Read KapsikiDC Cimə 144 Bible Online

Cimə 144 - KapsikiDC bible

Cimə 144

¹Se va David. Hana ŋa na Mahwətə nya kagela ta ɗa, nya keteke ɗa mpa ba'a nya kentsə dzeve ta ɗa yitea mpa.

²Nahe ŋkɛ kenza kande ya ɗa, kande kemane ɗa, kaŋkwa kewəfərə ta ɗa, kande mbele ɗa ba'a kagelə nya kewəfərə ɗa. Gheŋkɛ nde ve kweci hwelefefi mbe dzeve ta ɗa.

³Mahwətə, wa ŋkɛ wəndə ŋelɛ nda ve ntsə na te wa? Wa ŋkɛ wəndə ŋelɛ nda kele zəzə na te wa?

⁴Nahe wəndə ŋelɛ kenza kala sefə, kala shenaŋkwe nya kekiɗi mpia ŋkɛ.

⁵Mahwətə, yiŋwəakawa ghweme ba'a sawa, kwaɗakɛ yɛ ghweme yitea ɗələ n'yi shave mbe hɛ.

⁶Sleslate yɛ waŋe ba'a tazemte ka jaga ta ŋa, ghweneke yɛ have ta ŋa ba'a ŋkamte hɛ kwetɛ kwetɛŋe.

⁷Hakawa dzeve sawa pelɛ ghweme, mbelete ɗa ba'a mbelemte ɗa va yɛmə nya wəba, va dzeve ta ka se se.

⁸Kasla tseŋwə hɛ ba'a kazeme fela hɛ, ama kayipə meɗe mɛa nci hɛ kadzawa we.

⁹Shala yawe, kategha ŋa cimə mɛnɛfɛ 'ya, katetsa ŋa getsepele nya nza zewe meŋe te 'ya.

¹⁰Gha nde ve nda hərə ŋkwa ke ka meghe, gha nde mbele nde mene slene ta ŋa David va kafayɛ nya kempə ŋkwa.

¹¹Mbelemte ɗa ba'a mbelete ɗa shave mbe dzeve ta ka se se. Kasla tseŋwə hɛ ba'a kazeme fela hɛ, ama kayipə meɗe mɛa nci hɛ kadzawa we.

¹²Nahe ŋwalea tezhilia n'yɛ kenza kala wəfe nyi nza kele yitea hɛ. Nahe ŋwalea kwɛa n'yɛ kenza kendeɗe ndeɗenji kala selə nyi feɗete mbeli kezha pesa ghɛ meghe.

¹³Nza yɛ tame ta n'yɛ viɗi viɗi, mpɛafe mpɛafe va mama ta wəshi. Yate geva timɛti ba'a kwia n'yɛ kwele kwele, kwele kwele zhigə dzeyi hwa gamba ta n'yɛ.

¹⁴Nza yɛ sla ta n'yɛ kedɛɓedɛa dɛɓedɛanji. Ɗema yɛ ŋzla nza te zlia n'yɛ, zhɛnema mbeli kafə wəshia n'yɛ, zhɛnema mbeli kafa yɛ lewela dzeyi te ŋkwa kebeke ta n'yɛ.

¹⁵Zlama ya va hwelefe nya nza wəshia shɛhɛ ve, zlama ya va hwelefe nya nza Mahwətə kaShala ta ŋkɛ.