Read KapsikiDC Cimə 147 Bible Online

Cimə 147 - KapsikiDC bible

Cimə 147

¹Alɛləwya! Megela ŋkɛ kagha nda cimə ke Shala ta ɓəmə, ndeɗekə ŋkɛ kezha tsahe ŋkɛ megela.

²Mahwətə kazhɛne kaŋa Zhɛrəzalɛm, katetsene ka Israyɛl nyi fəhwe mbeli ŋkɛ.

³Gheŋkɛ nde mbe ka beze bezea wənə ba'a nde peɗe nda zhia nci ke hɛ.

⁴Kaɓela pɛtɛa saseregwa ŋkɛ, kaheka hɛ ŋkɛ le sləa nci.

⁵Nahe Shala ta ɓəmə kenza wəbake ba'a bereteke, ghala shɛ kwa ɗepe wəsə ta ŋkɛ we.

⁶Kakese ka dewə ŋeli Mahwətə sate te ŋkwa, ama kashifə ka 'yaghwa mehele ŋkɛ hwa'a mɛa hɛɗi.

⁷Gha nda mə cimə ketsa hana ke Mahwətə, tsahe mə Shala ta ɓəmə le ŋgwəleŋə.

⁸Gheŋkɛ nde pele ləmbə dzeyi te ghweme ba'a nde me nda va ke hɛɗi. Gheŋkɛ nde pese gwəzə dzeyi hwa yɛ ghweme.

⁹Kave nda wəsə kezeme ŋkɛ ke wəshi keseɗa ba'a ke ŋwalea ghame nyi kenehwene va ma.

¹⁰Kenza berete ta gədəwə zeɗehwe nda we, keɓela mɓəa wəndə ŋkɛ we.

¹¹Ama ka hawe ve yazeɗehwe nda ke Mahwətə, ka ve ghə te ganyɛa ŋkɛ.

¹²Zhɛrəzalɛm, ve zləvə te Mahwətə. Siyon, tsahe Shala ta ŋa.

¹³Kwa nza ŋkɛ nahe ŋkɛ kemtsehete nda berete ke wəshi keŋzle yɛ gelembe ta ŋa, nahe ŋkɛ kewəpikɛ mbeli nyi mbe gha.

¹⁴Kave kwelɛŋe ŋkɛ te hɛɗia ŋa, kabehe ŋa ŋkɛ le ha nya ganyɛ.

¹⁵Kaghwene ghena ta ŋkɛ ŋkɛ kadzete hɛɗi. Tagha gɛ, kantsehe ghena ta ŋkɛ kahe kahe.

¹⁶Kabete kwacakelɛ ŋkɛ kasawa təwə təwə kala pawa, kamene meləkwə ləkwə ŋkɛ kala pəsəɗə.

¹⁷Kabete kwacakelɛ ŋkɛ kasawa kala yɛ kweya. Wa nde nza kasəwəte ntasle nya mene hɛ wa?

¹⁸Ghwenakɛma ta ŋkɛ ke ghena ta ŋkɛ ne, karɛɗɛ hɛ. Vɛkema ta ŋkɛ ke sefə ne, kahwɛ hɛ kala yɛmə.

¹⁹Kageze nda ghena ta ŋkɛ ŋkɛ ke Zhakob, wəshi nyi ɗe ŋkɛ ba'a ghena nyi gezete ŋkɛ ke Israyɛl.

²⁰Kemenete nda ŋkɛ tsagha ke kweci hwelefefi we, keɗepe ghena nyi gezete ŋkɛ hɛ we. Alɛləwya!