Read KapsikiDC Cimə 106 Bible Online

Cimə 106 - KapsikiDC bible

Cimə 106

¹Alɛləwya! Tsa nda mə hana ke Mahwətə, kwa nza ŋkɛ ganyɛke ŋkɛ, kakiɗi ɗe ta ŋkɛ we.

²Wa nde nza kaɓelate wəshi nyi jama jama nyi mene Mahwətə ba'a kafave nda pɛtɛa tsahe nyi te ke mbeli wa?

³Zlama ya va mbeli nyi kehawe va wəsə nya kehi ba'a nyi kemene wəsə nya tiɗiɗi kevə kevə.

⁴Ma vəa ŋkwa nya tenza na ganyɛke laka mbelia ŋa ne, zəzəte n'yɛ gɛ Mahwətə yawe! Ma vəa ŋkwa nya tembele hɛ na ne, newete ghweme te ghen'yɛ.

⁵Tagha gɛ, katenewe zeɗe nza ta mbeli nyi tsehave na n'yɛ, katenza n'yɛ fare fare yitea zlama ta mbelia ŋa, ba'a katefege n'yɛ le mbeli nyi kaŋa ŋa.

⁶Nahe n'yɛ kemenete jaɗafa kala ka shihɛ n'yɛ, nahe n'yɛ kemenete wəsə kwa ndiremi, nahe n'yɛ kenza kaka mene fete.

⁷Ma te və nya se ka shihɛ n'yɛ mbe Ɛzhipte ne, wəsə shɛ kefate hɛ mbe wəshi meŋelea ŋa we. Nahe hɛ kezaghəyite wəshi ganjia ŋa nyi kwele kwele, nahe hɛ kese kaka fama ghena mɛa ndərəa Ghwəvərə.

⁸Ama nahe ŋkɛ kembelete hɛ kazləvəa ŋkɛ, kezha ncɛ berete ta ŋkɛ.

⁹Ma kwa ŋgezlete nda ŋgezle ŋkɛ ke ndərəa Ghwəvərə ne, helɛŋe ŋkɛ ghwelenyɛ. Pa ŋkɛ fəghe hɛ jive te, kala wəsə nya te ɓerama.

¹⁰Pa ŋkɛ mbelemte hɛ shave mbe dzeve ta nde ɗema ntsə ta nci, pa zləgwəke hɛ shave mbe dzeve ta nde jaga.

¹¹Pa yɛmə zhiɓəaghe geva kənəa ka ghema ta nci, wəndə shɛ ketene we.

¹²Tagha gɛ, pa hɛ yɛte ghena nyi gezete Shala, ntake hɛ katsahe ŋkɛ le cimə.

¹³Ama pa hɛ zaghəyite wəshi nyi menete ŋkɛ kahe kahe, kese hɛ kaneghe kezha yipə zəzə ta ŋkɛ ŋkɛ kadzawa we.

¹⁴Ntake hɛ kamawe wəshi nyi keɗema va hɛ, pa hɛ dzeghakɛ Shala te ɓerama.

¹⁵Pa ŋkɛ ndeke nda wəsə nya 'yɛwe hɛ ke hɛ, ama pa ghwenahwe ndiremi hwa hɛ.

¹⁶Mbe ghedəkwə ne, ntake hɛ kazlɛ va Moyize ba'a va Aron nya keveyi nda geva tekeleke ke Mahwətə.

¹⁷Pa hɛɗi ghwenemte geva ba'a ndahwe Datan, pa zhiɓəaghe geva kənəa yɛ Abiram le mbeli nyi yite.

¹⁸Pa ghwə teremte mbeli nyi yitea hɛ ba'a tsemte ka 'yaghwa mehele.

¹⁹Pelɛ ghweme ta Horɛb ne, pa hɛ vɛsəte leve ta sla, ntake hɛ kagwəɗəŋə kwa kema ta mze.

²⁰Pa hɛ mbeɗemte Shala nya kese kazləvəa nci te pa ta sla nya kezeme gwəzə.

²¹Pa hɛ zaghəyite Shala nya kande mbele hɛ, nya kemenete wəshi nyi jama jama mbe Ɛzhipte,

²²wəshi meŋele nyi te hɛɗia Sham, wəshi nyi ghazlənə va hɛ mɛa ndərəa Ghwəvərə.

²³Pa Shala tarete kezha za sebe te hɛ, ama pa Moyize nya ntave ŋkɛ ghereŋenyɛ mbe kema ta ŋkɛ kezha fɛa hwepe ta wənəa ŋkɛ keza sebe te hɛ.

²⁴Nahe hɛ keɓelama hɛɗia zeɗe nza, kese hɛ kayɛ ghena ta ŋkɛ we.

²⁵Ntake hɛ kandəghwə ndəghwə dzeyi mbe yɛ cɛ lekwesa ta nci, kese hɛ kafa nda ŋa Mahwətə we.

²⁶Tagha gɛ, pa kafete dzeve kənəa hɛ kezha mpə hɛ te ɓerama,

²⁷kezha taze hwelefefia nci dzeyi te pɛtɛa hɛɗi ba'a kezha mpə hɛ hwa kweci hwelefefi.

²⁸Pa hɛ ndeke nda ghəa nci ke Ba'al-Pɛyor ba'a zehwe wəshi melɛa mbeli nyi kempə mpə.

²⁹Pa hɛ hwepete nda wənəa ŋkɛ le wəshi nyi mene hɛ. Tagha gɛ, pa ndiremi nya wəba pesleyi geva hwa hɛ.

³⁰Ama pa Pinhas sate kezha tseɓa ghena shɛ. Tagha gɛ, pa ndiremi nya wəba shɛ kiɗinyɛ.

³¹Pa Shala veyi ŋkɛ kawəndə nya tiɗiɗi, keshi keshi ba'a kaghala ghala.

³²Pa hɛ bezemte nda wənəa Shala mɛa yɛməa Mɛriba ba'a vate ndiremi te Moyize.

³³Ma kwa tazemte nda mehele hɛ ke Moyize ne, ntake ŋkɛ kageze ghena dewə zəzə.

³⁴Kese hɛ kaza sebe te mbeli nyi gezete nda Mahwətə ke hɛ we.

³⁵Pa hɛ wəmeve geva le kweci hwelefefi, pa hɛ tekeve wəshi nyi mene hɛ.

³⁶Ntake hɛ kahawe va wəshi nyi zhɛrete hɛ kashala, wəshi nyi kezhɛrenji kakeleŋa yitea hɛ.

³⁷Ntake hɛ kadzeghe nda melɛ le ŋwale tezhilia nci ba'a ŋwalea kwɛa nci ke yɛ 'yi'yɛghwə.

³⁸Pa hɛ shekeyi mimia ka menetema fete, mimia ŋwale tezhilia nci ba'a ŋwalea kwɛa nci nyi dzeghekɛ nda melɛ hɛ le hɛ ke yɛ shala ta ka Kanan. Tagha gɛ, pa hɛɗi zhɛrenyɛ wale wale va yɛ sheke ta mimi.

³⁹Nahe hɛ kezhɛrenji wale wale laka yɛ slene ta nci ba'a kemenete mefətekwə laka wəshi nyi mene hɛ.

⁴⁰Pa Mahwətə hwepete wənə va mbelia ŋkɛ ba'a ɗema ntsə ta mbeli nyi kaŋa ŋkɛ.

⁴¹Pa ŋkɛ vame hɛ mbe dzeve ta kweci mbeli. Ntake ka ghema ta nci kasleke hɛ.

⁴²Pa ka jaga ta nci sahwe nda yaka ke hɛ. Tagha gɛ, nahe hɛ kenza te dzeve va hɛ.

⁴³Kwele kwele zhigə mbelete hɛ ŋkɛ, ama geva yantsə hɛ mbe fama ghena ta nci ba'a geva yala hɛ mbe mene fete ta nci.

⁴⁴Pa ŋkɛ nakɛ yaka ta nci te və nya fate lewela ta nci ŋkɛ.

⁴⁵Pa ŋkɛ zəzəte jikə geva ta ŋkɛ le hɛ, pa zhɛrete mehele mbe wəba ta ganyɛa ŋkɛ.

⁴⁶Pa ŋkɛ zhɛakɛ heli yitea hɛ va pɛtɛa mbeli nyi kefəhwe hɛ.

⁴⁷Shala Mahwətə ta n'yɛ, mbelete n'yɛ, tseneke n'yɛ shave hwa kweci hwelefefi. Tagha gɛ, katetsahe sləa ŋa nya keveyi geva tekeleke ghen'yɛ ba'a katenza ghen'yɛ fare fare kezha tsahe ŋa.

⁴⁸Tsa nda ɓəmə hana ke Shala Mahwətə ta Israyɛl, se vəashi ba'a kaghala ghala. Ma ke mbeli pɛtɛ sha tegeze: «Amɛn! Alɛləwya!»