Read KapsikiDC Cimə 118 Bible Online

Cimə 118 - KapsikiDC bible

Cimə 118

¹Tsa nda mə hana ke Mahwətə, kwa nza ŋkɛ ganyɛke ŋkɛ, kakiɗi ɗe ta ŋkɛ we.

²Ka Israyɛl, ma pe yɛ: «Kaghala ghala nza ganyɛa ŋkɛ.»

³Mbelia Aron, ma pe yɛ perə: «Kaghala ghala nza ganyɛa ŋkɛ.»

⁴Gheyɛ ka hawe va Mahwətə, ma pe yɛ: «Kaghala ghala nza ganyɛa ŋkɛ.»

⁵Ma mbe yaka ne, nahe 'ya kesəkwəte Mahwətə, nahe Mahwətə kezhɛnete ɗa ba'a kembelete ɗa.

⁶Mahwətə ya le 'ya, wəsə shɛ kaghazlənə 'ya ve we. Wa wəsə nya nza mbeli kamenete ɗa wa?

⁷Mahwətə ya le 'ya, gheŋkɛ nde kemane ɗa, katenewe teɗe ta ka jaga ta ɗa 'ya.

⁸Megela ma wəfərə mbe Mahwətə ke ve ghə te mbeli!

⁹Megela ma wəfərə mbe Mahwətə ke ve ghə te mbeli nyi te ghə.

¹⁰Nahe pɛtɛa hwelefefi kedzaslete ɗa. Ama te sləa Mahwətə ne, nahe 'ya keŋkamte hɛ.

¹¹Nahe hɛ kedzaslete ɗa tekelɛ kelɛ. Ama te sləa Mahwətə ne, nahe 'ya keŋkamte hɛ.

¹²Nahe hɛ kedzaslete ɗa kala zhiwəa mze, nahe hɛ kempənji kala ghwə te vegheme. Ama te sləa Mahwətə ne, nahe 'ya keŋkamte hɛ.

¹³Nahe mbeli ketsəkwəte ɗa kezha teɗe 'ya, ama nahe Mahwətə kekemanakɛ ɗa.

¹⁴Mahwətə ya kaberete ta ɗa ba'a kageza ta ɗa. Gheŋkɛ nde mbelete ɗa.

¹⁵Ma ke mbeli sha gaghwe ba'a sha gha geza dzeyi mbe yɛ cɛ lekwesa ta mbeli nyi tiɗiɗi: «Nahe dzeve kwa zeme ta Mahwətə kemenete slene nya wəba,

¹⁶nahe dzeve kwa zeme ta Mahwətə kekafete geva, nahe dzeve kwa zeme ta Mahwətə kemenete slene nya wəba.»

¹⁷Katemte 'ya we, katenza 'ya teghweme kezha ɓela wəshi nyi menete Mahwətə.

¹⁸Kaganda ne, nahe Mahwətə ke'yɛte ɗa, ama kendeke nda ɗa ŋkɛ ke mte we.

¹⁹Ghweghwenemte ɗa mə yɛ gelembe ta nza tiɗiɗi, katedzeki 'ya kezha tsahe Mahwətə.

²⁰Wa nya gelembe ta Mahwətə nya: dzekinji mbeli nyi tiɗiɗi kwa.

²¹Katetsahe ŋa 'ya, va nya zhɛnete ɗa ghena na, va nya se na kambele ta ɗa.

²²Ma pelɛ nya neghakɛ ka ŋa ŋkwa ne, gheŋkɛ nde zhɛrenyɛ kapelɛ nya te megwekwe.

²³Mahwətə nde mene wəsə nya kala nya: nahe ŋkɛ kenza kawəsə meŋele kwa ntsə ta ɓəmə.

²⁴Nya ya kaveci nya menete Mahwətə: nza ŋkɛ kazeɗe nza ta ɓəmə ba'a kazlama ta ɓəmə!

²⁵Mahwətə, təhwə təhwə ndeke n'yɛ mbele gi! Mahwətə, təhwə təhwə ndeke n'yɛ hərə ŋkwa gi!

²⁶Kewəpi wəpi nza wəndə nya kese te sləa Mahwətə. Kawəpi ŋayɛ ghen'yɛ shave mbe ghɛa Mahwətə.

²⁷Mahwətə ya kaShala, kave ɓəmə waŋe ŋkɛ. Le yɛ sleke mɛa dzeve ne, pate mə geva hwa'a yitea yɛ tereme ta reghwetɛ.

²⁸Gha ya kaShala ta ɗa, katetsahe ŋa 'ya. Shala ta ɗa, kateve zləvə 'ya te gha.

²⁹Tsahe mə Mahwətə, kwa nza ŋkɛ megela ŋkɛ, kaghala ghala nza ganyɛa ŋkɛ.