Read KapsikiDC Cimə 111 Bible Online

Cimə 111 - KapsikiDC bible

Cimə 111

¹Alɛləwya! Kaɗe 'ya katsa nda ke Mahwətə le wənə kwetɛŋe, hwa tsene ta mbeli nyi nza wənəa nci wɛŋe.

²Nahe yɛ slene ta Mahwətə kenza kejama jamanji, kave zəzə pɛtɛa mbeli nyi keɗe hɛ te hɛ.

³Nahe slene ta ŋkɛ kenza kawaŋe ba'a kazləvə, kaghala ghala nza tiɗiɗia ŋkɛ.

⁴Kaɗe ŋkɛ kazəzə wəshi meŋelea ŋkɛ mbeli. Nahe Mahwətə kenza kande ganyɛa mehele ba'a kande zhɛ heli.

⁵Kazeme nda zeme ŋkɛ ke mbeli nyi kehawe ve. Kazəzə jikə geva ta ŋkɛ ŋkɛ keveci keveci.

⁶Nahe ŋkɛ kencɛte nda berete ta ŋkɛ ke mbelia ŋkɛ te və nya ndeke nda hɛɗia kweci mbeli ŋkɛ ke hɛ.

⁷Nahe wəshi nyi mene ŋkɛ kenza kaganda ba'a tiɗiɗi, gezleŋe ghə shɛ mbe pɛtɛa ghena nyi geze ŋkɛ we.

⁸Nahe hɛ keveyi geva kaghala ghala, kwa nza ŋkɛ nahe hɛ kenza kaganda ba'a tiɗiɗi.

⁹Nahe ŋkɛ keghweneghe nda mbele ke mbelia ŋkɛ, nahe ŋkɛ kemenete jikə geva nya kaghala ghala le hɛ. Deke gheŋkɛ ya kaShala nya kaganda ba'a nya ghazlənə mbeli ve.

¹⁰Hawe va Mahwətə ya kagha ta ntsehwele. Nahe pɛtɛa ka hawe ve kenza kentsehwele ntsehwele. Kaghala ghala tenza tsahe ta ŋkɛ.