Read KapsikiDC Cimə 17 Bible Online

Cimə 17 - KapsikiDC bible

Cimə 17

¹Səkwə ghə ta David. Mahwətə, fa 'yɛwe ta ɗa nya tiɗiɗi, ve sleme yitea lewela ta ɗa, ghwene sleme yitea səkwə ta ɗa nya keɗema kesame kwa mɛ nya kesla tseŋwə.

²Gha nde ve ɗa nza tiɗiɗi, neweve wəsə nya kehi le ntsə ta ŋa.

³Kanewe ŋkwa nya kwa wənəa ɗa na, ma heviɗi ne, kamare nza ta ŋkɛ na. Kanewe nza ta ɗa na pɛtɛ, ama wəsə kwa ndiremi shɛ kesləyi na we. Kasame ghena nyi zəzəve 'ya kwa mɛa ɗa we.

⁴Va wəshi nyi mene kweci mbeli ne, nahe 'ya kendeke nda ghə ke mene wəsə nya gezete na, nahe 'ya keyate ghəa ɗa va dzeghwa ta ka mene berete.

⁵Nahe 'ya kedzeghwate dzeghwa kwa hweŋkwa ta ŋa, kesamenji seɗa ta ɗa kwa we.

⁶Kaheka ŋa 'ya kwa nza ŋkɛ katezhɛne ɗa na Shala yawe. Zhɛrave ɗa sleme, fa ghena ta ɗa.

⁷Ncɛte ɗa ɗe ta ŋa, gha nya kembele mbeli nyi kewəfərə mbe gha va mbeli nyi kesa nda yaka ke hɛ.

⁸Ya ɗa kala ha ta ntsə ta ŋa, wəfərə ɗa yitea shenaŋkwe ta bidzəa ŋa,

⁹cakeɗake yitea ka 'yaghwa mehele nyi keɗa ɗa ba'a yitea ka jaga nyi ghyana ghyana nyi kedzasle ɗa.

¹⁰Nahe hɛ kezhɛrete wənəa nci ntɛaŋe ntɛaŋe, ghena ŋkele ntsə yageze mɛa nci.

¹¹Zele yazele ɗa hɛ, 'ya yadzasle hɛ tsetsenya, ntsehwele yazele hɛ kezha wele ɗa.

¹²Yipə yipə hɛ le nivɛrə nya te ghweɓe hwa gamba, le megela nivɛrə nya ɗeke ɗeke kezha slekwe wəsə kezeme ta ŋkɛ.

¹³Mahwətə, sate te ŋkwa, ghereŋe kwa kema ta nci, betate hɛ te hɛɗi. Mbelete ɗa va ka 'yagha mehele le kafayɛa ŋa.

¹⁴Mahwətə, ŋkamte hɛ te hɛɗi le dzeve ta ŋa, cakeɗake yitea mbeli nyi te hɛɗi lema. Nya ya kaŋa nci bela mbe nza nya. Viɗikɛ hwəa nci le yɛmə nya 'yaghwa nya wəmbəyi nda na ke hɛ. Nza ŋwalea nci behe behe ve, teneyi nda hɛ ke hwelefefia nci.

¹⁵Ama kaŋa ɗa, laka nza tiɗiɗi ne, katenewe kema ta ŋa 'ya. Ma vəa ŋkwa nya tefeɗeghe 'ya ne, behe tenza 'ya va pa ta ŋa.