Read KapsikiDC Cimə 16 Bible Online

Cimə 16 - KapsikiDC bible

Cimə 16

¹Ciməa David. Shala yawe, ya ɗa, kwa nza ŋkɛ gha ya kaŋkwa kewəfərə ta ɗa.

²Ma 'ya sha Mahwətə: «Gha ya kaNde sleke ŋkwa, zeɗe nza nya wəba shɛ va 'ya za ma ke gha we!»

³Ma mbelia Shala nyi te hɛɗia shɛ ne, ghenci ka katsala kɛfi nyi zeɗehwe ɗa.

⁴Ma mbeli nyi kelənji yitea kweci shala ne, katembake yaka nyi te hɛ hɛ. Katezhɛne 'ya kacɛhe nda mimi ke hɛ we. Katezhɛne mɛa ɗa kahekɛme sləa nci we!

⁵Mahwətə, gha ya kaŋa ɗa wəsə kezeme ghɛ ba'a kaŋa ɗa bela. Mbe dzeve ta ŋa mpia ɗa.

⁶Zeɗehwe ɗa wəsə nya ve ɗa na, bela nya kemave 'ya ya ganyɛ ma.

⁷Katsa nda hana 'ya ke Mahwətə nya kencɛ ɗa ntsehwele. Ya heviɗi ne, kageze ɗa ghena mehele ta ɗa.

⁸Te Mahwətə nza ntsə ta ɗa kevə kevə, kateɗe 'ya, va nya nza ŋkɛ vare 'ya we.

⁹Kala nya zlama wənəa ɗa ne, tsagha nza mehele ta ɗa fare fare ba'a pɛtɛa geva ta ɗa gwezlayɛ.

¹⁰Kwa nza ŋkɛ katewəfə ɗa na kwa ghɛa mbelia kwahɛɗi we, katesərə wəndə nya dɛŋe dɛŋe te gha na kadaɗə kwa kwele we.

¹¹Kancɛ ɗa hweŋkwa ta mpi na. Kwele kwele nza zlama kwa kema ta ŋa, kakiɗi zeɗe nza nya vare gha we.