛ ne, helembəŋə yɛ dzale ba'a yɛ zhamaya senji.

³⁵Pa hɛ zememte pɛtɛa gwəzə nyi te hɛɗia nci, pa hɛ zememte pɛtɛa wəshi nyi kepese te hɛɗi.

³⁶Pa ŋkɛ mpəmte pɛtɛa ka tezhɛa kɛfi te hɛɗia nci, ŋwale nyi ghate hɛ kaya mbe mempɛhweta.

³⁷Pa ŋkɛ fəakave mbelia ŋkɛ le mze kwa tɛawetɛa ba'a mze kwa tere tere, wəndə shɛ kedene hwa yɛ yitehɛa nci we.

³⁸Nahe Ɛzhipte kese kazlama yitea shave ta nci, kwa nza ŋkɛ nahe hɛ kedakenji.

³⁹Pa ŋkɛ peleyi ləmbə kənəa hɛ, tsagha ghwə kezha waŋe nda ŋkwa ke hɛ heviɗi.

⁴⁰Ma kwa 'yɛwakɛ hɛ ne, pa ghweneke yɛ fafele, pa behekɛ hɛ le ɗafa nya kesawa pelɛ ghweme.

⁴¹Pa ŋkɛ perawete gela, mpəɗə yɛmə ntsa shave mbe, ntake nde kahwɛ dzeyi te ɓerama kala hələ.

⁴²Kwa nza ŋkɛ nahe ŋkɛ kezəzəte ghena ta ŋkɛ nya keveyi geva tekeleke laka Abraham nya kande mene slene ta ŋkɛ.

⁴³Nahe ŋkɛ kefəakave mbelia ŋkɛ mbe zlama, nahe mbeli nyi ntave ŋkɛ kese katsa gaghwe.

⁴⁴Nahe ŋkɛ kefəave nda yɛ hɛɗia kweci hwelefefi ke hɛ. Tagha gɛ, pa hɛ fəhwe wəshia kweci mbeli,

⁴⁵yitea mene slene hɛ le ghena nyi gezete ŋkɛ ba'a yitea ya wəshi mahalegəa ŋkɛ hɛ. Alɛləwya!