Read KapsikiDC Cimə 139 Bible Online

Cimə 139 - KapsikiDC bible

Cimə 139

¹Se va wəndə nya te ghəa cimə. Ciməa David. Mahwətə, nahe na keneweve nza ta ɗa ba'a nahe na keɗepe ɗa,

²nahe na keɗepe vəa ntishɛ ta ɗa ba'a sate ta ɗa. Mpelɛa ma na ɗepe yɛ zəzə ta ɗa.

³Nahe na keɗepe vəa dzeghwa ta ɗa ba'a ɓelahe ta ɗa, nahe na keɗepe pɛtɛa wəshi nyi mene 'ya.

⁴Ma nda teghwene mɛ 'ya ne, nahe na keɗepe ghena nya tegeze 'ya Mahwətə.

⁵Te kema ta ɗa ba'a kwetere wəmbəa ɗa na, kave berete ta ŋa na kənəa 'ya.

⁶Nahe na keɗepe ɗa megela. Nahe ŋkɛ kenza kawəsə meŋele sha 'ya kawəsə nya ɗema 'ya kafave.

⁷Tema nza 'ya kalə ɗa cakeɗake yitea gha tse wa? Tema nza 'ya kahwɛ ɗa cakeɗake va ntsə ta ŋa wa?

⁸Ma kedzeme ghweme 'ya ne, pelɛagha na. Ma keɓelahe 'ya hwa mbelia kwahɛɗi ne, kwagha na.

⁹Ma kezlə ɗa 'ya hwa'a te ŋkwa kesame ta veci keɗema kenza ɗa 'ya te ŋkwa kepəkwə ta ŋkɛ ne,

¹⁰kabeghe ɗa dzeve ta ŋa kalə tagha, kakese ɗa dzeve kwa zeme ta ŋa.

¹¹Ma 'ya gezete: «Zhiɓəyi geva ŋkwesle kənəa 'ya, zhɛrenyɛ veci kaviɗi dzeyi yitea 'ya.»

¹²Sha gha ne, nahe ŋkwesle kenza kawaŋe, nahe viɗi kenza waŋe kala veci. Sha gha ne, kanya kwetɛŋe yɛ ŋkwesle le waŋe.

¹³Gha nde pate ŋkwaɓe ta ɗa, gha nde tseɓate ɗa kwa hwəa meyɛ ɗa.

¹⁴Katsa ŋa hana 'ya va nya nza 'ya kawəsə meŋele, nahe wəshi nyi menete na kenza kawəshi meŋele. Kaganda ne, nahe 'ya keɗepe wəsəa shɛ megela.

¹⁵Ma te və nya pate ɗa na tewəfərə, te və nya tseɓate ɗa na kwa hwəa meyɛ ɗa ne, kenza pɛtɛa 'yɛ'yɛa ɗa tewəfərə va gha we.

¹⁶Ma vəa ŋkwa nya se 'ya kamimi ne, nahe yɛ ntsə ta ŋa kenakɛ ɗa. Ma mbe palepa ta ŋa ne, nahe na kerafete pɛtɛa hɛ nyi zəzəte na kave ɗa, te və nya ghatema geva hɛa shɛhɛ.

¹⁷Shala yawe, kaganda nza yɛ zəzə ta ŋa dzawe kaŋa ɗa, nahe hɛ kenza kwele kwele.

¹⁸Tsema nza 'ya kaɓelate hɛ wa? Kwele kwele ma hɛ ke ndaleghe. Ya 'ya ɓelate hɛ pɛtɛ ne, kafave nza ta ŋa 'ya we.

¹⁹Shala yawe, mpəmte ka 'yaghwa mehele gi! Ŋkamte ka mpə ŋkwa cakeɗake yitea 'ya gi!

²⁰Le sləa ŋa ghwete ŋkwa hɛ, gheŋkɛ yahekɛme hɛ kezha mene wəsə kwa ndiremi.

²¹Mahwətə, kaɗe ntsə ta ka ɗema ntsə ta ŋa 'ya we. Zeɗehwe ɗa mbeli nyi kempa le gha we.

²²Fəyitekeghə ɗema ntsə ta nci 'ya, nahe hɛ kenza kaka jaga sha 'ya.

²³Shala yawe, neweve wənəa ɗa ba'a ɗepete ɗa. Dzeghakɛ ɗa ba'a ɗepete yɛ zəzə ta ɗa.

²⁴Neweve kenza ŋkɛ kwa hweŋkwa nya ndiremi 'ya, beghe ɗa kwa hweŋkwa nya kaghala ghala.